ქალაქ ოზურგეთის ცენტრალურ ნაწილში, ავტომანქანების გაჩერება ფასიანია. ეკლესიის, სავაჭრო ცენტრ "იმედის", `საქართველოს ბანკის" და "ძველი ბაზრის" მიმდებარე ტერიტორიაზე, ე.წ. "სტაიანშიკებს", მხედველობიდან არცერთი მანქანა არ რჩებათ. თანხა მიაქვთ, თუმცა, ქვითარს არავინ იძლევა. შესაბამისად, არავინ იცის, ვის და რატომ უხდის თანხას.
წლებია ასე გრძელდება და ამის შესახებ "გურია ნიუსი" ჯერ კიდევ 2006 წელს წერდა. ქალაქის მაშინდელმა ხელმძღვანელობამ, სიტუაციის მოგვარების პირობაც დადო, თუმცა, არაფერი შეცვლილა.
"გურია ნიუსის" ინფორმაციით, აღნიშნული ტერიტორიები 10-წლიანი იჯარით ოზურგეთის ახლანდელი მაჟორიტარი დეპუტატის, ზვიად კვაჭანტირაძის მამას, დავით კვაჭანტირაძეს ჰქონდა მფლობელობაში.
დავით კვაჭანტირაძე 2 წელია, გარდაცვლილია. როგორც ჩვენი წყარო ამბობს, მამის ბიზნესს, დღეს, ზვიად კვაჭანტირაძე აკონტროლებს და შესაბამისად, აკრეფილი თანხა მასთან მიდის.
"რა შუაშია "მიშას აკრეფილ" ფულთან დეპუტატი კვაჭანტირაძე", _ ამ სათაურით გამოქვეყნდა მასალა "გურია ნიუსში" 2014 წლის 18 სექტემბერს.
"მამაჩემის მემკვიდრეობაზე ამ საკითხში სრულად განვაცხადე უარი და დავუმტკიცე ჩემს ბიძაშვილს, მამაჩემის ძმისშვილს, რომელიც არსებული ხელშეკრულების ვადის გასვლამდე შეასრულებს ხელშეკრულებით ნაკისრ უფლებებს და ვალდებულებებს", _ ასეთი კომენტარი გააკეთა საქართველოს პარლამენტის წევრმა, ოზურგეთის მაჟორიტარმა დეპუტატმა ზვიად კვაჭანტირაძემ.
ჩვენ გავაგრძელეთ ამ თემაზე მუშაობა, რადგან მოპოვებულ დოკუმენტებში ბევრი გაურკვეველი საკითხი იყო და ეს საკითხები კანონთან შესაბამისობაში, საბიუჯეტო ურთიერთობებში მეტ სიცხადეს მოითხოვს. ჩვენს ხელთ არსებული დოკუმენტებით ირკვევა, რომ ზვიად კვაჭანტირაძე დღესაც ინდ. მეწარმე, დავით კვაჭანტირაძის უფლებამონაცვლე პირია.
ჩვენს მიერ გამოთხოვნილი ოფიციალური დოკუმენტების თანახმად, ნოტარიუს მაგდანა როყვას მიერ, 22.07.2013 წელს გაცემული სამკვიდრო მოწმობიდან ირკვევა, რომ ზვიად კვაჭანტირაძემ, როგორც პირველმა რიგის მემკვიდრემ, მიიღო დავით კვაჭანტირაძის სამკვიდრო ქონება სრულად. მათ შორის იმ აქტივებზეც, რომელიც მამკვიდრებელს გააჩნდა.
ზვიად კვაჭანტირაძის მიერ ქალაქ ოზურგეთის მერისათვის და საკრებულოსათვის 26.08.2014 წელს მიწერილი წერილის ამონარიდი: "სამოქალაქო კოდექსის შესაბამისად, როგორც მემკვიდრე, თანხმობას ვაცხადებ გავაგრძელო საიჯარო ურთიერთობები, მაგრამ თანამდებობრივი შეუთავსებლობის გამო, ხელშეკრულების მე-8 მუხლის 8.4-ე პუქნტის შესაბამისად, გთხოვთ, მოიჯარის სახით ჩაანაცვლოთ ხელშეკრულების მხარედ ჩემს მიერ შემოთავაზებული პირი ბიძინა კვაჭანტირაძე, რომელიც იქნება გადახდისუნარიანი მოიჯარე… ".
