გურიის ტყის მართვის სამმართველოს უფროსის თანამდებობაზე ბესიკ ქარჩავას დანიშვნას ხელი 4 აგვისტოს მოეწერა. მანამდე იგი გურიის პრივატიზაციის სამმართველოს უფროსი იყო. როგორც ქარჩავამ გვითხრა, ამ თანამდებობაზე ტყის მართვის უფროსმა და გურიის მხარის გუბერნატორმა წარადგინეს.
_ რამდენი ჰექტარი ტყეა გურიის ტერიტორიაზე, სად არის ტყეკაფები გამოყოფილი, _ ამ და სხვა მკითხველისთვის საინტერესო საკითხებზე ახლადდანიშნული მმართველი “გურია ნიუსს” ესაუბრება.
_ რამდენი ჰექტარი ტყეა გურიის რეგიონის ტერიტორიაზე და თუ მიგაჩნიათ, რომ ტყე სამრეწველო დანიშნულებით უნდა იქნეს გამოყენებული?
_ სამრეწველო გამოყენების მიზნით არის გამოყოფილი ტყის ტერიტორია. ყველაზე დიდი ტყის მასივი ლანჩხუთის რაიონშია _ 7 385 ჰა, ჩოხატაურში _ 6 351 ჰა, ოზურგეთში კი _ 3 132 ჰა. გუბერნატორის მიერ, შეჭირვებული ოჯახებისთვის დამატებით გამოყოფილია სამასალე მერქანი, დაახლოებით, 1 200 კუბურ მეტრამდე.
_ ტყის მართვაზე ზედამხედველობას ვინ ახორციელებს?
_ ენერგეტიკის სამინისტრო, უშუალოდ, მინისტრ ხეთაგურის მითითებით.
_ ვის მიერ ხდება ტყე-კაფების გამოყოფა?
_ ტყის მართვის სამსახურის მიერ.
_ თუ მიმდინარეობს ტყის აღდგენის სამუშაოები და რა კეთდება საამისოდ?
_ ძირითადად, ტყის კაფვა შეთანხმებულად მიმდინარეობს. ლანჩხუთის მუნიციპალიტეტში თხმელას პირწმინდად ჭრის უფლება აქვთ. 3-4 თვეში რომ ნახოთ, დარწმუნდებით, რომ მალე იზრდება ეს ხე, არც კი ემჩნევა, რომ ხეები მოიჭრა. იჭრება ისეთი ხეები, რომელიც ხელს უშლის პატარა ხეებს ამოსვლასა და გაზრდაში. სატყეო სამმართველოს თანამშრომლები გადიან ტყის მასივში და მუშაობენ.
_ სატყეოს თანამშრომლების რაოდენობა თუ შემცირდა?
_ შემცირება ჯერ არ მომხდარა, პირიქით, ჩატარდა სპეციალური სემინარები, მოხდება კადრების შერჩევა, რომლებიც გადამზადებას ქუთაისში გაივლიან და ველოდებით, ალბათ, მალე დაინიშნებიან სამსახურში.
_ როგორც ვიცით, სოფლებში, არის გადაბერებული ხეები.
_ ასეთი ხეები შეტანილია ტყეკაფის ზონაში და იჭრება.
_ რა დოკუმენტების წარდგენა სჭირდება მოქალაქეებს, რომ ზამთრისთვის საშეშე მერქანი მოიპოვოს?
_ მოქალაქე მიდის “ლიბერთი ბანკში”, სამ ლარს იხდის, სამიც ცალკე უნდა გადაიხადოს. დანიშნულებაში წერია, ტყეკაფის გამოყენებისთვის და ბანკშივე გეტყვიან, სად შეიძლება მერქნის მოპოვება. პრეზიდენტის მიერ ნაჩუქარი ვაუჩერები მოსახლეობას გამოუყენებელი აქვს. ამ ვაუჩერებითაც შეუძლიათ, მოგვმართონ და მიიღებენ უფლებას. ჭრა უკვე დაწყებულია. სიაც მაქვს, თუ რა რაოდენობის ტყე უნდა მოიჭრას.
_ ზოტის მოსახლეობა ითხოვდა დახმარებას, რადგან იქ ბევრი პრობლემა ჰქონდათ.
_ ზოტისთვის გამოყოფილია ზონა, ასევე _ ზემო სურებშიც.
_ მიხო სვიმონიშვილის ტყეებს თუ აკონტროლებთ?
_ ეს ჩვენ ნაკლებად გვეხება. მას ჰყავს საკუთარი რეინჯერი, მაგრამ მასალის მოჭრასა და გაყიდვაზე ჩვენს სამსახურს წარუდგენს დოკუმენტს. ჩვენ მხოლოდ კონტროლს ვახორციელებთ.
_ ბოლო დროს უკანონოდ მოპოვებული სამასალე ან საშეშე მერქანი თუ ამოიღეთ?
_ მნიშვნელოვანი _ არაფერი. სპეციალური სანქციებია დარღვევებზე _ 500 და 1000-ლარიანი ჯარიმები. უფრო დიდ თანხაზე სისხლის სამართლის საქმე აღიძვრება.
_ აქვს თუ არა ადამიანს უფლება, საკუთარ საკარმიდამო ნაკვეთში მოჭრას საშეშე მერქანი?
_ ამისთვის საჭიროა რწმუნებულის დასტური, სპეციალური დოკუმენტი. თუ მოქალაქეს სახერხზე უნდა წაღება, რწმუნებულმა უნდა მისცეს საბუთი, რომ მოჭრილია საკარმიდამო ნაკვეთში და სჭირდება სამასალედ, პირადი მოხმარებისთვის და სოფლის რწმუნებულის დასტურით უნდა მიიტანოს რეგისტრირებულ სახერხზე. რაც შეეხება საშეშე მერქანს, მას უნდა ეტყობოდეს, რომ ნამდვილად საშეშეა.
