ლანჩხუთის მუნიციპალიტეტის გამგეობაში რეორგანიზაციის შედეგად სამი სამსახურის: სოციალური დაცვის, განათლების, კულტურის, ძეგლთა დაცვისა და ტურიზმის, სპორტისა და ახალგაზრდულ საქმეთა სამსახურების შერწყმის შედეგად ერთი შეიქმნა, რომელშიც შესაბამისად სამი განყოფილება შევა.
ჩვენი წყაროს ინფორმაციით, სამსახურის უფროსობა მარინა კეიდიას ჩააბარეს, რომელიც მანამდე სოციალურ სამსახურს ხელმძღვანელობდა. სხვათა შორის, ქალბატონი მარინა მეოთხე სამსახურის უფროსია, ვინაც თანამდებობა შეინარჩუნა. ცნობისთვის, მანამდე ბრძანებები დაიწერა შოთა ჩაგუნავას (იურიდიული სამსახური), როლანდ ლაშხიას (საფინანსო, საბიუჯეტო და მუნიციპალური შესყიდვები) და დათო პატარაიას (სამხედრო აღრიცხვის, გაწვევისა და მობილიზაციის სამსახური) დანიშვნაზე.
ახლადშექმნილ სამსახურში განათლების, კულტურის, ძეგლთა დაცვისა და ტურიზმის განყოფილებას ქეთი ებრალიძე უხელმძღვანელებს. სპორტისა და ახალგაზრდულ საქმეთა განყოფილებას _ სოფიო ჩხაიძე, რომელიც მანამდე გამგეობაში ამავე სფეროს ხელმძღვანელობდა. ვეტერანთა განყოფილებას ისევ შოთა ფირცხალაიშვილი უთავკაცებს.
ადგილობრივი გამგეობის კადრების ხელმძღვანელის, ლევან ჩხაიძის თქმით, კანონში შესული ცვლილების თანახმად, მათ არ აქვთ უფლება საჯარო გახადონ "პირადი საიდუმლოების შემცველი ინფორმაცია", ამიტომაც ოფიციალურად ვერ დაგვიკონკრეტა, თუ ვინ დაინიშნა შესაბამის თანამდებობეზე და ვინ გათავისუფლდა. ასევე კანონში შესული ცვლილების თანახმად, პირად საიდუმლოებას წარმოადგენს საჯარო მოხელეთა ტელეფონის ნომრები. არადა, მათ ტელეფონის ხარჯებს ბიუჯეტი ანაზღაურებს, ასევე უმეტესი მათგანის მობილური აპარატები სწორედ ბიუჯეტის სახსრებითაა შეძენილი.
ჩვენივე ინფორმაციით, თანამდებობების დატოვება მოუხდა შესყიდვების სპეციალისტს კობა ჯორბენაძეს, რომელიც თემურ ასკურავამ ჩაანაცვლა. ასევე თანამდებობები დატოვეს: ირმა მგელაძემ, იგი განათლების, კულტურის, ძეგლთა დაცვისა და ტურიზმის სამსახურს ედგა სათავეში, და ამავე სამსახურის მთავარმა სპეციალისტმა თათია გოგიბერიძემ. სპორტისა და ახალგაზრდულ საქმეთა სამსახურიდან კი ბიჭიკო მშვიდობაძე და ალექსანდრე იმნაიშვილი გათავისუფლდნენ. უადგილოდ დარჩა მეგი იმნაძეც _ იგი გამგებლის თანაშემწის მოვალეობას ასრულებდა.
