არასამთავრობო ორგანიზაციის, "ქალები რეგიონის განვითარებისთვის" თავმჯდომარე, ქეთევან ხიდაშელი, გუშინ, ოზურგეთის მუნიციპალიტეტში მომხდარი ახალგაზრდა ქალბატონის მკვლელობასთან დაკავშირებით ინტერნეტში შემდეგი სახის ინფორმაციას ავრცელებს, რომელსაც "გურია ნიუსი" უცვლელად გთავაზობთ.
ოზურგეთის მუნიციპალიტეტში ოჯახში ძალადობის ნიადაგზე დატრიალებული ტრაგედიის პრეისტორია – ამონარიდი ანგარიშიდან „უმწეო ოჯახების კვლევა ს. დვაბზუში"
"მ. რ-2009 წელი.-57 წლის, ყავს ერთი შვილი 35 წლის, რძალი და შვილიშვილი 8 თვის, ოჯახი განიცდის უკიდურეს გაჭირვებას, ქალბატონი მუშაობდა მძემე სამუშაოებზე, იქამდე ცემენტსა და ქვიშასაც კი ეზიდებოდა, რის შედეგადაც დაუზიანდა ჯანმრთელობა, დღეისათვის არიან მეზობლების კმაყოფაზე, ქ-ნ მერის ესაჭიროება სასწრაფო ოპერაცია , ამოსაკვეთი აქვს საშვილოსნო, მისი მუშაობა ამჯამად სიკვდილის ტოლფასია, გაუკეთეს იაფი დაზღვევა, შეიყვანეს შეცდომაში და გამოსძალეს ის უკანასკნელი 20 ლარი. აღმოჩნდა, რომ მისი ოპერაცია ამ დაზღვევით არ ფინანსდება, ქ-ნი სასოწარკვეთილია. აი მისი საცხოვრებელი სახლი. ერთი წლის წინ რძალი და ბავშვის გადასარჩენად მან ეზოს ღობე შემოხსნა და გაყიდა იმისათვის, რომ რძლის ოპერაციის ხარჯები დაეფარა, ახლა კი მას სჭირდება ოპერაცია , გასაყიდი აღარაფერი გააჩნიათ. მასთან იყვნენ სოც. აგენტები, გადაამოწმეს მისი მდგომარეობა, ქ-ნმა მათ უთხრა, რომ მეზობელმა აჩუქა მობილური ტელეფონი ძველი მოდელი, რომლის ღირებულებაა 15 ლარი, გატეხილი ეკრანით . მას ხშირად ესაჭიროება სასწრაფო დახმარება, რისთვისაც ეს მობილური მეზობლებმა აჩუქეს, ეს გახდა მიზეზი იმისათვის, რომ სოციალური დახმარება არ მიეცათ მისთვის. მერი სანამ ავად გახდებოდა ასე თუ ისე ოჯახს ინახავდა, ახლა კი ფაქტიურად სახლიდან ვერ გადის, აქვს სიცხეები და საჭიროებს სასწრაფო ოპერაციას."
ეს ამბავი 5 წლის წინანდელი ჩაწერილია, ამ ოჯახის მდგომარეობა მინიმალურადაც არ გაუმჯობესებულა.
დღეს კი დატრიალდა ტრაგედია. მ.-ს ვაჟმა თ.რ-მ ნაჯახით ბავშვების თვალწინ მოკლა მეუღლე, შემდეგ კი გვამი ოთახში შეათრია, ბენზინი გადაასხა და სახლთან ერთად დაწვა.
დამნაშავემ დანაშაული მშვიდად აღიარა, გაქცევაც კი არ უცდია ისე ჩაბარდა პოლიციას.
მკვლელი ამბობს , რომ დანაშაული ეჭვიანობის ნიადაგზე ჩაიდინა. „რაც ეკუთვნოდა ის მიიღო" განუცხადა მან ხანძრის შედეგად შეყრილ მეზობლებს.
მეზობლები გამოვიკითხე, აღმოჩნდა, რომ თ.რ. -ს და მის მეუღლეს ხშირად ჰქონდათ ჩხუბი და უთანხმოება. მათი თქმით ქალს მეუღლე გარეთ არასდროს უშვებდა, მეზობლებთანაც კი. გარდაცვლილი პოლიციას ხშირად იძახებდა. თუმცა უცნობია რა რეაგირებას აკეთებდა პოლიცია ამ გამოძახებებზე. უცნობია ასევე არსებობს თუ არა შემაკავებელი და დამცავი ორდერები.
შედეგი გამოუსწორებელია, სახეზეა გარდაცვლილი და ტრავმირებული მცირეწლოვანი ბავშვები, რომელთა გონებიდან ალბათ დიდხანს არ ამოიშლება ის შემზარავი სურათი, რისი მოწმენიც გახდნენ.
ოცდამეცხრე ქალი ბოლო ორი წლის განმავლობაში. როდის უნდა გააცნობიეროს სახელმწიფომ და საზოგადოებამ პრობლემის სიმწვავე. ზუსტად ამ სოფელში ამ სახლიდან 200 მეტრის მოშორებით ათი დღის წინ დოკუმენტური ფილმის გადაღება მიმდინარეობდა გაეროს ქალთა ფონდის პროგრამის ფარგლებში. ჩვენი ერთ ერთი აქტივისტი თინათინ ღლონტი საუბრობდა ოჯახში ძალადობის პრობლემაზე სოფელში. გარედან ვერავის ოჯახურ კონფლიქტში ვერ ჩაერევი, თავად ქალები კი დუმან. რა არის ამ დუმილის მიზესი? არ დავიღლები და კიდევ ერთხელ დავწერ, დუმილის მიზეზია სახელმწიფოს მიმართ უნდობლობა, საზოგადოების გულგრილობა და თავად ქალის, როგორც უკვე მსხვერპლის უმწეობა.
მაშინ როცა არსებობს კანონი ოჯახში ძალადობის შესახებ, რატომ არ იყენებს პოლიცია უფლებას გამოწეროს შემაკავებელი ორდერი, მაშინ როცა გესმის როგორ ითხოვს ბავშვი შველას – და არ იძახებ პოლიციას, მაშინ როცა ამავე სოფელში ჩატარებული ოჯახში ძალადობის წინააღმდეგ მიმართული არა ერთი ტრენინგი, აქცია, მარათონი და ველოტური რჩება მხოლოდ აქტივობად, თეორიულად ყველა ძალადობას ემიჯნება, მაგრამ რეალურად ძალადობის წინააღმდეგ ბრძოლისთვის ერთ აგურსაც კი არ დებენ, რატომღა გვიკვირს ქალთა გახშირებული უმძიმესი მკვლელობები.
დიახაც პირველ რიგში სახელმწიფოს, კერძოდ შსს-ს კისერზეა ოჯახში ძალადობის ნიადაგზე მომხდარი მკვლელობები, რადგანაც სტრუქტურებში დასაქმებული პირები არ თვლიან ოჯახში ძალადობას მნიშვნელოვან დანაშაულად, თავიანთი სუბიექტური შეხედულებების მიხედვით უარს ამბობენ შემაკავებელი ორდერების გამოყენებაზე და ა.შ.
მეორე რიგში კი საზოგადოების კისერზე , რომელიც იჩენს გულგრილობას მსხვერპლის მიმართ, შემწყნერებელია მოძალადის მიმართ, თვლის, რომ ოჯახში ძალადობა მხოლოდ ოჯახის საქმეა."
