ქალაქ ოზურგეთის მერმა, ბეგლარ სიორიძემ მედიის წარმომადგენლებისთვის ბრიფინგი გამართა.
"დღეს დილიდან, ქალაქის ყველა კრიზისული ქუჩა, კრიზისული უბანი შემოვიარეთ. ადგილზე დავათვალიერეთ მოქალაქეთა დატბორილი სახლები, როგორც ხედავთ წვიმა გრძელდება, ამიტომაც საგანგებო სიტუაციაში მუშაობას, რა თქმა უნდა კვლავაც განვაგრძობთ.
რამდენიმე წუთის წინ, მოვიწვიე ეკონომიკური განვითარების, ქონების მართვის, ინფრასტრუქტურის, ტრანსპორტისა და კეთილმოწყობის ; სივრცითი მოწყობის, არქიტექტურის, ურბანული განვითარების, ასევე, საზოგადოებრივი ურთიერთობისა და საინფორმაციო განყოფილების სამსახურების სრული შემადგენლობა. მომხდარი სტიქიის შედეგების შესწავლისა და სალიკვიდაციო ღონისძიებების განხორციელების მიზნით", _ თქვა ბეგლარ სიორიძემ.
მისივე თქმით, ქალაქის ქუჩებში, ამ დროისთვის არ დგას წყალი.
"როგორც კი დაიწია მდინარის დონემ, არხებმა დაიწყო მუშაობა. ამიტომაც, კარგად არის გამოსაკვლევი, თუ რა პრევენციული ღონისძიებების გატარებაა სასწრაფოდ აუცილებელი, რომ მოსახლეობა, როგორმე დავიცვათ მძიმე შედეგებისაგან. დღის ბოლომდე შეიქმნება არსებული მდგომარეობის ამსახველი ზოგადი სურათი, ხვალიდან კი ჯგუფებად გადანაწილებული მერიის შესაბამისი სამსახურის თანამშრომლები დეტალურად დაითვლიან და აღრიცხავენ თუ რა ზარალი მიადგა თითოეულ მოსახლეს.
დატბორილია მოსახლეობის საცხოვრებელი სახლები, ეზოებით, ასევე "ენერგო პრო ჯორჯიას" საოფისე შენობა. განსაკუთრებით მძიმე მდგომარეობაა აღმაშენებლის, თავისუფლების, გრიშაშვილის, თაყაიშვილის, მოსკოვის, გმირთა მოედნის, ბაქრაძის, ქუთაისის, გრიბოედოვის, ჯავახიშვილის, გაგარინის, დოლიძის, მეგრელაძის, გურამიშვილის, ერისთავის და სახოკიას ქუჩებზე.
ოზურგეში საგანგებო ვიზიტით იმყოფებოდნენ რეგიონალური განვითარებისა და ინფრასტრუქტურის მინისტრი დავით შავლიაშვილი, საქართველოს საავტომობილო გზების დეპარტამენტის უფროსი ვაჟა ფანჩულიძე, სახელმწიფო უსაფრთხოებისა და კრიზისების მართვის საბჭოს ხელმძღვანელი მინდია ჯანელიძე. მათ, ჩვენთან ერთად, ადგილზე მოინახულეს ქალაქის დატბორილი უბანი. ასევე მერიაში გვყავს მოსახლეობასთან საკონტაქტო პირი ანი მდინარაძე ( 558 20 91 91)", _ გვითხრა ბეგლარ სიორიძემ.
ბრიფინგის დასასრულს ბეგლარ სიორიძემ "გურია ნიუსის" კითხვას უპასუხა.
_ ბატონო ბეგლარ, დღეს დაგვიკავშირდა ქალაქ ოზურგეთის, მოსკოვის ქუჩის მცხოვრები მარინა გოგიბერიძე. მას რამდენიმე დღის წინ მოტანილი შეშა, ადიდებულმა მდინარემ წაიღო. როგორ მოხდება დახმარება?
_ როგორც ვთქვი, ზარალის დათვლა ხვალიდან დაიწყება და არავინ არ დარჩება უყურადღებოდა.
