ოზურგეთის მუნიციპალიტეტის გამგეობის კულტურის სამსახურის ორგანიზებით, სოფელ ლიხაურში, სახალხო დღესასწაული, ექვთიმეობა გაიმართა.
საზეიმო ღონისძიებები დღის 12 საათიდან დაიწყო. ექვთიმე ღმრთის კაცის სახლ-მუზეუმში სულის მოსახსენიებელი პარაკლისი ღვთისმშობლის მიძინების ოზურგეთის საკათედრო ტაძრის წინამძღვარმა, დეკანოზმა, მამა ბასილმა (კვირჩილაძემ) აღავლინა.
"მადლობა უფალს, რომ არსებობს სოფელი ლიხაური და გყვავს ისეთი წმიდანი და მეოხი, რომელიც მსოფლიო შენატრის. დღეს ჩვენ შევიკრიბეთ კიდევ ერთხელ იმისთვის ექვთიმე ღმრთისნ კაცის მიმართ მადლი და სითბო გამოვხატოთ, რასაც მადლიერება ჰქვია. ყველაზე ძვირფასი სიტყვაა მადლიერება, რომელიც მადლიდან მოდის", _ თქვა მამა ბასილმა.
"გურია ნიუსთან" საუბრის დროს, ექვთიმე თაყაიშვილის სახლ-მუზეუმის დირექტორი, რუსლან ურუშაძე ამბობს, რომ ექვთიმეობა კომუნისტების დროსაც აღინიშნებოდა, მაგრამ 90-იან წლებში ეს დღესასწაული აღარ აღიშნებოდა და 2010 წელს აღდგა:
"2010 წელს ოზურგეთის მუნიციპალიტეტის, სოფელ ლიხაურში, ექვთიმე თაყაიშვილის მშობლიურ სოფელში სახლ-მუზეუმის აშენებამ, ხელახალი სტიმული მისვა ექვთიმეობის აღდგენას. ამას ძალიან დიდი მნიშვნელობა აქვს, რადგან ექვთიმე თაყაიშვილი, დიმიტრი ყიფიანი, ნიკო ნიკოლაძე არ არიან მწერლები და არ ისწავლება სკოლაში. მუზეუმს კი აქვს საშუალება ახალგაზრდობას ჩვენ გავაცნოთ ამ დიდებული ადამიანების შესახებ. 2002 წლის 17 ოქტომბერს მოხდა ექვთიმე თაყაიშვილის წმინდანად შერაცხვა და აქედან გამომდინარე აღვნიშნავთ ექვთიმეობას.
როგორც ამბობენ კომუნისტების დროს ტარდებოდა ექვთიმეობა დიდი მასშტაბებით. 80-იან წლეებში აშენდა ექვთიმე თაყაიშვილის ძეგლი, რომლის ავტორი იყო, ლიხაურელი მოქანდაკე რობერტ გოგოლიშვილი, არქიტექტორი კი ანზორ გომართელი. ეს ღონისძიება რესპუბლიკის მასშტაბით იგეგმებოდა, ყველა კორიფე მეცნიერი ლიხაურში იყო, მაგრამ ზუსტი დღე არ იყო დადგენილი, უფრო მეტად გაზაფხულზე ტარდებოდა. სახალხო ზეიმი იყო, გაშლილი სუფრებით, სამეცნიერო კონფერენციებით და ა.შ. ოღონდ 90-იან წლებში შეჩერდა და 2010 წელს აღდგა", _ გვითხრა რუსლან ურუშაძემ.
ოზურგეთის მუნიციპალიტეტის გამგებელი მერაბ ჭანუყვაძე, ამბობს, რომ ეს დღე თითოეული ოზურგეთელისთვის მეტად მნიშვნელოვანია:
"ექვთიმე ღმრთის კაცს თავისი მოღვაწეობის პერიოდში განსაკუთრებით უვლია ამ ქვეყანაზე და თითოეული ჩვენთაგანის ვალია ჩვენი მომავლის აღზრდა და გაზრდა იმ გზით, რაც იარა ექვთიმე თაყაიშვილმა საქართველოსთვის. ეს არის სიმბოლო კაცთმოყვარეობის, ჩვენი კულტურული მემკვიდრეობის და ეს არის ზოგადად, სიმბოლო ჩვენი სახელმწიფოებრიობის", _ თქვა მერაბ ჭანუყვაძემ.
სახალხო დღესასწაულის მეორე ნაწილში კი მოეწყო ხალხური რეწვის ნიმუშების გამოფენა-გაყიდვა, სხვადახვა სოფლის წარმომადგენლებმა სპეციალურად მოწყობილ კუთხეებში ადგილობრივი წარმოების პროდუქტები გამოფინეს. ღონისძიება ფოლკლორული და ქორეოგრაფიული ანსამბლების კონცერტით დასრულდა.
თუ რას წერდა ექვთიმე თაყაიშვილი მის ბიოგრაფიაში და პარიზში გერმანელების შესვლისა და მის ბინაში ჩატარებული ჩხრეკის შესახებ, ამას გაზეთ "გურია ნიუსის" ფურცლებიდან გაიგებთ.
