სვანეთიდან ქვემო ქართლში, კერძოდ, დმანისში გადასახლებული ეკომიგრანტი ფილფანების ოჯახი დახმარებას ითხოვს. ისინი საქართველოდან წასული ბერძნების ოჯახში შესახლდნენ, მაგრამ ახლა ბერძნები ბრუნდებიან და სახლის დატოვებას სთხოვენ. ფილფანების ოჯახი დმანისის ძველ საავადმყოფოში უნდა გადავიდეს, თუმცა იქ საცხოვრებელად უმძიმესი პირობებია და ლავრენტი ფილფანს ოჯახი ვერ გადაჰყავს:
"სახლი, სადაც ვცხოვრობ, ბერძნებს ეკუთვნის. სხვაზე გააფორმეს მინდობილობით და მან შეიტანა სასამართლოში განცხადება. ყოველდღიურად წერს საჩივარს, რომ გამომასახლონ. რომ ვეკითხები, ასე რატომ იქცევა, მეუბნება, რომ ამას ბერძნები სთხოვენ. გაზაფხულამდე ვთხოვე დარჩენა, სანამ შუქი გაკეთდებოდა საავადმყოფოში, მაგრამ არ მადროვეს. სანამ შუქს არ გააკეთებენ საავადმყოფოში, ცოლ-შვილი ვერ გადამყავს. მე იქ ვცხოვრობ, ბარგი გადატანილი მაქვს და ვრჩები იმ სიცივეში. შემპირდნენ, რომ 3 დღეში გაიყვანდნენ, მაგრამ ახლაც არ არის იქ შუქი", _ამბობს ლავრენტი ფილფანი.
ფილფანი გვიყვება, როგორ აღმოჩნდა მსგავს სიტუაციაში:
"სტიქიის, დიდთოვლიანობის შედეგად სახლები და კოშკიც დაგვენგრა მესტიის სოფელ ლენჯერში. ენგურის მარჯვენა შენაკადი ჩაედინება ჩვენს მახლობლად და ძალიან საშიშია საცხოვრებლად. ჩვენთან ერთად 500 კომლამდე ჩამოასახლეს. ზოგს მისცეს ორდერები, აუშენეს სახლები. ჩვენთვისაც უნდა აეშენებინათ, მაგრამ დროის და მთავრობის ცვლილებების გამო ვერ მოხერხდა და დავრჩით უსახლკაროდ. ჩემსავითაა 23 ოჯახი. მაგრამ ახლა რა მდგომარეობაშიც ვარ, ასე არავინაა", _ამბობს ის.
კავკასიის გარემოსდაცვითი არასამთავრობო ორგანიზაციების ქსელის, სენის ქვემო ქართლის რეგიონალურ კოორდინატორი მარიკო წიქორიძე ფილფანების ოჯახის მდგომარეობას კარგად იცნობს. მისი თქმით, ერთის მხრივ, კერძო მფლობელები ითხოვენ საკუთარ სახლებს, მეორეს მხრივ, ეკომიგრანტებისთვის ნორმალური საცხოვრებელი ფართის შოვნა პრობლემაა:
"ბერძნები ითხოვენ სახლის დაცლას. ეკომიგრანტების უმრავლესობა, როგორც წესი, ადგილობრივი ბერძნების სახლებში შედიოდნენ. მხოლოდ 90-იან წლებში ჩამოსახლებულ სვანებს დახვდათ სახლები აშენებული, დანარჩენებისთვის კი ვერ მოხერხდა. ისინი პიროვნული შეთანხმების საფუძველზე შედიოდნენ საქართველოდან საბერძნეთში წასული ბერძნების სახლებში. 2-3 წელია, საბერძნეთში გართულდა ვითარება. ბერძნები ბრუნდებიან. ეს ხდება წელიწადში 2-ჯერ: ახალ წელს და აღდგომას. ამ პერიოდში უფრო აქტიურდება ეს საკითხი. ბერძნები ხშირად ითხოვენ მათ სახლებში მცხოვრებისგან ქირის გადახდას, ან დაცლას. ასევე წინასწარ აფრთხილებენ, ვადას აძლევენ, დაბრუნების მომენტში რომ აღარ დახვდნენ. ესენიც ცდილობენ, მაგრამ ვერ ახერხებენ დროულად გამოსვლას", _ამბობს მარიკო წიქორიძე.
"სენის" ქვემო ქართლის რეგიონალურ კოორდინატორი დეტალურად აღგვიწერს იმ პირობებს, სადაც ეკომიგრანტებს გამოსახლების შემდეგ მოუწევთ ცხოვრება:
"ახლა ფილფანების ოჯახს სხვა გზა არ აქვს, საშინელი პირობების მქონე ძველი საავადმყოფოს შენობაში უნდა შევიდნენ. წყალი ადგილობრივი დეპუტატის მიცემული თანხით შეიყვანეს. ჩამონგრეულია პირველი სართული. თავიდან იყო საშინელი მდგომარეობა. ძველი წამლები, რომელიც შენობაში იყო, გამოყარეს გარეთ. მედიკამენტები რომ ფეთქებადი იყო, არ იცოდნენ. ხელები ამის გამო დაჩირქებული ჰქონდათ. ადგილობრივ ხელისუფლებას ვთხოვეთ და გავწმინდეთ იქაურობა. ახლა შუქია შესაყვანი და "ენერგო პრო ჯორჯიას" შეჰყავს. მანამდე გაურკვევლობა იყო თავად შენობაზე. თავიდან ეკონომიკის სამინისტროს ბალანსზე ირიცხებოდა, შემდეგ გადასცეს ლტოლვილთა და განსახლების სამინისტროს, მაგრამ ამ უკანასკნელმა არ იცოდა, რომ მისი იყო. ჩვენ რომ ვიძიებდით, გვეუბნებოდნენ, რომ ჩემი არაა, მარნეულის საავადმყოფოს დაქვემდებარებაშიაო. მარნეულის საავადმყოფო საერთოდ გონზე არ იყო არაფერზე. ახლა როგორც იქნა, გაირკვა, რომ ეკონომიკის სამინისტრომ დევნილთა სამინისტროს გადასცა. ვაჩქარებთ, რომ კვირის ბოლომდე შეიყვანონ იქ შუქი, რადგან ბავშვები ცხოვრობენ",_ ამბობს მარიკო წიქორიძე.
