“მოვლენებმა ცხადყო, რომ ბაღებში “ისე არ წვიმდა, როგორც ქუხდა”

სკოლამდელ სააღმზრდელო ცენტრში "ჰაერივით საჭირო" რეორგანიზაციას ლანჩხუთის მუნიციპალიტეტის ყველა საბავშვო ბაღის  თანამშრომელთა პირადი საქმის შესწავლა  და  გასაუბრება  მოჰყვა. თუმცა, როგორც თავად ცენტრის ხელმძღვანელი დავით დობორჯგინიძე ამბობს, ამას  არც ტესტირება და არც გასაუბრება არ შეიძლება ეწოდოს _ ეს გაცნობითი ხასიათის შეხვედრები უფრო იყო.

იმის გასაგებად, თუ რა შედეგები მოჰყვა "გაცნობითი ხასიათის შეხვედრებს", სკოლამდელი სააღმზრდელო ცენტრის დირექტორს დავით დობორჯგინიძეს დავუკავშირდით და კომენტარი ვთხოვეთ. როგორც დავით დობორჯგინიძე ამბობს, შეხვედრებმა დამაკმაყოფილებელი შედეგი აჩვენა:

_ მეტ-ნაკლებად იყო გარკვეული ხარვეზები, რიგი შენიშვნებიც, მაგრამ ყველაფერი გამოსწორებადია. მთავარია, საგანგაშო არაფერია, _ გვითხრა ცენტრის დირექტორმა.

ჩვენი მეორე ადრესატი მუნიციპალიტეტის საკრებულოს წევრი, სოციალურ საკითხთა კომისიის თავმჯდომარე ია ჩხაიძე იყო, რომელიც ერთ-ერთი მათგანია, ვისაც კადრების კვალიფიციურობაში ეჭვი შეჰქონდა:

_ რომ გითხრათ, ყველა გასაუბრებას ვესწრებოდი,-მეთქი, მართალი არ იქნება. ძირითადად, გამგეობის სოციალური სამსახურის უფროსს მარინა კედიასთან, ამავე სამსახურის კულტურის განყოფილების ხელმძღვანელთან ქეთი ებრალიძესთან ვაკეთებდი მონაცვლეობას. იმან, რაც მე ვნახე, ჩემში კმაყოფილების გრძნობა გააჩინა. პირობებს, რომელიც ჩვენს საბავშვო ბაღებშია, იდეალურს ვერ დაარქმევ, მაგრამ კადრები საკმაოდ კვალიფიციურია; საბუთები, დოკუმენტაცია სრულ წესრიგშია. ვისაც არ აქვს  სკოლამდელი სააღმზრდელო განათლება მიღებული და სხვა უმაღლესი სასწავლებლის დიპლომი გააჩნია, სპეციალური გადამზადება აქვს გავლილი. აცანის საბავშვო ბაღში ნანახმა ყოველგვარ მოლოდინს გადააჭარბა _ პატარა თეატრი აქვთ მოწყობილი, ყველაფერს საკუთარი ხელით აკეთებენ", _ გვითხრა ია ჩხაიძემ.

მოკლედ, მოვლენებმა ცხადყო, რომ ბაღებში "ისე არ წვიმდა, როგორც ქუხდა". ბევრი თვლიდა, რომ სააღმზრდელო ჯგუფებში წინა ხელისუფლების დროს, პარტიული ნიშნებითა და ნეპოტიზმით ინიშნებოდნენ თანამშრომლები, მაგრამ აღმოჩნდა, რომ ეს მართლაც წარმატებული სოციალური პროექტი იყო თავის დროზე. კადრებიც,  რაც შეიძლება, კომპეტენციის ფარგლებში, შერჩეული იყო. სხვაგვარად, რადგან საქმე მომავალ თაობას ეხება, არც შეიძლება ყოფილიყო და არც მომავალში უნდა იყოს.