ჟურნალისტ ზაზა დავითაიას, ივანე ჯავახიშვილის სახელობის სახელმწიფო უნივერსიტეტის პირველ კორპუსთან, უკვე მეორედ, ფიზიკურად გაუსწორდნენ.
როგორც ჟურნალისტი "გურია ნიუსთან" საუბრისას იხსენებს, შემთხვევამდე რამდენიმე წუთის განმავლობაში თავდამსხმელი ყურადღებით ათვალიერებდა და ქმედებაზე მხოლოდ მას შემდეგ გადავიდა, რაც დარწმუნდა, რომ ნამდვილად ზაზა დავითაია იყო.
"მივდიოდი ინტერვიუს ჩასაწერად. ვაკეში, ივანი ჯავახიშვილის სახელობის უნივერსიტეტის მოპირდაპირე მხარეს, გაჩერებაზე ვიდექი. მომიახლოვდა ადამიანი, დაბალი, კეპითა და პლაშით და მკითხა ნამდვილად ზაზა დავითაია ვიყავი თუ არა. როცა დავუდასტურე, მიტრიალდა და წავიდა. რამდენიმე წუთში, ჩემი ავტობუსიც მოვიდა და ის იყო ასვლას ვაპირებდი, რომ უკნიდან მწვდა და მეკითხება – კაკებესთან რატომ თანამშრომლობო. მე გამეცინა, ვუთხარი – გიჟი ხომ არ ხარ-მეთქი და მაშინვე დამარტყა და თან მიმეორებდა – რით ვერ გაიგე, რომ ქუჩაში არ უნდა იარო. ვინაიდან პირველი ასეთი თავდასხმიდან ცოტა დრო იყო გასული და სრულად გამოჯანმრთელებული არ ვიყავი, წინააღმდეგობა ვერ გავუწიე", _ ამბობს "გურია ნიუსთან" დავითაია და დასძენს, რომ მას, მიუხედავად გარშემო ხალხმრავლობისა, არავინ მიშველებია.
"ძალიან საწყალი საზოგადოებაა, არ აქვთ უნარი თავი ან სხვა დაიცვან. პრობლემაა ისიც, რომ ე.წ. ლიბერალური ფრთის ჟურნალისტები არც დაინტერესებულან რა მოხდა, პასიურები არიან."
დავითაიას თქმით, მან პატრული გამოიძახა, რომელიც შემთხვევის ადგილზე 10 წუთის დაგვიანებით მივიდა.
"გამომძიებელი იყო, დამკითხა, მაგრამ ჩემთვის უცნაურია კიდევ ერთი ფაქტი – იქვე, შემთხვევის ადგილას, იყო ადამიანი, რომელიც დარჩა პატრულის მოსვლამდე და თანახმა იყო ჩვენება მიეცა, მე პატრულს მასზე მივუთითე კიდეც, მაგრამ ყურადღება არ მიაქციეს და ჩვენებაც არ ჩამოართვეს.
ახლა საავადმყოფოში ვარ, არ მაქვს ინფორმაცია გამოძიება რა ეტაპზეა, მაგრამ ადგილას, სადაც შემთხვევა მოხდა, უამრავი კამერაა დამონტაჟებული და ძნელი არ უნდა იყოს საქმე გაიხსნას", _ უთხრა "გურია ნიუსს" ჟურნალისტმა.
მისივე თქმით, იგი დარწმუნებულია, რომ ფაქტი "ნაციონალური მოძრაობის" მიერ იყო ინსპირირებული.
ზაზა დავითაი ამჟამად რკინიგზის საავადმყოფოსი იმყოფება მრავლობითი დაბეჟილობითა და ტვინის შერყევით.
