საბავშვო ბაღები მუშაობას 8 სექტემბრიდან იწყებენ. როგორც თბილისის ბაგა-ბაღების მართვის სააგენტოს დირექტორი. თემურ თორდინავა აცხადებს, 50 ათასამდე დარეგისტრირებული ბავშვის მისაღებად. თბილისის 159 ბაღი მზადაა.
ყველაზე დიდი პრობლემა ამ ეტაპზე, ადგილების არასაკმარისი რაოდენობაა. 25 ათასი ბაღის ასაკის ბავშვი თავისუფალი ადგილების მოლოდინშია.
როგორც თბილისის მერი დავით ნარმანია ამბობს, მომავალში 10 ახალი ბაღის მშენებლობა იგეგმება. სანამ ახალი ბაღები მზად იქნება, მანამ როგორ აპირებს თბილისის ხელისუფლება დარეგისტრირების პრობლემის გადაჭრას და საერთოდ, რა სიახლეებია დაგეგმილი ამ სფეროში?
ამის შესახებ "გურია ნიუსს" თბილისის ბაგა-ბაღების მართვის სააგენტოს დირექტორი, თემურ თორდინავა ესაუბრება:
_ ბატონო თემურ, როგორ ხვდება ახალ სააღმზრდელო წელს თბილისის საბავშვო ბაღები?
_ თბილისის ყველა საბავშვო ბაღი 8 სექტემბრისთვის სრულ მზადყოფნაშია. მონიტორინგის ჯგუფები გვაქვს შექმნილი, რომლებიც 5,6,7 სექტემბერს ადგილზე გადაამოწმებენ სასწავლო პროცესის მზადყოფნას. წინასწარი ინფორმაციით კი სრული მზადოფნაა, რამდენიმე ბაღში შიდა სარემონტო სამუშაოებია და იქაც 5-6 სექტემბრისთვის დასრულდება ეს პროცესი.
_ თქვენ ახალი დანიშნული ხართ ამ თანამდებობაზე. რა პრობლემები დაგხვდათ სისტემაში და რა სიახლეების განხორციელებას გეგმავთ სამომავლოდ?
_ ჩვენ დაგვხვდა კომპლექსური პრობლემები. მათი მოგვარება დავიწყეთ თანმიმდევრულად. ეს იყო შესყიდვებთან, ბავშვების მიღებასთან დაკავშირებული.
_ ერთ-ერთი მთავარი პრობლემა თბილისის ბაღებში, ადგილების არასაკმარისი რაოდენობაა. ბევრმა მშობელმა ვერ მოახერხა ბავშვის რეგისტრაცია. გავრცელებული ინფორმაციით, 25 ათასი ბავშვი ბაღის გარეშე დარჩა. რა ღონისძიებებს მიმართეთ ამ პრობლემის აღმოსაფხვრელად?
_ აღნიშნული საკითხი, წმინდა ინფრასტრუქტურული თვალსაზრისით, დღემდე პრობლემურია. თუმცა, ამ მოკლე პერიოდში, ჩვენ შევძელით 3 650 დამატებითი ადგილის შექმნა, გამოუყენებელი ფართების გარემონტების ხარჯზე.
მსგავსი ღონისძიებები დღემდე გრძელდება. არის ბაღები, რომლებიც ავარიულ მდგომარეობაშია და გამაგრებით სამუშაოებს საჭიროებენ. შემდეგ ისინიც შეძლებენ უფრო მეტი ჯგუფის მიღებას.
ბაღებში, ამჯერად, 50 ათასი ბავშვის მიღება შეგვიძლია. 25 ათასი იმ ბავშვების რაოდენობაა, რომლებიც 2-დან 6-წლამდე ასაკის არიან, თუმცა იმის ზუსტი სტატისტიკა არ არსებობს, ამ 25 ათასიდან, რამდენის მშობელია მსურველი ბაღში ატაროს თავისი შვილი. ბაღებიდან მოპოვებული ინფორმაციის საფუძველზე, ჩვენ ეს სტატისტიკა დირექტორების საშუალებით დავადგინეთ, დარეგისტრირების მსურველთა რიცხვი ავიდა 10 ათასამდე.