შესაბამისად, ცხადია, რომ პარლამენტის წევრს სურს ხელშეკრულების გაგრძელება, მაგრამ მისივე მითითებით, თანამდებობრივი შეუთავსებლობის გამო, მას არ შეუძლია იჯარით აღებული მიწის ნაკვეთის სამეურნეო გამოყენება.
მამკვიდრებელი გარდაიცვალა 26.12.2012 წელს. საქართველოს კანონმდებლობით, სამკვიდრო მოწმობა გაიცემა გარდაცვალებიდან ექვსი თვის შემდეგ, რის შედეგადაც დგინდება მემკვიდრე ანუ უფლებამონაცვლე, მაგრამ სამკვიდროს მართვა გარდაცვლილის მემკვიდრეს შეუძლია დაიწყოს მამკვიდრებლის გარდაცვალების დღიდანვე, რის თაობაზეც შესაბამისი უფლებამოსილების დამადასტურებელ სანოტარო აქტს – "სამკვიდროს მმართველის მოწმობას", უფლებამოსილი პირის მიმართვის შემთხვევაში, გასცემს ნოტარიუსი.
სამკვიდროს მართვის შესახებ არანაირი დოკუმენტი არ არსებობს, ასევე სრულიად ბუნდოვანი და გაურკვეველია ვინ ახორციელებდა ინდივიდუალური საწარმოს მართვას, რადგანაც ინდ. მეწარმის გარდაცვალების შემდეგ ინდივიდუალური საწარმო გაუქმებულად ითვლება.
ოზურგეთის გამგეობასა და ი/მ დავით კვაჭანტირაძეს შორის ხელშეკრულება დადებულია 14.11.2006 წელს, რომელიც გარდაიცვალა ორი წლის წინ; შესაბამისად, გაურკვეველია, ვინ ახორციელებდა მის უფლებამოსილებებს ბოლო ორი წლის განმავლობაში. აქვე გასათვალისწინებელია ისიც, რომ მიუხედავად ბატონი დავითის გარდაცვალებისა, სამეწარმეო რეესტრის მონაცემებით, ინდ. მეწარმის რეგისტრაცია დღეის მდგომარეობითაც კი გაუქმებული არ არის.
მაღალი საზოგადოებრივი ინტერესიდან გამომდინარე, კითხვებით მივმართეთ ოზურგეთის მუნიციპალიტეტის საკრებულოს ყოფილ და მოქმედ თავმჯდომარეებს, ასევე ოზურგეთის მაჟორიტარ დეპუტატს ზვიად კვაჭანტირაძეს:
ვინ მართავდა ორი წლის წინ გარდაცვლილი ი/მ დავით კვაჭანტირაძის ნაცვლად იჯარით გაცემულ მუნიციპალურ ქონებას და ვინ იღებდა მისი განკარგვით შემოსავალს?
ხდებოდა თუ არა საიჯარო ქირის გადახდა ბოლო ორი წლის განმავლობაში (მხარეთა შორის დადებული ხელშეკრულების მიხედვით, სამი თვის განმავლობაში იჯარის ქირის გადაუხდელობის შემთხვევაში, შესაძლებელი იყო ხელშეკრულების გაუქმება)?
ვინ ადგენდა დავით კვაჭანტირაძის გარდაცვალების შემდეგ ბუღალტრულ ან საანგარიშგეო დოკუმენტაციას საგადასახადო ვალდებულებებთან მიმართებაში (გარდაცვალებასთან ერთად, გარდაცვლილის მიერ გაცემული ყველა მინდობილობა გაუქმებულად ითვლება)?
