ჩოხატაურის ანსამბლ "ამაღლების" ლიტვაში გასტროლის შესახებ ჩვენზე მეტს სოციალური ქსელი გიამბობთ _ პოლონეთის, გერმანიის, ნორვეგიის, ლიტვის თანამდებობის პირების ფეისბუქ გვერდებზე ანსამბლის ფოტო და ვიდეო ბევრია.
"ჩვენ გვიყვარს საქართველო! ნახეთ ეს საოცრება, კარგად მოუსმინეთ, ესენი ქართველები არიან, ჩოხატაურიდან!" _ ამ წარწერებით ინტერნეტსივრცეში ანსამბლის და ჩოხატაურის დელეგაციის ლიტვაში ვიზიტის ამსახველი ბევრი მასალაა.
ლიტვის რეგიონული გამოცემის პირველი გვერდი მკითხველს ჩოხატაურელი ბიჭების და ქართული დელეგაციის ტრიუმფზე ვრცლად უამბობს.
ანსამბლ "ამაღლების" წევრები ლაშა ცინცაძე, გიორგი რამიშვილი, დემური ბარამიძე, ბაკა მეგრელიშვილი, ზაზა ორბელაძე და ვაჟა სიხარულიძე _ ეს ის ადამიანები არიან, რომლებმაც ჩოხატაურის სახელი უამრავ უცხოელს კარგად დაამახსოვრეს.
კულტურის ცენტრთან არსებული ანსამბლის (ხელმძღვანელი ლალი კორიფაძე) ლიტვაში წაყვანა ჩოხატაურის მუნიციპალიტეტის საკრებულოს თავმჯდომარის, ზაალ მამალაძის იდეა იყო.
"ჩემი სახლი _ პასვალისის რეგიონი,” _ ასე ერქვა ფესტივალს, რომელშიც ჩოხატაურის დელეგაციამ მიიღო მონაწილეობა. "ამაღლების" სცენაზე გასვლა კი ჩოხატაურის მუნიციპალიტეტსა და ლიტვის ქალაქ პასვალისს ხუთწლიანი მეგობრობის დასტურად ის სიურპრიზი და საჩუქარი იყო, რომელიც ჩვენებურების კონცერტის დაწყებამდე ზაალ მამალაძემ სცენაზე დაანონსა.
_ ანსამბლმა "ამაღლება” ფურორი მოახდინა _ "სულიკო” და ლიტვური ხალხური სიმღერა მაყურებელთან ერთად შესრულდა. განსაკუთრებული ოვაცია დაიმსახურა "კრიმანჭულმა.” ჩვენმა ბიჭებმა ფესტივალზე შვიდი სიმღერა შეასრულეს. თითოეულ მათგანს წინ უძღოდა მისი ისტორია, რასაც დიდი ინტერესით ისმენდნენ. გავკადნიერდები და ვიტყვი, რომ ფესტივალში მონაწილეებს შორის, ჩვენი ანსამბლი ერთ-ერთი საუკეთესო იყო. ანსამბლის წევრები ქუჩაში ჩოხებით დადიოდნენ, რაც ლიტველებისა და სხვა უცხოელების დიდ აღფრთოვანებას იწვევდა. ყველანი გვეკითხებოდნენ, თუ სად მდებარეობდა ჩოხატაური, დაინტერესებული იყვნენ ჩვენი გეოგრაფიული მდებარეობით, საერთოდ ჩვენი ისტორიით. ძალიან ბევრმა გამოთქვა სურვილი, რომ ჩოხატაურში ჩამოვიდნენ და უფრო საფუძვლიანად გაეცნონ გურულ ფოლკლორს, ჩვენს კულტურას.
ჩვენ ასევე ვიყავით პასვალისის რამდენიმე სოფელში, სადაც სახალხო ზეიმებში მივიღეთ მონაწილეობა. "ამაღლების” მიერ შესრულებული სიმღერები, იქნებოდა ეს თვითმფრინავში, ქუჩაში, შეხვედრებზე თუ სცენაზე, ყველგან მქუხარე აპლოდისმენტებს იმსახურებდა. უამრავი ადამიანი თხოვდა ბიჭებთან ერთად გადაეღოთ სამახსოვრო ფოტოები, მათ სიმღერებს იღებდნენ ვიდეოკამერებით და სოციალური ქსელებით ავრცელებდნენ გურულ ფოლკლორს. სასიხარულოა ის ფაქტიც, რომ ფესტივალის შემდეგ, "ამაღლება” მიწვეულ იქნა ნორვეგიაში, საფრანგეთსა და გერმანიაში. დიდი მადლიერება გვინდა გამოვთქვათ ქალაქის მერის გინტაუტას გიაგუჟინსკასადმი და მისი მოადგილის პოვილას ბალჩიუნასადმი, რომლებმაც საუკეთესოდ გვიმასპინძლეს. პასვალისსა და ჩოხატაურს შორის კვლავ დაიგეგმა საინტერესო პროექტები, რაც მიმართული იქნება ჩოხატაურის სამომავლო განვითარებისთვის, _ აღნიშნა მამალაძემ ჩვენთან საუბრისას.
ჩოხატაურის დელეგაციაში მუნიციპალიტეტის გამგებლის პირველი მოადგილე თამაზ ჯინჭარაძე, ქართული "ოცნების"" ფრაქციის თავმჯდომარე ზვიად მამალაძე და ტექნიკური მენეჯერი გივი ანთიძე იმყოფებოდნენ.
"გურია ნიუსი” კიდევ ერთხელ ულოცავს ანსამბლ "ამაღლებას” და მის ხელმძღვანელს ლალი კორიფაძეს ამ წარმატებას და მრავალ შემოქმედებით მიღწევებს უსურვებს!
