ლევან სამხარაულის სახელობის სასამართლო ექსპერტიზის ეროვნული ბიუროს დასკვნა ჩოხატაურის #1 ბაგა-ბაღში გახორციელებული სამუშაოების შესახებ უკვე ცნობილია.
დასკვნის თანახმად, რიგი სამუშაოებისა არ აკმაყოფილებს სამშენებლო ნორმებით დადგენილ მოთხოვნებს.
ექსპერტიზის ბიუროს ექსპერტმა პაატა გერაძემ, რომელიც დასავლეთ საქართველოს რეგიონული ექსპერტიზის დეპარტამენტის საინჟინრო, სასაქონლო და ფინანსური ექსპერტიზის განყოფილების ექსპერტია, მუშაობის 5-წლიანი სტაჟით, საკონტროლო აზომვა ჩაატარა. ხილული სამუშაოები ფაქტობრივი მდგომარეობით აზომა, სხვა სამუშაოები კი ჩათვლილი იქნება როგორც ტექნოლოგიურად აუცილებელი.
დასკვნაში წერია, რომ "ფარული სამუშაოების აღრიცხვა და მიღება დამკვეთის (ამ შემთხვევაში ჩოხატაურის მუნიციპალიტეტი) პრეროგატივას წარმოადგენს."
"ადგილზე დათვალიერებისას დაფიქსირებული იქნა შემდეგი ხარვეზები: სახურავის მოწყობისას ბურულის პროფფენილის ღარების კეხის მიდამოში სამაგრი სჭვალების დამაგრების ადგილებში შეიმჩნევა ფენილის ზედაპირის ჩაღუნვები, რომლებიც გამოწვეულია თვითჩამხრახნი სჭვალების ზედმეტი ძალით ჩახრახნისგან. ასევე დაფიქსირებული იქნა სჭვალის დიამეტრის მქონე რამდენიმე ხვრელი.
კედლების და ჭერების მოპირკეთებისას ფითხით დამუშავებული ზედაპირების უმრავლესობა ვერ აკმაყოფილებს მოქმედი სამშენებლო ნორმების მოთხოვნებს. მათზე შეიმჩნევა დასაშვებზე დიდი ზომის უსწორობები.
ხის იატაკის მოწყობის რიგ ადგილებში არ არის დაცული მოქმედი სამშენებლო ნორმების მოთხოვნები, ღრეჩოების სიდიდეები დასაშვებზე დიდია.
ლამინირებული იატაკის მოწყობისას რიგ ადგილებში შეიჩნევა ქვედა ფუძის უსწორობები.
იატაკზე და კედელზე კერამიკული ფილების მონტაჟის რიგ ადგილებში დაფიქსირებული იქნა ფილებს შორის ნაკერების შეუვსებელი ნაწილები. ერთ ადგილას (საპირფარეშოში) დაფიქსირებული იქნა ხსნარით შეუვსებელი კედლის ფილების უკანა სივრცე.
კარების მონტაჟის რიგ ადგილებში ფიქსირდება კარის ჩარჩოსა და კედლის ღიობს შორის დარჩენილი ამოულესავი სივრცე," _ ვკითხულობთ ექსპერტიზის დასკვნაში.
აღნიშნული სამუშაოები #1 საბავშვო ბაგა-ბაღში ჩოხატაურის მუნიციპალიტეტის გამგეობასა და შპს "შემოქმედმშენს" შორის #160 ხელშეკრულების ფარგლებში გახორციელდა. სამშენებელო სამუშაოები "შემოქმედმშენის" ქვეკონტრაქტორმა კომპანიამ "ჯორჯიან კომპანიმ" შეასრულა.
ოფიციალური დოკუმენტაციის თანახმად, აღნიშნულ ბაღში სამშენებლო-სარემონტო სამუშაოები 59 565.98 ლარი დაჯდა, კარების მოწყობის სამუშაოები კი 12 639.88 ლარი.