მიიღო თუ არა მემკვიდრემ _ პარლამენტის წევრმა ზვიად კვაჭანტირაძემ შემოსავალი და თუ მიიღო, მოხვდა თუ არა 30/12/2013 წელს შედგენილ ქონებრივი მდგომარეობის დეკლარაციაში იჯარა/პარკირების შედეგად მიღებული შემოსავალი, ან რაიმე სახით აისახა თუ არა ეს ფაქტი მის ქონებრივ მდგომარეობაზე?
ქალაქ ოზურგეთის საკრებულოს თავმჯდომარე გელა კობალაძე ასეთ კომენტარს აკეთებს:
"ამ საკითხთან დაკავშირებით, განცხადება შემოიტანა ქალაქის საკრებულოში საქართველოს პარლამენტის წევრმა ზვიად კვაჭანტირაძემ. განცხადებაში მოყვანილი იყო ფაქტი, რომ მის მამას იჯარით აქვს აღებული მიწის ნაკვეთები 2006 წლიდან 2016 წლამდე სამეწარმეო საქმიანობისთვის ქალაქის ტერიტორიაზე 10- წლიანი ხელშეკრულებით. ბატონი დავითი გარდაცვლილია, მისი უფლებამონაცვლე იყო მისი შვილი ზვიად კვაჭანტირაძე. ვინაიდან მას ეკრძალება სამეწარმეო საქმიანობა, ამისათვის საკრებულოზე გამოცხადდა მისი ბიძაშვილი ბიძინა კვაჭანტირაძე. ბატონმა ზვიადმა ითხოვა, რომ ხელშეკრულების გადასული ვალდებულება აეღო ბიძინა კვაჭანტირაძეს.
საკრებულოს სხდომაზე გავიტანეთ აღნიშნული საკითხი, მოვიწვიეთ ბიძინა კვაჭანტირაძე და მივეცით თანხმობა, ხელშეკრულება გადასულიყო ბიძინა კვაჭანტირაძეზე. როგორც გაირკვა, ბატონი დავითის გარდაცვალებიდან დღემდე, გარკვეულ პერიოდში, დაგროვდა დავალიანება, ხელშეკრულებით ნაკისრი ვალდებულება არ შესრულდა _ დავალიანება 6 000 ლარამდეა, შესაბამისად, პასუხისმგებლობაც აიღო ახალმა მოიჯარემ. თუ ის ვერ შეასრულებს და არ დაფარავს იმ დავალიანებას, შემდეგ ქალაქის მერია და საკრებულოც ვიმსჯელებთ ხელშეკრულების გაუქმებაზე.
აქამდე ვინ იღებდა თანხას, ეს ჩვენ არ ვიცით; როგორც გაირკვა, იყო უმართავი სიტუაცია, არავინ არ იყო ამის მომკითხავი… ახლა ძველ დავალიანებას და ახალსაც გადაიხდის ახალი მოიჯარე. დანარჩენზე მე პასუხს ვერ გაგცემთ".
ოზურგეთის მუნიციპალიტეტის საკრებულოს ყოფილი თავმჯდომარე, ავთანდილ სურგულაძე უფრო ადრინდელ სიტუაციას იხსენებს.
"მე შემიძლია გაგცეთ პასუხი იმაზე, რომ როცა დავით კვაჭანტირაძე გარდაიცვალა, იჯარა ავტომატურად გადავიდა ბატონ ზვიადზე. ვინაიდან, ის არის მაჟორიტარი დეპუტატი და მას არ ჰქონდა ამის უფლება, განაცხადა, რომ გადასცემოდა თავის ბიძაშვილს, ბიძინა კვაჭანტირაძეს. თუ არ ვცდები უნდა იყოს 11 ნაკვეთი.
ჩვენ ვმუშაობდით ამ საკითხთან დაკავშირებით; გვქონდა არაერთი მიმოწერა ეკონომიკის სამინისტროსთან. იყო დავალიანება 5 000 ლარი, ეს თანხა უნდა შემოსულიყო ადგილობრივ ბიუჯეტში და დავალიანებაც დაიფარებოდა… უშუალოდ გაფორმება ჩვენ აღარ მოგვიხდენია, რადგან მუნიციპალიტეტი ორ ნაწილად იყოფოდა, ამიტომ შევჩერდით."
