ჩინეთში საქართველოს ყოფილი ელჩი მამუკა გამყრელიძე, რომელიც საზოგადოებამ გადაცემიდან "ვის უნდა 20 000?" გაიცნო, საქართველოს მოქალაქეებს ყოფილი პირველი ლედის, სანდრა რულოვსის დაყადაღებული ბინის შესყიდვისკენ მოუწოდებს.
"დღეს ბატონ დავით ნარმანიას უთქვამს, რომ მიხეილ სააკაშვილის დაყადაღებული ქონება გაიყიდება, ფული კი ბიუჯეტს გადაეცემა. დიდებული გადაწყვეტილებაა გარღვეული ბიუჯეტის შესავსებად,
მე მინდა საქართველოს ყველა იმ მოქალაქეს, რომელსაც თავმოყვარეობა ბოლომდე არ დაუკარგავს, ღირსებაც და ადამიანობაც შეგვრჩენია, გთხოვოთ, შევაგროვოთ ფული და ვიყიდოთ სანდრა რულოვსის კუთვნილი ბინა. ნუ მოვიჭრით თავს საბოლოოდ. არ აქვს მნიშვნელობა ენმ-ს მხარდამჭერები ხართ თუ უბრალოდ ღირსეული ადამიანები.
ყველამ ცოტ-ცოტა რომ გავიღოთ, დარწმუნებული ვარ საჭირო თანხას თავს მოვუყრით. სანდრა ქართველებისაგან არ იმსახურებს სახლიდან გამოძევებას!!! ნუ დავიმცირებთ თავს ასე!!!
ენმ-ს ახლად არჩეულ აღმასრულებელ მდივანს, ზურაბ ჯაფარიძეს ვთხოვ მოახდინოს ამ პროცესის ორგანიზება. დარწმუნებული ვარ ბევრნი ვიქნებით. პირველი მე ვარ მზად ჩემი წვლილი შევიტანო ამ საქმეში. მოდით ყველამ ერთად ჩვენს რძალს ბინა დავუბრუნოთ", _ წერს გამრელიძე "ფეისბუქის" გვერდზე.
საქმე იმაშია, რომ სანდრა რულოვსის თქმით, ბინა, რომელიც მას დაუყადაღეს მამის ნაჩუქარია.
"დაყადაღებული ბინა, რომელშიც ჩვენ პრეზიდენტობამდე ვცხოვრობდით, მამაჩემის ნაჩუქარია მაშინ, როცა მიშაზე გავთხოვდი. ეს არის მამაჩემის გულით და სულით ნაჩუქარი ბინა, იმისთვის რომ ახალ წყვილს არ ჰქონოდა პრობლემები თბილისში", _ ამის შესახებ საქართველოს ყოფილმა პირველმა ლედიმ "რუსთავი 2"-ის ეთერში განაცხადა.
შეგახსენებთ, 19 სექტემბერს მიხეილ სააკაშვილის და მისი ოჯახის წევრების ქონება დაყადაღებულად გამოცხადდა. დაყადაღებულ ქონებას შორის არის ექს-პრეზიდენტის კუთვნილი ყვარლის სახლი, სანდრა რულოვსის ბინა, სააკაშვილის ბებიის მიწის ნაკვეთები და დედის ავტომანქანა.
