21 ოქტომბერს, ქალაქ ოზურგეთის მუნიციპალიტეტის საკრებულოს რიგგარეშე სხდომა გაიმართა, რომელზეც დღის წესრიგით გათვალისწინებული 17 საკითხი განიხილეს. სხდომას, რომელსაც ქალაქის მერი ბეგლარ სიორიძეც ესწრებოდა, საკრებულოს თავმჯდომარის მოადგილე ნინო გოგუაძე უძღვებოდა.
სხდომაზე დეპუტატების ყურადღება მეცამეტე საკითხმა მიიპყრო _ "ქალაქ ოზურგეთის მუნიციპალიტეტის საკრებულოს თავმჯდომარის 2014 წლის 19 სექტემბერის #61 განკარგულებაში " ქალაქ ოზურგეთის მუნიციპალიტეტის ტერიტორიაზე არსებულ ქუჩებზე საგზაო მოძრაობის დაგეგმარების შეასხებ " ცვლილების შეტანის თაობაზე ".
_ "საბავშვო ბაღებთან, საჯარო სკოლებთან და სასწავლო დაწესებულებებთან დაყენებული იქნას მაფრთხილებელი ნიშანი, ხოლო #2, #3, #4, #5 საჯარო სკოლებთან და #1, #4, #9 საბავშვო ბაღთან მოეწყოს სიჩქარის შემზღუდავი ბარიერი სტანდარტის დაცვით და შესაბამისი საგზაო ნიშნებით, ასევე კოსტავას ქუჩაზე მდებარე, წმინდა გაბრიელ ეპისკოპოსის სახელობის სამრევლო სკოლასთან მოეწყოს ორი ცალი ყვითელი ფერის ციმციმა შუქნიშანი, დაიხაზოს ფეხით მოსიარულეთა გადასასვლელი და დაიდგას 6 (ექვსი) საგზაო ნიშანი", _ აღნიშნული იყო საკრებულოზე გამოტანილ საკითხში, რომელზეც განმარტებები ოზურგეთის მერიის ზედამხედველობის სამსახურის თანამშრომელმა შუქრი გაბრიჩიძემ გააკეთა.
საკრებულოს დეპუტატი ლევან მგელაძე ამ თემით დაინტერესდა და ბეგლარ სიორიძეს მიმართა: _ " მოგეხსენებათ, სამრევლო სკოლის იყო "სიჩქარის შემზღუდავი ბარიერის", რომელიც რაღაც მიზეზების გამო, რომელსაც არ ვაკონკრეტებ, აიღეს. ექსპერტების განცხადებით, ყველაზე რთული ადგილი არის კოსტავას ქუჩა და სამრევლო სკოლის წინ მიმდებარე ტერიტორია, სადაც არის ინტენსიური მოძრაობა. თუ სადმე უნდა გაკეთდეს ბარიერი, ეს არის გაბრიელ ეპისკოპოსიის სახელობის სამრევლო სკოლა. ჩემთვის და არა მარტო ჩემთვის, გაუგებარია, რატომ მოხდა ხელოვნური ბორცვის აღება. საზოგადოებას აინტერესებს, რატომ არ მოხვდა აღნიშნული სკოლა ამ სიაში, სადაც დაიდგა " სიჩქარის შემზღუდველი ბარიერი ". შეგიძლიათ გამცეთ პასუხი? _ დაინტერესდა მგელაძე
ბეგლარ სიორიძე: _ ეს არის ცენტრალური მაგისტრალი.
ლევან მგელაძე: _ ბოდიში, ბატონო ბეგლარ, მაგრამ "მაგისტრალი" _ ასეთი სიტყვა არ არსებობს, შეგიძლიათ იკითხოთ ექსპერტებთან.
ბეგლარ სიორიძე: _ მაშინ ასე გიპასუხებთ _ ჰქონდა საპატრულო პოლიციას თავისი მოსაზრება, რომ ეს ბარიერი პირიქით შექმნიდა საავარიო სიტუაციას; ცენტრალური მაგისტრალი არ არის, მაგრამ ეს არის მთავარი, ცენტრალური ქუჩა. ამიტომ, საპატრულო პოლიციის რეკომენდაციით, მოხდა ამ ციმციმა შუქნიშნის დაყენება.
ლევან მგელაძე; _ ბატონო ბელარ, საპატრულო პოლიცია ჩვენ ვერაფერს ვერ მიგვითითებს, ეს არის ჩვენი გადასაწყვეტი, სად და როგორი ნიშანი უნდა დაიდგას. ამასთან დაკავშირებით, ექსპერტმა განაცხადა, რომ აღნიშნულ ქუჩაზე აუცილებელი იყო სიჩქარის შემზღუდველი ბარიერის დაყენება.
ბეგლარ სიორიძე: _ მე პირიქით გავითვალისწინე საპატრულო პოლიციის თხოვნა და ეს ბორცვები მოვაწყვე ყველა სკოლასთან.
ლევან მგელაძე: _ ბატონო ბელარ, ისიც გვითხარით, რატომ იქნა ეს ბორცვი აღებული სამრევლო სკოლასთან? ყოველდღე დამყავს ბავშვი სკოლაში და ყოველ დილით დგას ორი ეკიპაჟი. რატომ უნდა იდგეს, როდესაც შეიძლებოდა თავიდან აგვეცილებინა მსგავსი პრობლემა; თავად მითხრეს, სანამ არ დაიდგმება ბარიერის შემზღუდველი, მანამდე ჩვენ უნდა ვაკონტროლოთ მანქანების მოძრაობაო. იქნებ გვითხრათ, რატომ ხდება ასე?
