“კვირა არ გავა, დათვმა ძროხა არ შეჭამოს ან ბაღი არ გააჩანაგოს!”

ოზურგეთის მუნიციპალიტეტის სოფელ ჭანიეთს დათვმა გასულ წელსაც შემოუტია. თუმცა,წელს ნადირის მიერ სოფლისთვის მიყენებული ზარალი სერიოზულია და რაც მთავარია, გაჩნდა საშიშროება _ შესაძლებელია, მხეცმა ადამიანი იმსხვერპლოს.

ახლახან, ჭანიეთის თემის, სოფელ ქაქუთის ცენტრალური გზიდან, ასიოდე მეტრის დაშორებით მდებარე ხევში, დათვი ამავე სოფლის მკვიდრის, სერგო ბოიაჯანის ძროხას დაესხა თავს.

_ პირუტყვის განწირული ბღავილი რომ გავიგონეთ, სასწრაფოდ გავიქეცით. მაკე ძროხა დაკბენილი ეგდო და საცოდავად ღმუოდა. დათვი, ეტყობა, ყვირილის ხმაზე გაიქცა, თუმცა, ნაფეხურები აშკარად ეტყობოდა მიწას. ახალდაღამებული იყო და მეზობლების დახმარებით, ძროხა გაჭირვებით ამოვიყვანე სახლამდე. დავკალით, მაგრამ არც ერთმა მაღაზიამ არ მიიღო. გვითხრეს, ბათუმში, საძეხვე საამქროს ჩააბარეთო. წავიღეთ და იმდენი ნაწილი ააჭრეს, 500-კილოიანი ძროხისგან 100 კილო ხორციც არ დარჩა.  ამ ძროხის იმედად მყავდა ოჯახი, _ გვეუბნება სერგო ბოიაჯანი.

ჭანიეთელი როლანდი ქიმუცაძის ძროხას ნადირი დღისით დაესხა თავს და ზურგის ძვალი დაუზიანა.  ქიმუცაძეები ამბობენ, რომ ძროხა ბევრ რძეს იწველება და სურთ,  როგორმე გადაარჩინონ, ამიტომ  შინაურ პირობებში მკურნალობენ, თუმცა,  მისი გამოჯანმრთელება  დღემდე ვერ მოხერხდა და სავარაუდოდ, მალე დაკლავენ.

დათვმა ასევე შეჭამა ქაქუთელი ომარ ხურციძისა და მურმან ქავთარაძის ძროხები, ხოლო გურამ გაჩეჩილაძისა და პაატა კვირკველიას ეზოში მსხმოიარე ვაშლისა და კაროლიოკის ხეები ტოტებიანად დაამსხვრია. ზაფხულის პერიოდში დათვმა სოფლის  მიმდებარე ტერიტორიაზე მდებარე  არა ერთი თხილის პლანტაცია გაანადგურა, თუმცა, დათვის საშემოდგომო შემოტევა საშიშროების ზღვარს გადასცდა _ ნადირი ღამით უკვე იმ სახლებს სტუმრობს, რომელსაც ერთ მხარეს ტყიანი ნაწილი აკრავს _  ეზოში შედის და  ამსხვრევს ყველაფერს.

_ უკან ეზოში, სახლთან ახლოს  დგას ხურმის ხე. დილით ადრე რომ გავედი, თვალებს არ ვუჯერებდი, ისე დაებერტყა _ ხის ნაცვლად "სტოლბა" იყო დარჩენილი, _ გვეუბნება პაატა კვირკველია.

ჭანიეთის მოსახლეობა სერიოზულადაა შეშინებული:

_ ახლა ამ დათვს ბაბაიას ნამდვილად ვერ დავუძახებთ. სანადიროდ გახვალ და მოკლავ? შარს აქეთ მოგდებენ, არადა, თუ არ მოკლეს, შესაძლებელია, მალე ადამიანიც იმსხვერპლოს, შინაურ პირუტყვს ვიღა ჩივის?  _ ამბობენ გურამ გაჩეჩილაძე, ლაშა ბოიაჯანი, როლანდი ქიმუცაძე, გია მენაბდე, მურმან ქავთარაძე... _ რაღაც უნდა იღონოს სოფლის და რაიონის ხელმძღვანელობამ _ შველას ვითხოვთ. იმედია, ახლა ამისთვის გზის გადაკეტვა და საპროტესტო აქცია არ დაგვჭირდება. აღარაა იმის ცდის დრო, რომ სოფელში ჩამოვარდნილი ნადირი რაღაც საშუალებებით დავაფრთხოთ და დროებით ტყისკენ ვაბრუნებინოთ პირი. ორიოდე დღეში მოშივდება და ისევ უკან დაბრუნდება. ასეც შვება _ კვირა არ გავა, ძროხა არ შეჭამოს ან ბაღი არ გააჩანაგოს, _ ამბობენ ჭანიეთელები.

სოფლის გამგებელი მერაბ ბერაძე  ამბობს, რომ მოსახლეობის საყვედურები სამართლიანია და სასწრაფო რეაგირებას აპირებს:

_ გასულ წელს რომ შემოვიდა დათვი სოფელში, მუნიციპალიტეტის საკრებულოს თავმჯდომარეს მივმართე განცხადებით _ ხალხი  მაშინაც ითხოვდა შველას. თუმცა,  ღონისძიება არ გატარებულა. ახლა უფრო ახლოს, თითქმის, შუაგულ სოფელში შემოვიდა და დაყოვნების დრო აღარაა. ვაპირებ სასწრაფოდ მივმართო ოზურგეთის მუნიციპალიტეტის საკრებულოს თავმჯდომარეს და გამგებელს, რათა ერთობლივი სასწრაფო ღონისძიება გახორციელდეს, რა თქმა უნდა, კანონიერების დაცვით.

დავით მჟავანაძე, სოფელ ჭანიეთის დეპუტატი ოზურგეთის მუნიციპალიტეტის საკრებულოში:

_ დღეს მივმართე გარემოს დაცვის სამინისტროს წარმომადგენელს და ვესაუბრე შექმნილ სახიფათო ვითარებაზე. მითხრეს, რომ თვითნებურად დათვის მოკვლისთვის ჯარიმის წესით დასჯა ხდება. ამიტომ საჭიროა სპეციალური წერილის მომზადება. ახლა ვამზადებ ამ წერილს და დღესვე გავგზავნით გარემოს დაცვის სამინისტროს ზედამხედველობის სამსახურში. ვიმედოვნებ, პასუხი დროული იქნება და შედეგს მოგვიტანს. მანამ კი სოფლის მოსახლეობას კიდევ ერთხელ ვაფრთხილებთ _ იყონ ყურადღებით და მოერიდონ ტყეში სიარულს.