დიდი დმანისის მოსახლეობა, კომპანია RMG გოლდის წინააღმდეგ საპროტესტო აქციას გეგმავს.
როგორც ადგილობრივები ამბობენ, აქციას მომიჯნავე სოფლების – კაზრეთისა და ბალიჭების მოსახლეობაც შეუერთდება.
"აქცია მშვიდობიანი ხასიათისაა, ხვალიდან შიმშილობას დავიწყებთ და იმედი გვაქვს მიზანს მივაღწევთ.
საქმე იმაშია, რომ აბულმუგის ტერიტორიაზე, სადაც RMG გოლდი საქმიანობას ეწევა, ჩვენი სასოფლო-სამეურნეო ნაკვეთები მდებარეობს. დაშორება დაახლოებით 80-100 მეტრია და ხდება ნიადაგის დაბინძურება. გამოდის რომ ეს მიწები იძულებით ჩამოგვართვეს, რადგან დაბინძურების გამო მათ რეალურად ვერ ვიყენებთ.
გზები გადაგვიკეტეს, 6 წელია კვირაცხოვლის ხევში მდებარე სარწყავი მიისაკუთრეს და სოფელი უწყლოდ დატოვეს.
გარდა ამისა, ციანიდით გვწამლავენ და დღე არ გავა სოფელში ვინმეს მძიმე დაავადება არ დაუდგინდეს. რაღა აფხაზეთში მოვუკლივარ ვინმეს და რაღა აფხაზეთიდან ჩამოსულ ლტოლვილს მოვუწამლივარ", _ ამბობს "გურია ნიუსთან" დიდი დმანისის მკვიდრი მურად მარტიაშვილი.
მისივე განცხადებით, გაფიცულები, ხვალ, დაუმუშავებელი ნაკვეთების სანაცვლოდ, ფულად კომპენსაციას მოითხოვენ. ზარალი ჯერჯერობით არ დაუთვლიათ, თუმცა იციან, რომ ეს ასეულ ათასობით ლარია.
"ვაპროტესტებთ ეკოლოგიურ პრობლემას და ვითხოვთ ამ მიწების და სარწყავის მიტაცებით გამოწვეული ზიანის ანაზღაურებას. კომპანიამ უნდა გადაგვიხადოს ის თანხა, რაც ამ მიწებიდან 6 წლის განმავლობაში უნდა მიგვეღო. საუბარია 6 ჰექტარ მიწაზე, 1 ჰექტარში კი დაახლოებით 35-40 ტონა კარტოფილი მოგვყავდა.
ამას გარდა, მოვითხოვთ შეწყდეს ამ მიწების დაბინძურება და ჩვენი ცოცხლად დამარხვა", _ ამბობს მურად მარტიაშვილი.
ადგილობრივების თქმით, გაფიცვამდე RMG გოლდთან მოლაპარაკება არ უცდიათ, რადგან დარწმუნებულები არიან კომპანიაში მაინც არ მოუსმენენ.
"ადრე რამდენჯერმე იყო ამაზე საუბარი, მაგრამ კომპანიაში მასხრად გვიგდებდნენ, ასე რომ მოლაპარაკების აზრს ვერ ვხედავთ", _ ამბობენ დიდი დმანისის მცხოვრებლები.
აბულმუგის ტერიტორია, სადაც RMG გოლდს გროვული გამოტუტვის მოედნები აქვს მოწყობილი, დიდი დმანისის სიახლოვეს მდებარეობს. მოედნებზე განთავსებული დამსხვრეული მადნის გროვებზე ნატრიუმის ციანიდის ხსნარის დასხურება მომიჯნავე სოფლებს ეკოლოგიური კატასტროფით ემუქრება. არაერთი კვლევის მიხედვით ნიადაგისა და წყლის დაბინძურება დასაშვებ ნორმას ბევრად აღემატება, რაც ადგილობრივების ჯანმრთელობაზე აისახება.
კომპანია RMG მომხდარში საკუთარ ბრალეულობას გამორიცხავს და მომხდარს "ისტორიულ დაბინძურებას" უწოდებს, რაც 70-ან წლებში მომხდარა.
2014 წლის 27 თებერვალს RMG გოლდმა მდინარე კაზრეთულას დაბინძურებით, გარემოს 1 078187, 96 ლარის ზარალი მიაყენა, აღნიშნულ საქმეს მთავარი პროკურატურა იძიებს. ამ დრომდე საქმის ბედი გაურკვეველია, კომპანიაში კი აცხადებენ მათ არანაირი ზარალი არ გადაუხდიათ.
ხვალინდელ გაფიცვასთან დაკავშირებით, RMG გოლდში კომენტარს არ აკეთებენ. როგორც საზოგადოებასთან ურთიერთობის სამსახურის ხელმძღვანელი ნიკა კარიჭაშვილი ამბობს, კომპანია ოფიციალურ განცხადებას მას შემდეგ გაავრცელებს, რაც გაფიცულების მოთხოვნები გახდება ცნობილი.
"ჯერჯერობით თავს შევიკავებთ კომენტარისგან, მოვლენებს წინ არ გავუსწრებთ, დაველოდებით ხვალინდელ აქციას, გავიგებთ მოთხოვნებს და ამის შემდეგ დავაფიქსირებთ კომპანიის პოზიციას", _ ამბობს კარიჭაშვილი
როგორც ადგილობრივებმა "გურია ნიუსს" აცნობეს, დიდ დმანისში უკვე შეინიშნება პოლიციის გააქტიურება.
"ვიღაცას გაუვრცელებია ინფორმაცია, რომ თითქოს გზის გადაკეტვას ვგეგმავთ. ჩვენი აქცია იქნება მშვიდობიანი და ჩატარდება ჩვენს კუთვნილ ნაკვეთებში, სადაც ან კარვებს ჩავდგამ ან ჩვენივე ხელით გაკეთებულ ფანჩატურებს", _ ამბობს მურად მარტიაშვილი.
