გურიის გუბერნატორს, გიორგი ჩხაიძეს თანამშრომლების შესარჩევად ჩატარებულ კონკურსს უკრიტიკებენ. რამდენიმე კონკურსანტი "გურია ნიუსთან" საუბრისას ამბობს, რომ კონკურსი ობიექტურად არ ჩატარებულა. მათ შორის, არის დავით სიხარულიძეც, რომელსაც თბილისში რამდენიმეწლიანი მოღვაწეობის შემდეგ გურიაში სურდა დაბრუნდება:
_ ვნახე, რომ ვაკანსია იყო გამოცხადებული გურიის რეგიონში და გადავწყვიტე, გურიაში წამოვსულიყავი სამუშაოდ. თანაც, მამა გარდამეცვალა და ვიფიქრე, მოხუც დედას მაინც გავახარებდი. განაცხადი გავაკეთე რეგიონული პროექტების უფროსის და მოადგილის თანამდებობებზე. მშენებლობაში რომ გამოცდილება მაქვს, ამას ჩემი რეზიუმე ადასტურებს. რეკომენდატორები მყავდნენ _ პარლამენტის ორი წევრი ზაქარია ქუცნაშვილი და ბიძინა გუჯაბიძე, ასევე, მუნიციპალური განვითარების ფონდის ანალოგიური სამსახურის უფროსი მერაბ სვანიძე. მომდის პასუხი, რომ ვერ გადავლახე პირველი ეტაპი იმისთვის, რომ კონკურსში მიმეღო მონაწილეობა. საინტერესოა, რა გამოცდილება ან ისეთი განსაკუთრებული განათლება აქვთ ამ თანამდებობაზე დანიშნულ კადრებს. შეიძლება, კონკურსში მონაწილეობის დროს ეთქვათ უარი, მაგრამ ის, რომ ვერ გადავლახე პირველი ეტაპი, გულდასაწყვეტია. დიდი იმედი კი არ მქონდა ამ ვაკანსიების, მაგრამ გურიაში დაბრუნების შანსი იყო და გული დამწყდა, _ ამბობს სიხარულიძე ჩვენთან საუბრისას.
დავით სიხარულიძის ისტორია ჩვენი მკითხველისთვის კარგად არის ცნობილი. გამოცდილ მშენებელს, "ნაციონალური მოძრაობის" მმართველობის დროს, ციხეში 6 წლის გატარება მოუწია.
ამ დროის განმავლობაში მას ბრალი არ უღიარებია. ციხეში ყოფნის პერიოდში სიხარულიძემ რამდენიმე სარჩელი შეიტანა და სახელმწიფოსგან სასამართლოზე აღიარებული და დოკუმენტურად დადასტურებული ვალი მოითხოვა. "გურია ნიუსმა", ჯერ კიდევ სიხარულიძის პატიმრობაში ყოფნისას, ამ ფაქტის შესახებ, რამდენიმე ჟურნალისტური მოკვლევა გამოაქვეყნა.
სიხარულიძის შესახებ სტატია მისი ციხიდან გამოსვლის შემდეგაც მომზადდა.
მაშინ, როგორც პროკურატურის წარმომადგენლები, ასევე, საქმეში მონაწილე პირები აღიარებდნენ, რომ ჩვენი რესპონდენტი 6 წლის განმავლობაში ციხეში უკანონოდ იჯდა. აღიარებდნენ იმასაც, რომ პროფესიონალ მშენებელს, მშენებლობის დროს ხარვეზი არ ჰქონია, თუმცა, საქმე ამ საგაზეთო აღიარებების გარდა, წინ არაფრით წაწეულა. სიხარულიძე, რომელიც ახლა სამსახურის ძებნაშია, პარალელურად სახელმწიფოსგან კუთვნილი თანხის მიღებას ცდილობს.
გურიის გუბერნატორის, გიორგი ჩხაიძის თქმით, დავით სიხარულიძისთვის კონკურსის პირველ ეტაპზე უარის თქმა იმან განაპირობა, რომ მას მოთხოვნილი დოკუმენტაცია სრულყოფილად არ ჰქონდა წარმოდგენილი.
_ სახელმწიფო რწმუნებულის-გუბერნატორის ადმინისტრაციაში კონკურსის წესით შესავსებ თანამდებობებზე საქართველოს მთავრობას 2014 წლის 13 თებერვლის N143 დადგენილებით დამტკიცებული აქვს გუბერნატორის ადმინისტრაციის საჯარო მოსამსახურეთა საკვალიფიკაციო მონაცემები, რომლის მიხედვითაც, სამსახურის უფროსსა და სამსახურის უფროსის მოადგილეს ესაჭიროება უმაღლესი განათლებისა და სამუშაო გამოცდილების დამადასტურებელი დოკუმენტები. ვაკანსიაზე არსებული მოთხოვნების გათვალისწინებით, განცხადებების გადარჩევის ეტაპზე, აღნიშნული პიროვნების მიერ წარმოდგენილი დოკუმენტაცია არ იყო სრულყოფილი (არ იყო ატვირთული სამუშაო გამოცდილების დამადასტურებელი დოკუმენტაცია) საკონკურსო-საატესტაციო კომისიის გადაწყვეტილებით ყველა აპლიკანტს, ვისაც ჰქონდა ერთი ხარვეზი, მიეცა დამატებითი ვადა 2 (ორი) სამუშაო დღის ოდენობით ხარვეზის აღმოსაფხვრელად. აღნიშნულის გათვალისწინებით, ყოველ მათგანს საჯარო სამსახურის ბიუროს ვებგვერდის საშუალებით (HR.GOV.GE) დაეგზავნა შეტყობინებები, რომელშიც მიეთითა, თუ რა ხარვეზი იყო აღმოჩენილი და მიეცათ 2-დღიანი ვადა დოკუმენტაციის სრულყოფისთვის. აღნიშნული შეტყობინებები აპლიკანტებს ვებგვერდის ავტომატური ფუნქციების შესაბამისად, დაეგზავნა რეზიუმეში მითითებულ ელექტრონულ ფოსტასა და მათ ინდივიდუალურ HR.GOV.GE ვებგვერდზე. თუმცა, ბატონ დავითს ეს არ გაუკეთებია. ადამიანს, რომელსაც პრეტენზია აქვს მაღალ საჯარო თანამდებობაზე, მინიმუმ, სათანადო დოკუმენტაციის სრულყოფილად მომზადება უნდა შეეძლოს, _ ამბობს ჩხაიძე.
