აზერბაიჯანელი უფლებადამცველები ორი თვეა ცდილობენ გაარკვიონ რამდენად კანონიერად მოხდა აზერბაიჯანის ოპოზიციური მოძრაობის აქტიური წევრის, დაშგინ აღალაროვის დაკავება საქართველოში.
_ აზერბაიჯანის ოპოზიციური მოძრაობის აქტიური წევრი, დაშგინ აღალაროვი დაკავებული იქნა საქართველოში, ინტერპოლის დავალებით. მას ბრალს დებენ გადასახადებისგან (4 000 ევროს ოდენობით) თავის არიდებას. ეს დაკავება მოულოდნელი იყო აღალაროვისთვისაც. ის რჩება პატიმრობაში, მიუხედავად იმისა, რომ აპირებს ამ ვალის გადახდას გათავისუფლებისთანავე, თუ, რა თქმა უნდა, ეს ვალი არსებობს.
OSCE-მ (უსაფრთხოებისა და კოოპერაციის ორგანიზაცია ევროპაში) შეადგინა დოკუმენტი, რომლის თანახმადაც მოუწოდებს ინტერპოლს, ნუ გახდება იარაღი არაკეთილსინდისიერი მთავრობის ხელში. მაგრამ აზერბაიჯანის მთავრობა კვლავ წარმატებით განაგრძობს ინტერპოლის გამოყენებას საკუთარ პოლიტიკურ მაქინაციებში.
აღსანიშნავია, რომ ეს არის უკვე მეორე შემთხვევა მიმდინარე წელს. პირველი დაფიქსირდა რამდენიმე თვის წინ, როდესაც ისა სადიკოვი, ცნობილი კრიტიკოსი, რომელიც გამოდიოდა მთავრობის წინააღმდეგ, გაიქცა საქართველოში, მაგრამ ინტერპოლმა გააფრთხილა, რომ მას დაიჭერდნენ და ბატონ სადიკოვს მოუხდა ნორვეგიაში გაქცევა, ქვეყანაში რომლის მოქალაქეობასაც ის ატარებს. ორივე, აღალაროვიც და სადიკოვიც, არიან დემოკრატიული ოპოზიციის სახალხო კონსულის აქტიური მხარდამჭერები არიან.
ძვირფასო ჟურნალისტებო, გთხოვთ მოიძიოთ ყველა ინფორმაცია იმის შესახებ, თუ არის დაცული ყველა კანონი აღალაროვის დაკავებასთან დაკავშირებით და საერთოდ თუ არის ეს დაკავება კანონიერი? რატომაა საქართველოს მთავრობა ასეთი შერჩევითი "სამართლიანობის აღდგენის" დროს?
მაგალითად, ჩვენ ვერ დავინახეთ იგივე დონის თანადგომა საქართველოს ხელისუფლებისგან ჟურნალისტი ელმარ ჰუსეინოვის მკველელობის საქმესთან დაკავშირებით. საქართველოს ორი მოქალაქე _ თეიმურაზ ალიევი და თაჰირ ხუბანოვი ეჭვმიტანილები იყვნენ ჟურნალისტის მკვლელობაში. აზერბაიჯანის მხარემ მათი გადაცემა მოითხოვა, თუმცა, ისინი არც კი დააკავეს. მაინტერესებ,ს რამ მიაღებინა საქართველოს მთავრობას ასეთი გადაწყვეტილება, _ ეს განცხადება აზერბაიჯანელმა უფლებადამცველმა, ხაჯიდა ისმაილიმ სოციალურ ქსელში ერთი თვის წინ გაავრცელა და საქართველოში მყოფ კოლეგებს დახმარებას სთხოვა:
_ ძვირფასო მეგობრებო, კოლეგებო საქართველოში და ადამიანთა უფლებების დაცვის ორგანიზაციაში. არსებობს პრობლემა, რომლის გარკვევაშიც თქვენი ჩარევა არის საჭირო, _ აღნიშნულია უფლებადამცველის მიერ გავრცელებულ განცხადებაში.
"გურია ნიუსი" ამ ინფორმაციით განცხადების გავრცელებისთანავე დაინტერესდა. შინაგან საქმეთა სამინისტრომ ინფორმაციის მოსაწოდებლად წერილობითი განცხადება მოგვთხოვა.
კითხვაზე, დააკავეს თუ არა საქართველოში დაშგინ აღარალოვი და რა გახდა მისი დაკავების მიზეზი, პასუხი 15 დღის დაგვიანებით მივიღეთ:
_ "თქვენი #1351986 განცხადების პასუხად გაცნობებთ, რომ დაშგინ აღარალოვის შესახებ თქვენს მიერ მოთხოვნილი ინფორმაცია შეიცავს პერსონალურ მონაცემებს. ხოლო საქართველოს ზოგადი ადმინისტრაციული კოდექსის 44-ე მუხლის თანახმად, „საჯარო დაწესებულება ვალდებულია არ გაახმაუროს პერსონალური მონაცემები თვით ამ პირის თანხმობის ან კანონით გათვალისწინებულ შემთხვევებში _ სასმართლოს დასაბუთებული გადაწყვეტილების გარეშე. თანამდებობის პირთა (აგრეთვე თანამდებობაზე წარდგენილ კანდიდატთა) პერსონალური მონაცემების გარდა“ _ აღნიშნულია შინაგან საქმეთა სამინისტროს მიერ გამოგზავნილ ოფიციალურ წერილში.
სიტუაციის გარკვევას ჩვენ აზერბაიჯანის საელჩოშიც შევეცადეთ, თუმცა უშედეგოდ. რამდენიმე გაგზავნილი შეტყობინება საელჩომ უპასუხოდ დატოვა.
აღნიშნულ საქმეს სახალხო დამცველიც სწავლობს, თუმცა დეტალებზე ინფორმაცია არა აქვს:
_გამოვითხოვეთ ინფორმაცია და ნაწილი მოვიდა. მეორედ მივწერეთ გამოძიებას და დამატებით ვითხოვთ საბუთებს, _ ამბობს ჩვენთან საუბრისას უჩა ნანუაშვილი, რომლის ინფორმაციით, დაკავებული დაშგინ აღალაროვი თბილისში ჰყავთ.
