(გურია ნიუსი, ლანჩხუთი) _ გურული გლეხები მოჩხუბარ პარლამენტარ აკაკი ბობოხიძის ცემას აპირებენ. მართალია, ამას ისინი ხუმრობით ამბობენ, მაგრამ “მესიმინდე ბობოხიძის” “ჰიბრიდული ტრაბახისას” მასთან ახლოს რომ ყოფილიყვნენ, ბობოხიძის პეტრე მამრაძისადმი მიყენებული დარტყმა ლოყაზე ხელის მოთათუნება იქნებოდა _ გურული გლეხისთვის გაცილებით უარესია, ვალი დაიდოს, სახელმწიფოსგან “შეტენილი” ჰიბრიდული სიმინდის საყიდლად ბანკის ვალი აიღოს, მერე ამოსული სიმინდი უგზო-უკვლოდ გაქრეს, ვიდრე კაკო ბობოხიძისთვის _ პეტრე მამრაძის მხრიდან მიხეილ სააკაშვილის დადანაშაულება. ალბათ, ბევრი შეუკურთხებდა ბობოხიძეს, ხელში სიმინდის ტაროები რომ ეჭირა და ოპოზიციას “ემარიაჟებოდა”, თითქოს დიდი მესიმინდე იყოს, ამ დროს კი გურული გლეხი შიმშილით გადასატან ზამთარსა და იმ ვალების გადახდაზე ფიქრობს, რომელიც ჰიბრიდული სიმინდის შესაძენად “აიკიდა”.
არადა, ჰიბრიდული სიმინდი რომ ვიღაცის ინტერესი იყო და გლეხზე არავინ ფიქრობდა, ამის შესახებ ჯერ კიდევ თვეების წინ ვწერდით და ახლაც შეგახსენებთ: ხელისუფლებამ ყვითელი, ჰიბრიდული ჯიშის სიმინდის 65 000 მარცვალს (რაც, მთავრობის თქმით, ერთ ჰექტარზე დასათესადაა საკმარისი) 240 ლარად მიჰყიდა გლეხს. ერთ-ერთ უკრაინულ საიტზე, ვინმე ალექსეი ბონდარი ფირმა “პიონერის” ამავე მარკის 80 000 მარცვალს (საიტზე ეს რაოდენობაა ერთეულად მიჩნეული) ვიპ-ფასში 111 დოლარად ყიდდა!!! ელემენტარული არითმეტიკის გამოყენებით შეგიძლიათ გაიანგარიშოთ, რომ შემოთავაზებული 65 000 მარცვლის ფასი მაქსიმუმ, 158 ლარია! თანაც, უკრაინაში კერძო პირის მიერ უკვე ჩატანილი და ბონდარის მოგებაწამატებული. საქართველოში კი “სახელმწიფო”, რომელიც პროდუქციაში ბონდარზე გაცილებით ნაკლებს გადაიხდიდა პირდაპირ სიმინდის მწარმოებელი ქვეყნისგან ყიდვის დროს, საკუთარ, გაჭირვებულ მოსახლეობას შესასყიდ ფასზე ორჯერ მეტს ახდევინებს, ეს გაორმაგებული ფასი კი, ბანკისგან სესხაღებულ გლეხს, პროცენტების გათვალისწინებით, კიდევ უფრო გაეზრდება! _ წერდა “გურია ნიუსი”.
გურიაში, ვინც წელს ამერიკული ჰიბრიდული ჯიშის სიმინდი დათესა, ცოტა ხანში პირველ მოსავალსაც ელოდება. მართალია, ხელისუფლების წარმომადგენლები გვიმტკიცებდნენ, რომ ასობით ჰექტარზე მოხდებოდა სიმინდის ჰიბრიდული თესლის დათესვა, მაგრამ ასე არ მოხდა _ ზოგი ბანკებთან ურთიერთობას მოერიდა, ზოგი კიდევ ჰიბრიდულ სიმინდს ეჭვის თვალით უყურებდა. ჩვენთან საუბარში სპეციალისტები აცხადებენ, რომ ხელისუფლებამ სიმინდის თესლი მოსახლეობას ისე შესთავაზა, რომ ნიადაგი არ გამოუკვლევიათ, რას ძირითადი მიზეზია, რომ მოსავალი ცუდი იქნება. თუმცა, ლანჩხუთის გამგებლის მოადგილე გიორგი ჭყონია პარლამენტარ ბობოხიძის არ იყოს, ლანჩხუთში ჰიბრიდული ჯიშის სიმინდის კარგ მოსავალს ელოდება: “საკმაოდ ნორმალურ მოსავალს ველით. წელს ორი სახის თესლი შემოვიტანეთ _ თეთრი და ყვითელი. თეთრი ჰიბრიდი მოსახლეობამ ნაკლებად დათესა. არადა, როგორც მოსავალმა აჩვენა, უფრო მომგებიანი ყოფილა. ყვითელი უფრო მეტია და კარგადაც მოვა. ჩვეულებრივ სიმინდზე ორჯერ მეტ მოსავალს ველოდებით მიუხედავად იმისა, რომ წელს საკმაოდ ცუდი ამინდები იყო და თესვის პროცესი გაძნელდა.” მართალია, მოსახლეობას ორი მოსავლის მიღებას ჰპირდებოდნენ, მაგრამ ახლა ერთსაც თუ ვინმე მიიღებს, დიდი მადლობელი იქნება.