_ თბილისის მერის, დავით ნარმანიას განცხადებით, კიდევ 10 ახალი ბაღის აშენება იგეგმება სამომავლოდ. თუმცა, ამ ეტაპზე რას ეუბნებით, თუნდაც იმ 10 ათასი ბავშვის მშობელს, რომლებსაც სურთ ბაღში ატარონ თავიანთი შვილები?
_ სექტემბრის შუა რიცხვებში იწყება 1 ახალი ბაღის მშენებლობა. მიმდინარე წელს კიდევ რამდენიმეს მშენებლობაა დაგეგმილი. 2015 წლის ბოლოსთვის 10 ბაღი გვინდა მოვასწროთ. თუმცა, პარალელურად მიმდინარეობს არსებულ ბაღებში დამატებითი ფართების მოძიება და მათი გარემონტება და ამის ხარჯზე დაემატება ახალი ჯგუფები.
_ კიდევ ერთი პრობლემა, რომელიც მწვავედ დგას ბაღებში, არის საწოლების არასაკმარისი რაოდენობა. ამის გამო ბავშვები ვერ ახერხებენ დაძინებას. ყოფილა შემთხვევები, როცა მათ სკამებსა და მაგიდებზე თავჩამოდებულებს დასძინებიათ. ხომ არ დაგიგეგმავთ ამ პრობლემის გადაჭრის გზები?
_ საზოგადოებას ეცნობება ყველა იმ ნაბიჯის შესახებ, რაც ბაღებთან დაკავშირებით დაიგეგმება. ჩვენ ღია და გამჭვირვალე ვართ ამ მხრივ.
_ თქვენც თუ ხედავთ ამაში პრობლემას და აპირებთ, თუ არა უახლოეს მომავალში საწოლების რაოდენობის გაზრდას ბაღებში?
_ პრობლემები არის კომპლექსური და მათ მოგვარებას ვახორციელებთ ეტაპობრივად.
_ ანუ მშობლებს ჰპირდებით, რომ მათი შვილები აღარ დაიძინებენ მაგიდაზე, სკამებზე და უნდა ჰქონდეთ ამ მდგომარეობის გამოსწორების იმედი?
_ რა თქმა უნდა, ყველა პრობლემა მოგვარდება, მაგრამ მინდა, საზოგადოებას მივმართო, რომ ყველა მწვავე საკითხი ერთ დღეში და ერთ კვირაში ვერ გადაიჭრება. ჩვენ ბევრი პრობლემა დაგვხვდა ამ სისტემაში და მათ მოგვარებას თანმიმდევრული ნაბიჯები სჭირდება.
_ რა პირობებია ბაღებში შეზღუდული შესაძლებლობის მქონე პატარების მისაღებად? რამდენი ასეთი ბავშვი დარეგისტრირდა და გყავთ, თუ არა სპეციალური მასწავლებელი მათთვის?
_ ამ ეტაპზე სულ 274 სპეციალური საჭიროების მქონე ბავშვია დარეგისტრირებული თბილისის საბავშვო ბაღებში. რა თქმა უნდა, ყველა პედაგოგი დატრენინგებულია იმასთან დაკავშირებით, თუ როგორ უნდა მოიქცნენ შეზღუდული შესაძლებლობის მქონე ბავშვებთან.
_ რაც შეეხება ბიუჯეტს, რა თანხა გამოჰყო წელს თბილისის საკრებულომ ბაღებისთვის?
_ 2014 წელს თბილისის ბაგა-ბაღებისკენ მომართულია 79 მილიონი ლარი. თითო ბავშვზე დღეში იხარჯება 5 ლარი, საიდანაც ლარ-ნახევარი არის გამოყოფილი კვებაზე, დანარჩენი თანხა მიდის ინფრასტრუქტურაზე, ხელფასებსა და ა.შ.
