ოფიციალური დოკუმენტების საფუძველზე, ოზურგეთის მუნიციპალიტეტის გამგებლის #133 ბრძანებაში აღნიშნულია, რომ ოზურგეთის მუნიციპალიტეტის გამგეობის თანამდებობის პირებისა და საჯარო მოხელეების მიერ სამსახურებრივი მოვალეობის შესასრულებლად გამოსაყენებელი, მუნიციპალური ან პირად საკუთრებაში არსებული სატრანსპორტო საშუალებების საწვავით უზრუნველყოფა გახორციელდეს "ოზურგეთის მუნიციპალიტეტის 2014 წლის ბიუჯეტის დამტკიცების შესახებ" ოზურგეთის მუნიციპალიტეტის საკრებულოს 2014 წლის 13 აგვისტოს დადგენილებით დამტკიცებული ბიუჯეტის" საქონელისა და მომსახურების" მუხლიდან, შემდეგი ყოველთვიური ლიმიტების ფარგლებში:
მუნიციპალიტეტის გამგებელი _ 800 ლიტრი, გამგებლის პირველი მოადგილე _ 200 ლიტრი, გამგებლის მოადგილეები (სულ სამი მოადგილე) _ 200 ლიტრი, ადმინისტრაციული სამსახურის უფროსი _ 50 ლიტრი, იურიდიული სამსახურის უფროსი _ 100 ლიტრი, საფინანსო-საბიუჯეტო სამსახურის უფროსი _ 90 ლიტრი, ინფრასტრუქტურის, არქიტექტურისა და ქონების მართვის სამსახურის უფროსი _ 250 ლიტრი, ეკონომიკისა და სოფლის მეურნეობის განვითარების სამსახურის უფროსი _ 200 ლიტრი, კულტურის, სპორტისა და ტურიზმის განვითარების სამსახურის უფროსი _ 100 ლიტრი, შიდა აუდიტის სამსახურის უფროსი _ 100 ლიტრი, განათლების, ახალგაზრდობის საქმეთა და სოციალური სამსახურის უფროსი _ 150 ლიტრი, სამხედრო აღრიცხვის, გაწვევისა და მობილიზაციის სამსახურის უფროსი _ 450 ლიტრი, იურიდიული სამსახურის ზედამხედველობის განყოფილების უფროსი _ 150 ლიტრი, საფინანსო-საბიუჯეტო სამსახურის მუნიციპალური შესყიდვების განყოფილების უფროსი _ 80 ლიტრი.
გამგებლის მიერ იქმნება საწვავის ყოველთვიური სარეზერვო ფონდი, რომელიც ხმარდება გაუთვალისწინებელ ღონისძიებებს _ 300 ლიტრის ოდენობით.
აღნიშნულთან დაკავშირებით გამგებლის _ მერაბ ჭანუყვაძის კომენტარი მოგვაწოდა ოზურგეთის მუნიციპალიტეტის გამგეობის საზოგადოებასთან ურთიერთობისა და საინფორმაციო განყოფილების ხელმძღვანელმა ეკატერინე მგელაძემ:
_ მოგეხსნებათ, სოფლებში ბევრი საკითხია მოსაგვარებელი. ტერიტორიულ ერთეულებში 78 ინფრასტრუქტურული პროექტის გახორციელებას ვგეგმავთ. წარმოგიდგენიათ, 28 თემი თავისი 74 განსახლების ადგილით. რამდენჯერ უნდა მივიდნენ იქ ინფრასტრუქტურის სამსახურის წარმომადგენლები?! სამსახურის უფროსებს ბევრი სამოძრაო აქვთ და ყოველთვიურად იმაზე ნაკლებ საწვავს მოიხმარენ, ვიდრე რეალურად არის საჭირო. რაც შეეხება ჩემს წინამორბედს, ისიც ამდენივე საწვავს მოიხმარდა, მატება არ მომხდარა. ამ რაოდენობის საწვავი, სწორედ მძიმე სოციალური ფონის გასაუმჯობესებლად და იმ უამრავი პრობლემის მოსაგვარებლად გვჭირდება, რომელიც მუნიციპალიტეტში არსებობს.
იურისტის, ლევან ალაფიშვილის აზრით, თვითმმართველობებში საწვავისა და მანქანების თემა კომპლექსური პრობლემაა, რომელიც თვითმმართველობის დონეზე ვერ წყდება: “მარტივ მაგალითზე რომ წარმოგიდგინოთ პრობლემა, სამუშაო საათების შემდეგ ან არა სამუშაო დღეებში სად იმყოფება გამგებლის მანქანა? ან სხვა მაღალი თანამდებობის პირები? ხელმძღვანელები თუ მოადგილეები სად არიან? _ გაჩერებული არიან და არ მოძრაობენ? _ პირიქით, მოძრაობენ. ამის შემდეგ ვნახოთ ამ საკითხის პრობლემურობა და კომპლექსურობა როგორია. საგადასახადო კოდექსში არის მუხლი, რომელიც ყველა საჯარო თუ კერძო დაწესებულებას შეეხება _ თუკი დამსაქმებლის ავტომანქანას მოიხმარს არასამუშაო დღეებში და საათებში მისი თანამშრომელი, ან თუნდაც ხელმძღვანელი, ეს უნდა დაუბეგრო. ამ შემთხვევაში როგორ მოიქცევა კომპანიის ხელმძღვანელი? ეს უნდა ხდებოდეს საჯარო სამსახურებშიც. ისინი ხომ ამ მანქანებით სარგებლობენ და ხარჯავენ საწვავს, რომელიც ჩვენი ფულია, ხალხის ბიუჯეტია? ასე რომ, რეალურად აქ უფრო გლობალურზე უნდა გავამახვილოთ ყურადღება. პრობლემა საჯარო სამსახურის მართვის სისტემის მოწესრიგების აუცილებლობაშია. პრემიებს რომ დანამატები დაარქვეს, საბოლოო ჯამში, ეს პატარ-პატარა პრობლემები მოიყრის თავს ერთ ძალიან დიდ პრობლემად. საჭიროა სისტემის გაჯანსაღების დანახვა. ყოველთვის სჯობს პრევენცია, ვიდრე ისეთი შეცდომები დაუშვან, რომლის გამოსწორებაც უკვე გვიანი იქნება", _ აღნიშნავს ალაფიშვილი და დასძენს, რომ საწვავებისა და მანქანების თემა უკვე ძალიან დიდ პრობლემად იქცევა. ყველაზე დიდი პრობლემაა, თუ როგორ ხდება ამ ყველაფრის აღრიცხვა, ეს არის ძალიან მნიშვნელოვანი _ ისხმება თუ არა საწვავი სრულად კონკრეტულად გაპიროვნებული მანქანის ავზში თუ მისი მეგობრის ან ახლობლის მანქანის ავზში მიემართება? ეს კითხვები ლეგიტიმურია და არა მარტო თვითმმართველობებს ეხება, ეს არის კომპლექსური, რომელიც თვითმმართველობის დონეზე ვერ წყდება.
აუცილებელია გაკონტროლდეს არა ის, თუ რამდენ კილომეტრს გადის მანქანა, არამედ, რამდენად მოაგვარა საქმე, სად დადის ეს უნდა აღირიცხოს" _ აღნიშნავს ალაფიშვილი.
