ქალაქ ოზურგეთის მერიის ადმინისტრაციის უფროსად, ხათუნა სიხარულიძე არ დაინიშნება, ეს გადაწყვეტილება დღეს "გურია ნიუსთან" საუბრის დროს ოზურგეთის მერმა, ბეგლარ სიორიძემ დაადასტურა.
_ ხათუნა სიხარულიძის კანდიდატურა იმიტომ შეცვალეთ, რომ ადმინისტრაციის უფროსად სხვა კადრი გვჭირდება. ხათუნა სიხარულიძე მუშაობას იწყებს საფინანსო-საბიუჯეტო სამსახურში და ის ჩვენს გვერდით იქნება.
რაც შეეხება ადმინისტრაციის უფროსს, ეს საკითხი განიხილებოდა და გადაწყვეტილიც იყო, მაგრამ ხათუნამ აირჩია მისი სპეციალობით დაეწყო ქალაქ ოზურგეთის მერიაში მუშაობა.
ის იმუშავებ საფინანსო სამსახურში, სადაც გააკეთებს თავის საქმეს მაღალ დონეზე, რაც შეეხება ადმინისტრაციის უფროსს, აქ სხვა კანდიდატზე არის საუბარი, რომელიც საზოგადოებისთვის მალე გახდება ცნობილი.
_ როგორც "გურია ნიუსისთვის" გახდა ცნობილი, მისი კანდიდატურა იმის გამო არ დამტკიცდა, რომ ხათუნა სიხარულიძე "რესპუბლიკური პარტიის" წევრია. იმასაც ამბობენ, ბოლო დროს "რესპუბლიკელები" მწვავე განცხადებებს აკეთებენ და ამიტომ არ გირჩიეს სიხარულიძის დანიშვნა…
_ "რესპუბლიკური პარტიის" წევრია? არ ვიცოდი ნამდვილად ასე თუ იყო. ამას არანაირი მნიშვნელობა არ ექნებოდა, რომ მცოდნოდა.
