პარლამენტი, იუსტიციის სამინისტროს ინიციატივით, აგრესიის დეფინიციის შემუშავებას იწყებს და განსაზღვრავს რეჟიმს, რომლის ფარგლებშიც სასამართლოს მიენიჭება უფლებამოსილება, გაავრცელოს თავისი უფლებამოსილება აგრესიის დანაშაულზე. სისხლის სამართლის საპროცესო კოდექსში შესატანი ცვლილებები დღეს საგარეო ურთიერთობათა და ევროპასთან ინტეგრაციის კომიტეტების ერთობლივ სხდომაზე განიხილეს.
იუსტიციის მინისტრის, ალექსანდრე ბარამიძის ინფორმაციით, 2010 წლის ივნისში უგანდაში გამართულ კონფერენციაზე მიღწეულ იქნა შეთანხმება, რომის წესდებაში ცვლილებების შეტანის შესახებ, მისივე განცხადებით, "აგრესიის აქტი“ განიმარტება, როგორც სახელმწიფოს მიერ შეიარაღებული ძალის გამოყენება სხვა სახელმწიფოს სუვერენიტეტის, ტერიტორიული მთლიანობის ან პოლიტიკური დამოუკიდებლობის წინააღმდეგ ან სხვაგვარად, რაც ეწინააღმდეგება გაეროს წესდებას.
_ ცვლილებებით, პირს სისხლისსამართლებრივი პასუხისმგებლობა დაეკისრება ისეთი აგრესიის აქტის დაგეგმვის, მომზადების, დაწყების ან წარმოებისთვის, რომელიც თავისი სიმძიმით გაეროს წესდებას არღვევს. ამასთანავე, შემუშავებული ცვლილებებით, სისხლისსამართლებრივი პასუხისმგებლობა შეიძლება დაეკისროს მხოლოდ იმ პირს, რომელსაც გააჩნია სახელმწიფოს პოლიტიკური ან სამხედრო მოქმედებების ეფექტური კონტროლის ან ხელმძღვანელობის შესაძლებლობა,– განმარტა ალექსანდრე ბარამიძემ.
დღესვე კომიტეტებმა ერთობლივ სხდომაზე განიხილეს "საერთაშორისო დავების მშვიდობიანი გადაწყვეტის შესახებ“ 1907 წლის კონვენცია “ . 1994 წლიდან ჰააგის მუდმივმოქმედ საარბიტრაჟო სასამართლოსთან არსებობს ფინანსური დახმარების ფონდი, რომელიც მიზნად ისახავს დაეხმაროს განვითარებად საარბიტრაჟო ხარჯების დაფარვაში. როგორც სხდომაზე აღინიშნა, ეს არის ერთადერთი ფონდი, რომელიც საარბიტრაჟო დავებში სახელმწიფოთა მიერ გასაღებ ხარჯებს აფინანსებს. შესაბამისად, საქართველოსთვის მნიშვნელოვანია წინამდებარე კონვენციასთან მიერთება.
ალექსანდრე ბარამიძის განცხადებით, კონვენციასთან შეერთება არ იწვევს საქართველოში საკანონმდებლო ცვლილებებს. მისივე თქმით, 1907 წლის კონვენციასთან შეერთებით საქართველოში შემოდის კიდევ ერთი საერთაშორისო მექანიზმი, დავების გადაწყვეტის ალტერნატიული საშუალება, რომელიც სახელმწიფოთა შორის დავების მშვიდობიან მოგვარებას ემსახურება.
პარლამენტის პრესსამსახურის ინფორმაციით, კონვენციასთან შეერთების შედეგად საქართველოს მოუწევს ყოველწლიური საწევრო შენატანის გადახდა – წელიწადში დაახლოებით 536 ევრო.
დღესვე განიხილეს ასევე "2014 წლის 18 აგვისტოს ხელმოწერილ საქართველოსა და რეკონსტრუქციისა და განვითარების საერთაშორისო ბანკს (IBRD) შორის სასესხო ხელშეკრულება”. როგორც სხდომაზე აღინიშნა, სასესხო ხელშეკრულების მიზანია 2015-1017 წლებში მუნიციპალური ინფრასტრუქტურისა და მომსახურების გაუმჯობესება და ადგილობრივი თვითმმართველობების დონეზე ინსტიტუციონალური განვითარება .