ამ ინფორმაცის კატეგორიულად უარყოფს დავით სიხარულიძე:
_ ეს ტყუილია, არავითარი დოკუმენტის წარმოდგენა არ მოუთხოვიათ. მე ანალოგიურ ვაკანსიაზე წარდგენილი მქონდა ეკონომიკის სამინისტროში განაცხადი, თანაც განსაკუთრებული მნიშვნელობის ობიექტების ხელმძღვანელის თანამდებობაზე, იქ გადავლახე და რა ისეთი მოთხოვნა ჰქონდა გურიის გუბერნატორს, რომ ვერ ვაკმაყოფილებდი?! ეს არის, როგორც ყველგან, შემოგდებული აფიორა. საინტერესოა, რა კრიტერიუმებით შეირჩა დანიშნული კადრი, თუ არის მინიმალური კვალიფიკაციის მაინც და რა გამოცდილება აქვს. თუმცა, აზრი არ აქვს _ ასე ხდებოდა და ასე იქნება ყოველთვის, _ ამბობს სიხარულიძე.
მისივე თქმით, გუბერნიიდან მას ერთადერთხელ დაურეკეს და შრომის წიგნაკის წარმოდგენა მოსთხოვეს:
_ ახალგაზრდა გოგონამ დამირეკა და მითხრა, რომ ხარვეზი დამიდგინა, რომ მაილზე გამომიგზავნეს წერილი, სადაც მოითხოვდნენ ორი დღის განმავლობაში წარმომედგინა შრომის წიგნაკის ამონაწერი. სპეციალურად მივედი სახლში, შევამოწმე მეილი, მაგრამ ანალოგიური არაფერი იყო. დავურეკე ისევ იმ გოგონას და ვუთხარი, რომ არაფერი იყო მოსული. გამოვაგზავნეთო, _ მიმტკიცებდა. ალბათ, ცრუობენ". ეგ არაფერია, მაგრამ ტყუილებს ნუ ლაპარაკობენ მაინც, _ ამბობს ჩვენთან საუბრისას სიხარულიძე.
"გურია ნიუსი" შეეცადა იმ ადამიანების სამუშაო გამოცდილების შესახებ მოეპოვებინა ინფორმაცია, რომლებმაც გუბერნიაში ჩატარებული კონკურსის შედეგად რეგიონული პროექტების კოორდინირების სამსახურის უფროსის (ანა ჩუბინიძე) და მოადგილის (კახაბერ ტოტოჩავა) თანამდებობები დაიკავეს.
გურიის გუბერნატორის პრესსამსახურის ხელმძღვანელის, ნინო ლომჯარიას მიერ მოწოდებული პასუხიდან ირკვევა, რომ ჩუბინიძის და ტოტოჩავას სამუშაო გამოცდილების შესახებ არსებული ინფორმაცია პერსონალურია და ვერ მოგვაწვდიან:
_ როგორც მითხრეს, ეს პერსონალური ინფორმაციაა და ამისთვის წერილობით უნდა მოგვმართოთ. მოგაწვდიან იმ შემთხვევაში, თუ თავად ამ ადამიანების თანხმობა იქნება, _ გვითხრა ლომჯარიამ.
გუბერნიაში არავის აქვს პასუხი კითხვაზე _ როდიდან განეკუთვნება თანამდებობის პირის სამუშაო გამოცდილების შესახებ არსებული ინფორმაცია პირად საიდუმლოებას; მხოლოდ იმას ამბობენ, რომ ასეთია იურისტების განმარტება. თუმცა, ამ განმარტების მიმცემი იურისტების ვინაობას არ ასაჯაროებენ.
აღსანიშნავია ისიც, რომ ანი ჩუბინიძე, რომელსაც სამუშაო გამოცდილების გასაჯაროება არ სურს, გუბერნიაში წლების განმავლობაში მუშაობდა. ცოტა ხანი აღსრულების ეროვნული ბიუროს ჩოხატაურის განყოფილებაშიც იმუშავა და შემდეგ ისევ გუბერნიას დაუბრუნდა.
როგორც ჩანს, გუბერნიის თანამშრომლებისთვის, რომელთა შესახებ ინფორმაცია, როგორც წესი, ვებგვერდზე უნდა იყოს განთავსებული, სულ სხვა წესებია. წესები, რომლებიც ინკოგნიტო იურისტების განმარტებით, ახლახან კანონით გამყარდა. თუმცა, იურისტების ვინაობის მსგავსად, გუბერნიაში ამ კანონსაც არ ან ვერ აკონკრეტებენ.
არადა, კანონში გარკვევით წერია, რომ "პირად საიდუმლოებას მიეკუთვნება ინფორმაცია, რომელიც დაკავშირებულია პირის ჯანმრთელობასთან, ფინანსებთან და სხვა კერძო საკითხებთან".
"გურია ნიუსი" ამ თემას ისევ დაუბრუნდება.
