მოუწესრიგებელი სანიაღვრე სისტემა წლებია, სიკო დოლიძის ქუჩის მცხოვრებლებისთვის ნომერ პირველ პრობლემად იქცა. ჯერ კიდევ 2010 წელს, ოზურგეთის მუნიციპალიტეტის გამგეობის სახელზე მოსახლეობამ წერილი შეიტანა, თუმცა, პრობლემა დღემდე გადაუჭრელია.
“ოზურგეთში, მე-2 საჯარო სკოლის უკანა შესასვლელში, მოუწესრიგებელია სანიაღვრე სისტემა _ მცირე წვიმის დროსაც კი გროვდება დიდი რაოდენობის წყალი, რაც ხელს უშლის მოსწავლეებისა და მშობლების სკოლაში თავისუფლად შესვლასა და გადაადგილებას, იტბორება ეზოები და სახლების პირველი სართულები. ხელისუფლებისადმი მრავალჯერადი, ზეპირი მიმართვის მიუხედავად, ჩვენი პრობლემით არავინ შეწუხებულა. გთხოვთ, ყურადღებით მოეკიდოთ წინამდებარე თხოვნას. ჩვენ იძულებული ვიქნებით, წვიმის დროსაც შეგაწუხოთ _ დატბორილი უბნისა და აღშფოთებული ადამიანების ნახვამ არა მგონია, კარგ ხასიათზე დაგაყენოთ. იმედს გამოვთქვამთ, რომ პრობლემას ერთობლივი ძალისხმევით მოვაგვარებთ”, _ წერდა ერთი წლის წინ გამგეობას დოლიძის ქუჩის ერთ-ერთი მცხოვრები.
2011 წლის 15 სექტემბერს, ამავე საკითხზე გამგეობასა და სამხარეო ადმინისტრაციაში ამავე ქუჩის მცხოვრების, ტიფო მიქატაძის წერილი შევიდა, რომელზეც, მას, ჯერჯერობით, ოფიციალური პასუხი არ მიუღია.
“წინამდებარე განცხადებას თან ახლავს იმ განცხადების ასლი, რომელიც 2010 წლის ბოლოს წარედგინა ოზურგეთის მუნიციპალიტეტის გამგებელს. განცხადებას ხელს აწერდნენ მთელი უბნის მცხოვრებნი. პრობლემა ვერ გადაწყდებოდა უბნის მოსახლეობის ძალებით და ამიტომაც მივმართეთ გამგეობას დახმარებისთვის, მითუმეტეს, სანიაღვრე სისტემის მოწესრიგება მისი უშუალო კომპეტენციაა. იმედი გვქონდა, რომ 2011 წლის გაზაფხულ-ზაფხულში (შემოდგომის, ანუ წვიმიანი პერიოდის დადგომამდე), პრობლემა მოგვარდებოდა.
შევცდით! არანაირი რეაგირება ჩვენს წერილს არ მოჰყოლია, გარდა იმისა, რომ ქუჩაში შემთხვევით შეხვედრილი გამგებელი მარწმუნებდა, რომ საკითხს შეისწავლიდა. ზაფხულიც გადიოდა და ჩანდა, რომ გამგებელმა “დაგვივიწყა” (ამ დამოკიდებულების შეფასებისას, სხვა ეპითეტებს იყენებენ უბანში და იმასაც ამბობენ, რომ თითქოს ეს ხელისუფლების მხრიდან ტიფო მიქატაძის, ანუ ჩემი “დასჯის” დემონსტრირებაა და ამას მთელი უბანი ეწირება). ამიტომაც გადაწყვეტილი გვქონდა, სექტემბერში პრობლემის შემქმნელი წვიმის დროს (რომელსაც ასახავს წინამდებარე განცხადებას თანდართული ფოტომასალა) დაპირებისამებრ ადგილზე მოგვეყვანა გამგებელი და მისგან მოგვესმინა პასუხი კითხვაზე: მისი შვილებისგან განსხვავებით, რატომ უნდა უსველდებოდეს ფეხები, იუარესებდნენ ჯანმრთელობას და სკოლას აცდენდნენ ჩვენი შვილები, ხოლო მშობლები მათ სამკურნალოდ დამატებით სახსრებს ვხარჯავდეთ, მაშინ, როცა გამგებელი ვალდებულია, პრობლემა მოაგვაროს. მაშინ, როცა ბიუჯეტი ხალხის შენატანებით ივსება?! გამგებელს, სავარაუდოდ, მოუწევდა “შემოსულიყო ჩვენს მდგომარეობაში”, გაესინჯა წყლის სიღრმე საკუთარი ფეხით ან დემონსტრირება გაეკეთებინა “ღობეებზე ძრომის” საკუთარი უნარისთვის.
მაგრამ საჯაროდ ცნობილი მიზეზების გამო, ეს ვერ მოხერხდა, პრობლემა კი პრობლემად რჩება”, _ წერს ხელისუფლებას მიქატაძე.
ოზურგეთის მუნიციპალიტეტის გამგეობაში ამ საკითხთან დაკავშირებით ასეთ კომენტარს აკეთებენ: “გამოცხადებულია ტენდერი და სანიაღვრე არხის საკითხი შესწავლის სტადიაშია. ქუჩის ასფალტირება კი ამ ეტაპზე არ იგეგმება”.