_ ვინ წარმოადგენდა დავით კვაჭანტირაძეს მისი გარდაცვალების შემდეგ საკრებულოსთან ურთიერთობაში და ვინ ადგენდა ბუღალტრულ ან საანგარიშგებო დოკუმენტაციას ?
_ სხვა დანარჩენზე პასუხს ვერ გაგცემთ ფაქტიურად. დანარჩენზე ბატონმა ზვიადმა უნდა გაგცემთ პასუხი. დანარჩენ საკითხში არ ვარ კომპეტენტური.
მიუხედავად ბევრი მცდელობისა, პარლამენტის წევრი, ზვიად კვაჭანტირაძე ამ თემაზე ოფიციალურ კომენტარს არ აკეთებს. პირად მიმოწერაში კი არაკორექტულად და უსაფუძვლოდ, მამის ხსოვნის შელახვაში, შეკვეთილი მასალების მომზადებაში გვდებს ბრალს.
აღნიშნულ თემასთან დაკავშირებით, კომენტარი ვთხოვეთ იურისტ კახა ჩავლეშვილს:
"მოცემულ შემთხვევაში არსებული დოკუმენტების საფუძველზე შეგვიძლია ვივარაუდოთ, რომ გამოყენებულია სამოქალაქო კოდექსის 590-ე მუხლი, რომლის მე-2 ნაწილის მიხედვით – "მემკვიდრეებს შეუძლიათ უარი განაცხადონ ხელშეკრულების მოშლაზე და მოითხოვონ საიჯარო ურთიერთობის გაგრძელება, თუ მათ უშუალოდ ან მესამე პირების მეშვეობით შეუძლიათ იჯარით გადაცემული ქონების სწორი სამეურნეო გამოყენება".
შესაბამისად, ზემოთ ხსენებული ნორმა მემკვიდრეებს უფლებას აძლევს, მოითხოვონ საჯარო ხელშეკრულების გაგრძელება და არა იმას, რომ მესამე პირებს აჩუქონ ან მიყიდონ ან სხვა რაიმე ფორმით გადასცენ ეს აქტივი. რაც შეეხება მითითებული მესამე პირების მეშვებით იჯარით მიღებული ქონების გამოყენებას, ეს ნიშნავს, რომ მემკვიდრეს შეუძლია ვინმეს დაქირავებით ან ვინმეზე რწმუნებულების მიცემით მართოს ქონება. თუმცა უნდა აღვნიშნო, რომ ასეთი პრაქტიკა ანუ უფლებამოსილი პირის ჩანაცვლებისას, პირველი არ გახლავთ.
ზემოხსენებულიდან გამომდინარე, საკრებულომ უნდა განუმარტოს საზოგადოებას, რომელი ნორმები აძლევდა მას უფლებას შეესრულებინა ზვიად კვაჭანტირაძის თხოვნა და იჯარის ხელშეკრულება გაეგრძლებინა ბიძინა კვაჭანტირაძისათვის.
ასევე მიმაჩნია, რომ საკრებულომ სრულყოფილი და ამომწურავი განმარტებები უნდა მისცეს საზოგადოებას, 2012 წლის დეკემბრიდან დღემდე, რა ხდებოდა იჯარით გაცემული მიწის ნაკვეთებზე. რადგანაც სიტუაციის ბუნდოვანება საფუძვლიან ვარაუდს ბადებს იმის თაობაზე, რომ მხარეების მოქმედებები მოქმედ კანონმდებლობას არ შეესაბამება", _ აღნიშნავს ჩავლეშვილი.
ჩვენ მზად ვართ, სრულად და ოპერატიულად გამოვაქვეყნოთ ზვიად კვაჭანტირაძის, ასევე, საკრებულოს განმარტებები აღნიშნულ საკითხთან დაკავშირებით, არსებული სიტუაციის გარკვევის და საქართველოს კანონმდებლობის ფარგლებში მოქცევის მიზნით.