ბეგლარ სიორიძე: _ საპატრულო პოლიცია იღებს პასუხისმგებლობას, რომ დაარეგულირებს მოძრაობას აღნიშნულ ტერიტორიაზე. ჩვენ დავაყენეთ შუქნიშანი და აღარ მოუწევს საპატრულს იქ ყოფნა.
ლევან მგელაძე: _ ციმციმა უკვე დიდი ხანია დაყენებულია, მაგრამ პატრული მაინც ყოველ დილით დგას აღნიშნულ ტერიტორიაზე. მინდოდა თავი შემეკავებინა პოლიტიკური განცხადებებისგან, მაგრამ გამეცით პასუხი, რატომ აიღეთ დადგმული ბორცვი? როცა ყველაზე რთულ უბანში, გზის გარკვეულ უბანზე, სხვაგან რომ არ იყოს, მაგ ადგილას მაინც ხომ უნდა იდგეს? რატომ აიღეთ ბორცვი? ჩემთვის გაუგებარია და მჭირდება პასუხი. სამრევლო სკოლაში სწავლობს 200 ბავშვი და მათ უსაფრთხოებას ვიღაცის გამო ექმნება საფრთხე. თუ მთელი საკრებულო იღებთ ამ პასუხისმგებლობას, აიღეთ, _ მიმართა საკრებულოს დეპუტატებს ლევან მგელაძემ.
ბეგლარ სიორიძე: _ გავაკეთებთ აუცილებლად. ჩვენ გავითვალსიწინეთ საპატრულო პოლიციის შენიშნვნა და დავაყენეთ შუქნიშანი.
ლევან მგელაძე: _ თუ ერთი კაცის ახირებაზე უნდა იაროს მთელმა ოზურგეთმა და მის პრინციპს ენაცვლება 200 ბავშვის უსაფრთხოება, კი ბატონო, თქვენი გადასაწყვეტია, უყარეთ კენჭი!
ბეგლარ სიორიძე: _ ეს ერთი კაცი ვინაა?
ლევან მგელაძე: _ ყველამ კარგად იცით ვინც არის. თავს ვიკავებ პოლიტიკური განცხადებების გაკეთებისაგან. არ არის საპატრულო პოლიცია ჩვენი უფროსი _ მას მისი საქმე აქვს დასარეგულირებელი. პასუხისმგებლობას კი აიღებს საკრებულო.
ბეგლარ სიორიძე: _ გამორიცხულია, არავის პრინციპი არ არსებობს. მაშინ ასე გეტყვით; თუ საპატრულო პოლიცია ვერ დაიცავს უსაფრთხოებას აღნიშნულ ტერიტორიაზე, რამდენიმე თვეში ისევ დავაყენებთ ხელოვნურ ბორცვს. როცა გვექნება თანხა ბიუჯეტში, რომ დავაყენოთ ცივილური სახის ხელოვნური ბორცვი, სტანდარტი მერე დავაყენებთ. მომავალ საკრებულოს სხდომაზე მოვიწვიოთ საპატრულო პოლიციის უფროსი, ექსპერტები და ერთად განვიხილოთ აღნიშნული თემა.
ლევან მგელაძე: _ არ არის პრობლემის მოხსნა შუქნიშნის დაყენება. მაშინ რატომ დგას იქ პატრული? საქმე ბავშვებს ეხება და უსასრულოდ შეგვიძლია ვისაუბროთ ამაზე. მე ბოლოს პოლიტიკურ განცხადებას მაინც გავაკეთებ _ დღეიდან ჩვენთან ბატონყმური ურთიერთობები ჩამოყალიბდა. ძალიან მწყინს ამის თქმა, მაგრამ სხვანაირად არ გამოდის, _ საუბარი დაასრულა მგელაძემ.
ამავე სხდომაზე ადმინისტრაციულ წარმოებაზე დააყენეს თანამდებობის პირების ხელფასების მატების საკითხიც. მათი ხელფასები ასეთი იქნება:
_ ქალაქ ოზურგეთის მერი და საკრებულოს თავმჯდომარე _ 2 7 50 ლარი; ქალაქ ოზურგეთის საკრებულოს თავმჯდომარის მოადგილე _ 2 2 50 ლარი; კომისიის თავმჯდომარე _ 1650 ლარი; ფრაქციის თავმჯდომარე _ 1650 ლარი; აპარატის უფროსი _ 1500 ლარი; საკრებულოს თავმჯდომარის თანაშემწე _ 1100 ლარი; მთავარი სპეციალისტი _ 800 ლარი; უფროსი სპეციალისტი _ 650 ლარი; ვიცე მერი _ 2250 ლარი; მერის მოადგილე _ 2050 ლარი; სამსახურის უფროსი _ 1650 ლარი; განყოფილების უფროსი _ 1150 ლარი; მერის თანაშემწე _ 1100 ლარი; მთავარი სპეციალისტი _ 800 ლარი; წამყვანი სპეციალისტი _700 ლარი; უფროსი სპეციალისტი _ 650 ლარი; სპეციალისტი _ 600 ლარი.,
აღსანიშნავია, რომ ხელფასების მომატების საკითხს ოზურგეთის მუნიციპალიტეტის საკრებულოც განიხილავს. გურიის გუბერნატორი კი ამბობს, რომ "მომატება მეტ-ნაკლებად ადეკვატური უნდა იყოს".
_ მგონია, რომ ოზურგეთის შემთხვევაში, სწორედ არაადეკვატურ მატებასთან გვაქვს საქმე. აქ სრულად დარღვეულია შესაბამისობა ოზურგეთში არსებულ სოციალურ ფონსა და მისივე მუნიციპალიტეტის საჯარო მოხელეთა ანაზღაურებას შორის, _ ამბობს "გურია ნიუსთან" საუბრისას მხარის პირველი პირი.
