სამხარეო ადმინისტრაციაში, ვაკანტური თანამდებობების დასაკავებლად, განაცხადი 200 კანდიდატმა 28 ვაკანტურ თანამდებობაზე შეიტანა. ამასთან, საკონკურსო-საატესტაციო კომისიის 2014 წლის 31 ივლისის ოქმი N7 თანახმად, კონკურსის გასაუბრების ეტაპზე გადავიდა 174 კანდიდატი, რომელთაგან კონკურსის გასაუბრების ეტაპზე გამოცხადდა 50 ქალი და 49 კაცი, არ გამოცხადდა 43 ქალი და 32 კაცი.
გურიის გუბერნატორის პრესსამსახურის, ნინო ლომჯარიას ინფორმაციით, საკონკურსო-საატესტაციო კომისიამ, "საჯარო სამსახურის შესახებ" საქართველოს კანონის 34-ე მუხლისა და "საჯარო სამსახურის შესახებ საქართველოს კანონით გათვალისწინებული კონკურსის ჩატარების წესის დამტკიცების შესახებ", საქართველოს მთავრობის 2014 წლის 18 ივნისის N412 დადგენილების თანდართული წესის მე-14 მუხლის შესაბამისად, ერთხმად მიიღო გადაწყვეტილება და სახელმწიფო რწმუნებულ-გუბერნატორს, ვაკანტურ თანამდებობაზე დასანიშნად 14 ქალი და 9 კაცი წარედგინა.
"რაც შეეხება, გენდერული ბალანსის დაცვას, გუბერნატორს ამ საკითხზე ფოკუსირება არ მოუხდენია. თუმცა, აღმოჩნდა, რომ წამყვანი თანამდებობები გუბერნიაში ქალბატონებმა დაიკავეს. ეს პროგრესის ნიშანია.
მოტივირებული, შრომისმოყვარე და ნიჭიერი ქალები ახერხებენ წარმატების მიღწევას. კარგია, რომ ამის შესაძლებლობები არსებობს. ყველა კადრი პროფესიონალი და კვალიფიციური, კომპეტენტური კომისიის მიერ არის შერჩეული", _ თქვა ნინო ლომჯარიამ.
