შინაგან საქმეთა სამინისტრომ, თბილისის ცენტრში, თანამედროვე დროებითი განთავსების ცენტრი ააშენა, სადაც საქართველოს ტერიტორიაზე უკანონოდ მყოფი პირები მას შემდეგ მოთავსდებიან, რაც ქვეყნიდან გაძევების კანდიდატები გახდებიან.
ამის შესახებ იუსტიციის მინისტრმა თეა წულუკიანმა განაცხადა.
აღსანიშნავია, რომ საქართველოს მთავრობამ საქართველოდან უცხოელის გაძევების წესი დაამტკიცა. იუსტიციის მინისტრ თეა წულუკიანის განცხადებით, საქართველო, როგორც ცივილიზებული სახელმწიფო, აგრძელებს სვლას იქითკენ, რომ საქართველოს ტერიტორიაზე უკანონოდ მყოფი მოქალაქე ქვეყნიდან ადამიანის უფლებების დაცვის პირობებში გააძევონ.
"უკანონოდ საქართველოს ტერიტორიაზე მყოფი უცხოელების გაძევების წესი მთავრობის სხდომაზე დავამტკიცეთ. შინაგან საქმეთა სამინისტრომ ააშენა თანამედროვე დროებითი განთავსების ცენტრი თბილისში. აქ მოთავსდება ყველა უცხოელი, ვინც გაძევების კანდიდატია, მაგრამ მათი უფლებები იქნება დაცული", _ განაცხადა თეა წულუკიანმა.
მინისტრის თქმით, პირს, რომელიც გაძევების კანდიდატი გახდება, ამის შესახებ ეცნობება და ქვეყნის ნებაყოფლობით დატოვების უფლება მიეცემა. ასეთ პირს საქართველოს ტერიტორიაზე კანონის დაცვით შემოსვლის უფლება შემდგომშიც ექნება.
საქართველოს მთავრობამ დაამტკიცა უცხოელების შემოსვლისა და ბინადრობის წესიც.
"აბსოლუტურად მცდარია მოსაზრება, თითქოს უცხოელები თავისუფლად ვეღარ შემოვლენ საქართველოში. უცხოელებს იმ ქვეყნებიდან, რომელთა სიაც ჩვენ დავამტკიცეთ მთავრობის სხდომაზე, აქვთ უფლება, შემოვიდნენ ქვეყნის ტერიტორიაზე უვიზოდ. მთავარი, რაც იცვლება, არის ის, რომ უვიზოდ შემოსვლის შემდეგ, საქართველოში 360 დღით დარჩენის მაგივრად, იქნება ყოველ 180 დღეში 90 დღე.
ჩვენ შემოგვაქვს ხუთი კატეგორიის სხვადასხვა ვიზა. ვისაც უნდა დარჩეს საქართველოს ტერიტორიაზე უფრო მეტი დრო, ვიდრე ამას ტურისტული თუ სხვა ხანმოკლე ვიზა ითვალისწინებს, საჭიროა, უცხო ქვეყნის მოქალაქემ წინასწარ, ქვეყანაში შემოსვლამდე აიღოს საიმიგრაციო ვიზა, წინააღმდეგ შემთხვევაში ვერ მიიღებს ბინადრობის მოწმობას სტუდენტური ან თუნდაც სხვა შრომითი საქმიანობის გაგრძელების მიზნით", _ განაცხადა თეა წულუკიანმა.
შეგახსენებთ, რომ საქართველოსთან უვიზო რეჟიმი 24 ქვეყანას გაუუქმდა, 94 ქვეყნისთვის კი, კვლავ უვიზო რეჟიმია.
ყველა ტიპის ვიზა 50 დოლარი ეღირება და მათი მიღება საქართველოს საკონსულოებში იქნება შესაძლებელი.