ჩოხატაურის მუნიციპალიტეტის გამგეობის ინსპექტირების ჯგუფმა აღნიშნული სამუშაოები მიმდინარე წლის 25 აგვისტოს ჩაიბარა. მიღება-ჩაბარების აქტში წერია, რომ შესრულებულ სამუშაოებთან დაკავშირებით პრეტენზია არ არსებობს. პრეტენზიების არარასებობაზე წერს გამგებლისთვის ოფიციალურად გაგზავნილ წერილში ბაღების გაერთიანების ხელმძღვანელი ნინო ბარამიძეც. თუმცა, ამ დოკუმენტაციის მიუხედავად, როგორც ინსპექტირების ჯგუფის ხელმძღვანელი და წევრები, ასევე ბაღების გაერთიანების ხელმძღვანელი ჩვენთან საუბრისას ამბობდნენ, რომ შესრულებული სამუშაოების ხარისხი არ მოსწონდათ.
ამავე ხელშეკრულების ფარგლებში ჩოხატაურში კიდევ ოთხი ბაღი გარემონტდა. აქედან ორი _ მოქმედი ბაღია, ორი კი ჯერ კიდევ ბაღის სტატუსის მოლოდინშია. ე. წ. ამაღლების ბაღის შენობა ეკონომიკის სამინისტროს ეკუთვნის, სამების კი _ კერძოა.
ამ თემაზე "გურია ნიუსმა" საგამოძიებო ფილმიც მოამზადა, რომლითაც ფინანსური პოლიცია დაინტერესდა და გამოძება უკვე დაწყებულია.
ზემოთ აღნიშნული ექსპერტიზაც, "გურია ნიუსის" ჟურნალისტური გამოძიების შემდეგ, ჩოხატაურის მუნიციპალიტეტის გამგებლის, ირაკლი კუჭავას ინიციატივით ჩატარდა. თუმცა, მხოლოდ ერთ საბავშვო ბაღზე. არადა, ჩვენ მიერ მოკვლეული ფოტო და ვიდეო მასალებით ირკვევა, რომ ხარვეზები სხვა ბაღების შენობებშიცაა.
ირაკლი კუჭავა ამბობს, რომ ფინანსების უქონლობის გამო, ყველა შენობას ექსპერტიზას ვერ ჩაუტარებს:
_ თქვენი სტატიის გამოქვეყნების შემდეგ მოვიწვიეთ ექსპერტიზა მხოლოდ ერთ ბაღზე, რადგან ექსპერტიზის ჩატარება ძალიან ძვირია _ 2 000 ლარზე მეტი გადავიხადეთ. სხვა ბაღების შენობების შემოწმების ფინანსური რესურსი მუნიციპალიტეტს არ გააჩნია. ამ საქმეს ფინანსური პოლიციაც სწავლობს. ჩვენ ველოდებით მათ დასკვნასაც და გადაწყვეტილებებს ამის შემდგომ მივიღებთ, _ გვითხრა კუჭავამ.
"ჯორჯიან კომპანის" ხელმძღვანელი დავით კუტუბიძე ამ დრომდე აცხადებდა, რომ შესრულებულ სამუშაოებს ხარისხის პრობლემა არ ჰქონდა და ყველაფერი ხარჯთაღრიცხვის მიხედვით გაკეთდა. თუმცა, ამ დასკვნამ საწინააღმდეგო დაადასტურა.
როგორც გაირკვა, კუტუბიძეს ექსპერტიზის დასკვნა ჯერ არ უნახავს. მიუხედავად იმისა, რომ ტექსტი წავუკითხეთ და დასკვნაში ჩამოწერილი ყველა ხარვეზი გავაცანით, კომენტარი არ გააკეთა:
_ ასე ზეპირად არაფრის თქმა არ შემიძლია. ჯერ უნდა ვნახო დასკვნა, მერე შევადარო ხარჯთაღრიცხვას, შესრულებულ სამუშაოებს და ამის შემდეგ შემეძლება კომენტარის გაკეთება, _ გვითხრა კუტუბიძემ.
