მიმდინარე წლის ოქტომბრში, ნიგვზიანის ადმინისტრაციულ ერთეულში, სავარაუდოდ, ტურამ ან მგელმა დაკბინა თამილა სურმანიძის კუთვნილი მსხვილფეხა პირუტყვი, რომელთაც გარკვეული ხნის შემდეგ, ცოფის აშკარა კლინიკური ნიშნები დაუდგინდა.
სსიპ სურსათის უვნებლობის ეროვნული სააგენტოს გურიის რეგიონალური სამმართველოს სპეციალისტის, ხათუნა რუსიძის ინფორმაციით, ფაქტის გამოვლენისთანავე დაწესდა პირუტყვის 10 დღიანი ზედამხედველობა. აქედან მეშვიდე დღეს, მკვდარი პირუტყვის თავის შესასწავლად, სსიპ საქართველოს სოფლის მეურნეობის სამინისტროს ლაბორატორიაში გადაიგზავნა, სადაც დადასტურდა ცოფის ფაქტი.
რუსიძის თქმით, სურსათის ეროვნული სააგენტოს გურიის რეგიონალურმა სამმართველომ, ლაბორატორიის დასკვნის საფუძველზე მყისიერად მიმართა გურიის მხარის სახელმწიფო რწმუნებულის – გუბერნატორის ადმინისტრაციას, რის საფუძველზე მხარის გუბერნატორის 12 ნოემბერის (#270) განკარგულებით ლანჩხუთის მუნიციპალიტეტის სოფელი ნიგვზიანი ცოფის მხრივ არაკეთილსაიმედო, ხოლო მისი მიმდებარე ტერიტორია (2-3კმ. რადიუსი) დაავადების მხრივ საშიშროების მყოფ ტერიტორიად გამოცხადდა.
განკარგულების გამოცემისთანავე გურიის რეგიონული სამმართველოს ვეტერინარებმა, აღნიშნულ კერაში მოახდინეს 200 სული მსხვილფეხა პირუტყვის ვაქცინაცია. პროცესში ჩართული იყო ასევე მუნიციპალიტეტის ჯანდაცვის ცენტრი და გამგებლის წარმომადგენელი ნიგვზიანის ადმინისტრაციულ ერთეულში.
"თავის დროზე მთავარი პროფილაქტიკური ღონისძიებების გატარებისას მუნიციპალიტეტში აიცრა ცოფთან აქტიურად შემხებლობის მქონე 11 ათასი ძაღლი და კატა. რაც შეეხება მსხვილფეხა პირუტყვს, მისი აცრა სახელმწიფო პროგრამაში არ არის გათვალისწინებული და უშუალოდ მეპატრონის ნებაა საკუთარი ხარჯებით მოახდინოს ვაქცინაცია.
რაც შეეხება იმ ორ ადამიანს, საქონლის მესაკუთრეს და ვეტერინარს, რომელთაც კლინიკური შეხება ჰქონდათ პირტყვთან, მოხდა მათი დროული აცრა და საფრთხე მათ სიცოცხლეს არ ემუქრება", – აღნიშნა რუსიძემ.
