"მეტრომშენის" წარმომადგენლები, რომლებსაც ბინები სახელმწიფომ მრავალწლიანი მუშაობის შემდეგ გადასცა, საკუთარ სახლებში შესვლას ვერ ახერხებენ.
თბილისის ზღვის უბნის 204-ე, 205-ე, 225-ე და 226-ე კორპუსებში ბინის ფლობის ორდერები მათ სასამართლომაც დაუმტკიცა, თუმცა იქ სხვა ადამიანების "შეჭრის" გამო, საცხოვრებლად ვეღარ შედიან.
"მეტრომშენის" წარმომადგენლებმა ნაძალადევის გამგეობასთან 18 სექტემბერს აქციაც გამართეს და ხელისუფლებისგან დახმარება მოითხოვეს. აქციის მონაწილეებმა ნაძალადევის მაჟორიტარი დეპუტატი თამარ კორძაია უყურადღებობაში დაადანაშაულეს.
"გურია ნიუსმა" ნაძალადევის მაჟორიტარს პარლამენტში აღნიშნულთან დაკავშირებით კომენტარის გაკეთება სთხოვა:
"მე შევხვდი ამ ხალხს ადრე. მე ასევე შევხვდი მეორე მხარეს, რომელიც იქ ცხოვრობს. შემდეგ გაირკვა, რომ საქმე სასამართლოს განხილვაშია. ამიტომ ავუხსენი, რომ მე არ მაქვს უფლება, საქმე როცა სასამართლოშია, ჩავერიო. ეს – ერთი, მეორე – ამ ბინების გადაცემას ახდენს გამგეობა. პარლამენტის წევრის ერთადერთი უფლებამოსილებაა, გამგეობას გადასცეს ამ ადამიანების წუხილი.
შესაბამისად, ამ საკითხზე ვისაუბრეთ მე და ახალმა გამგებელმა ზაზა გაბუნიამ და შეიქმნა სამუშაო ჯგუფი, რომელშიც არის ჩემი წარმომადგენელი ბიუროდან, ამიტომ მცდარია ამ მოქალაქეების განცხადება, რომ ყურადღებას არ ვაქცევ, მაგრამ პრობლემა იმაშია, რომ დაპირისპირებული მხარეები ცალსახად ითხოვენ ჩემგან მხარდაჭერას და ორივე მხარეს ერთდროულად ვერ დავუჭერ მხარს.
ალბათ, უახლოეს მომავალში გადაწყდება ეს საკითხები, თუმცა ამ პროცესში რომელიმე მხარე მაინც დარჩება უკმაყოფილო, სამწუხაროდ", _ განაცხადა თამარ კორძაიამ.
"მეტრომშენის" წარმომადგენლები დიღომში თბილისის მთავრ სამმართველოში გამომძიებელ ირაკლი კალანდიას შეხვდნენ და როგორც თავად აღნიშნეს, მისგან დაპირებაც მიიღეს, რომ გამოსახლების პროცესი 23-24 ოქტომბერს დაიწყება:
"კალანდიამ გვითხრა, რომ გამოსახლების საკითხი მას ევალება და სამშაბათიდან, ან ოთხშაბათიდან ეტაპობრივად დაიწყებს ზღვის უბნის 4 კორპუსში უკანონოდ შესულების გამოსახლებას, რომლის შემდეგაც ჩვენ შევძლებთ საკუთარ სახლებში შესვლას", _ განუცხადა "გურია ნიუსს" ერთ-ერთმა მესაკუთრემ.
ჩვენ თბილისის მთავარი სამმართველოს უბნის ინსპექტორების სამმართველოს უფროსს ელგუჯა ჯღარკავას დავუკავშირდით, რომელიც აღსრულების პროცესს უწევს მეთვალყურეობას.
"დაახლოებით ასამდე ადამიანის განცხადებაა ლოტკინის პოლიციაში შესული. ჩვენ ზედამხედველობას ვუწევთ, როგორ წარიმართება პროცესი. რომელ ინსპექტორსაც აწერია ეგ საქმე ლოტკინის პოლიციაში, ჩაინიშნება დღე და ის დაიწყებს გამოსახლებას. სხვაგვარად, პირდაპირ ვერ შევლენ ბინებში მესაკუთრეები. მესაკუთრეებმა გამგეობასთან ვერ მოილაპარაკეს და ახლა ჩვეულებრივად ჩატარდება გამოსახლება. იმ ადამიანებთანაც იქნება მოლაპარაკებები, ვინც უკვე სარგებლობს იმ ბინებით. ისინიც სხვაგან გადასაყვანები არიან. ასე რომ ქუჩაში არავის დატოვებენ. მე ვერავის ვერაფერს შევპირდები. კანონი რასაც მავალდებულებს, იმას აღვასრულებ", _ აღნიშნა ელგუჯა ჯღარკავამ.