როგორც უკვე გითხარით, ბევრგან ამოსული სიმინდი გაქრა. ამას გურული ჩინოსანიც ვერ უარყოფს: “იყო ასეთი შემთხვევებიც, მაგრამ უფრო ზღვისპირეთში. მაღალმა ტენიანობამ გამოიწვია ეს. წყალი დადგა ფართობში კვლების არარსებობის გამო და სიმინდი გაფუჭდა”.
ამასობაში კი გურული გლეხები ამბობენ, რომ მოსავლის ვერმიღების გამო, არ აპირებენ თესლის საფასურის გადახდას და ბანკში ვალის დაფარვას სახელმწიფოს მოთხოვენ. არადა, მათ რას არ ჰპირდებოდნენ, ოდინდელი, მამაპაპური სიმინდის თესლზე უარი ეთქვათ და ჰიბრიდული დაეთესათ _ დიდ და მცირე სესხებს, აზერბაიჯანელ ინვესტორებს, ნოვა კახოვკელ რეფორმატორებს, ბიზნესწინადადებების დახვეწა-გაკიწკიწებას, დიდჯიქნიან ძროხებს, აგუგუნებულ ტრაქტორებს, ჭაობების დაშრობას, “სამ ყურში” მოკრეფილი ჩაის ოქროს ფასად ჩაბარებას და რაც მთავარია, ყვითელი სიმინდის მთებს!!! _ ეს დაპირებებიც, სამწუხაროდ, მხოლოდ “გურია ნიუსის” ფურცლებს შემორჩა.
“ჩვენი ბრალია ყველაფერი! სულ გვატყუებენ და ამაში რომ ვენდეთ? გვიკიჟინეს, ამდენ მოსავალს მიიღებთო, გაგასაღებინებთო და ა. შ. მერე არც ტრაქტორი წამოგვაშველეს, დათესვაც დაგვიანდა. თურმე, ნიადაგიც არ ყოფილა შემოწმებული და შედეგიც სახეზეა. რა უნდა დაიჯერო მაგათი სამინისტროს, ასეთი ახალგაზრდა ბიჭი რომ უდგას სათავეში? მაი კვეზერელი ყანაში ნამყოფი არ იქნება, სოფლის მეურნეობის ხომ აზრზეც არაა _ მამალ და დედალ ძროხებზე რომ მინისტრი ილაპარაკებს, რაღა უნდა დაიჯერო? მალე, ალბათ, “მამალი ძროხების” მოწველასაც მოგვთხოვენ და ჩვენც დავიჯერებთ _ ისე კარგად შეფუთავენ, როგორც ჩვევიათ, _ ამბობენ გლეხები.
ჰიბრიდულ სიმინდთან ერთად, ალაგ-ალაგ “ფეკალიებით გაზავებული წყალი დალია” ახალი ჯიშის საქონლის გურიაში ჩამოყვანას გეგმამაც _ არადა, “ნაციონალური დაპირებით”, ამ ჯიშების ადგილობრივ ჯიშებთან შეჯვარება შეიძლება, თანაც, ხელისუფლების მტკიცებით, იმპორტული ძროხები წელიწადში 5 ტონა რძეს, ნამატს კი 22-23 თვის ასაკში იძლევიან, თურმე!!! აქ უბრალო არითმეტიკა რომ მოვიშველიოთ და ჩავთვალოთ, ეს უცხოელი ძროხები მთელი წლის განმავლობაში არ გაშრებიან და ყოველდღე შეგვიძლია მოვწველოთ, გვიანი მაკეობის დროსაც კი, დღეში 14 ლიტრამდე რძეს მოგვცემენ!!! ასე რომ, ცოტა ხანში, გურულების ონკანებში, რომლებშიც ამასწინათ ფეკალიებიანი წყალი მოედინებოდა და ხალხი დაწამლა, ანაც ზოგან საერთოდ არ მოდის და ტყუილად იჟანგება, შეიძლება, რძე წამოვიდეს!
