16 ოქტომბერს ოზურგეთის მუნიციპალიტეტის საჯარო მოხელეთა მუდმივმოქმედი საკონკურსო–საატესტაციო კომისიის სხდომა გაიმართა. სხდომას,
საკონკურსო–საატესტაციო კომისიის თავმჯდომარე მერაბ ჭანუყვაძე და წევრები: დავით დარჩია (კომისიის თავმჯდომარის მოადგილე); არჩილ ყაზაიშვილი, მაიზერ ცელაძე, სოფიო სალუქვაძე, ივანე მენაბდე, თეიმურაზ ქინქლაძე და კახაბერ ლომაძე ესწრებოდნენ.
მერაბ ჭანუყვაძის თქმით, ადგილობრივი თვითმმართველობის მოხელის თანამდებობაზე დასანიშნად პირის მიერ გასავლელი კონკურსის სავალდებულო ეტაპად განისაზღვრა კონკურსის მონაწილის ტესტირება. აღნიშნულიდან გამომდინარე, მართებულია თუ კონკურსი გაიმართება 3 (სამ) ეტაპატ: აპლიკაციების შეფასება/გადარჩევა, ტესტირება და გასაუბრება.
კომისიის მიერ ცალ-ცალკე იქნა განხილული თითოეული საკითხი. განხილულ იქნა კომისიის წევრების მოსაზრებები და მიღებულ იქნა შემდეგი გადაწყვეტილება:
1. კონკურსი გაიმართოს 3 (სამ) ეტაპად:
ა) პირველი ეტაპი, აპლიკაციების შეფასება/გადარჩევა – რომლის შედეგების გამოცხადების შემდეგ კონკურსში მონაწილეობას გააგრძელებენ და გასაუბრების ეტაპზე გადავლენ მხოლოდ ის კანდიდატები, რომლებიც განაცხადების (აპლიკაციების) გადარჩევის საფუძველზე დააკმაყოფილებენ დადგენილ საკვალიფიკაციო მოთხოვნებს. კანდიდატებთან დაკავშირება მოხდეს მათ მიერ განაცხადებში (აპლიკაციებში) მითითებული ტელეფონის ან ელექტრონული ფოსტის საშუალებით.
ბ) მეორე ეტაპი, ტესტირება – რომლის შედეგების გამოცხადების შემდეგ კონკურსში მონაწილეობას გააგრძელებენ და გასაუბრების ეტაპზე გადავლენ მხოლოდ ის კანდიდატები, რომლებიც გადალახავენ ტესტირების ეტაპის მინიმალურ ზღვარს:
ბ.ა. წამყვანი საჯარო თანამდებობის ვაკანსიაზე – 65%-ს, არანაკლებ 39 ტესტურ დავალებას;
ბ.ბ. უფროსი საჯარო თანამდებობის ვაკანსიაზე – 60%-ს, არანაკლებ 36 ტესტურ დავალებას;
ბ.გ. უმცროსი საჯარო თანამდებობის ვაკანსიაზე – 55%-ს, არანაკლებ 33 ტესტურ დავალებას.
კანდიდატებთან დაკავშირება მოხდეს მათ მიერ განაცხადებში (აპლიკაციებში) მითითებული ტელეფონის ან ელექტრონული ფოსტის საშუალებით.
გ) მესამე ეტაპი, გასაუბრება – რომლის შედეგების გამოცხადების შემდეგ ოზურგეთის მუნიციპალიტეტის გამგებელსა და საკრებულოს თავმჯდომარეს ვაკანტურ თანამდებობაზე დასანიშნად წარედგინებათ კანდიდატები.
2. განისაზღვროს ის ვაკანტური თანამდებობები, რომელთა დასაკავებლად ცხადდება კონკურსი (დანართი N1).
3. კომისიის წევრებმა გასაუბრების ეტაპზე ვაკანტურ თანამდებობის მოთხოვნებთან კანდიდატის შესაბამისობის დადგენისას იხელმძღვანელონ განსაზღვრული ფორმის მიხედვით (დანართი N2).
4. კონკურსში მონაწილეობის მისაღებად კანდიდატს უფლება აქვს განაცხადი წარადგინოს ერთდროულად არაუმეტეს 5 (ხუთ) ვაკანსიაზე, ელექტრონული ფორმით, საჯარო სამსახურის ბიუროს მიერ ადმინისტრირებულ ვებგვერდზე(www.hr.gov.ge).
5. საჯარო სამსახურის ბიუროს მიერ ადმინისტრირებულ ვებგვერდზე (www.hr.gov.ge) – „ჩემი რეზიუმე“-ში კანდიდატმა უნდა ატვირთოს:
ა) „სამოტივაციო წერილის“ ბლოკში სამოტივაციო წერილი;
ბ) „დამატებითი დოკუმენტაციის“ ბლოკში შესაბამისი დოკუმენტი (შრომის წიგნაკი ან/და ცნობა) რომლითაც დასტურდება კანდიდატის მუშაობის სტაჟი (გამოცდილება);
გ) „რეკომენდატორების“ ბლოკში იმ ვაკანტურ თანამდებობაზე ერთი რეკომენდაცია მაინც მიმდინარე ან წინა სამუშაო ადგილებიდან რეკომენდატორის მიერ ხელმოწერით დადასტურებული, რომელზეც საკვალიფიკაციო მოთხოვნების შესაბამისად დადგენილია მუშაობის სტაჟი.
6. კანდიდატი, რომლის მონაცემებიც არ შეესაბამება დადგენილ საკვალიფიკაციო მოთხოვნებს, არასრულად ექნება წარმოდგენილი მითითებული დოკუმენტაცია, ვერ გააგრძელებს კონკურსის შემდეგ ეტაპზე მონაწილეობას.
7. კონკურსის შესახებ ინფორმაციის საჯაროობას უზრუნველყოფს საკონკურსო-საატესტაციო კომისიის თავმჯდომარე.
8. ეთხოვოს ოზურგეთის მუნიციპალიტეტის გამგებელს 2014 წლის 25 ოქტომბრამდე უზრუნველყოს შემდეგი ღონისძიებების განხორციელება:
ა) „ოზურგეთის მუნიციპალიტეტის გამგეობაში და საკრებულოს აპარატში ვაკანტური თანამდებობის დასაკავებლად ჩასატარებელი კონკურსის მოსამზადებელი ღონისძიებების დამტკიცება“;
ბ) კონკურსის გამოცხადება.
9. კომისიამ აპლიკაციების შეფასება/გადარჩევა განახორციელოს კანდიდატების განცხადების წარსადგენად დადგენილი ვადის (ათდღიანი ვადა) ამოწურვიდან არანაკლებ 5 (ხუთ) სამუშაო დღეში.
10. კონკურსის შემდეგი ეტაპის (ტესტირება) გამართვის გრაფიკი (დრო, თარიღი) განისაზღვრება კონკურსის წინა ეტაპის შედეგების გამოცხადების შემდეგ.
