“დარჩენილი ჩაის პლანტაციების ამოძირკვა და გადაწვა უნდა შეწყდეს”

გურიაში აჩეხილი, გადამწვარი და ამოძირკვული ჩაი ჩვეულებრივი ყოველდღიურობაა. გადამწვარ პლანტაციებს, წელიწადის ყოველ დროს ასდის კვამლი. წლების მანძილზე, ჩაის კულტურის განადგურების პარალელურად, არაერთხელ საუბრობდნენ ჩაის რეაბილიტაციაზე, თუმცა, უშედეგოდ.

ამჯერად, ჩაის კულტურის აღდგენისა და მისი საშუალებით გურიის, კონკრეტულად კი ოზურგეთის ეკონომიკური ყოფის წამოწევაზე, სერიოზული განაცხადია ჩაის რეაბილიტაციის სამწლიანი პროექტი : "მეჩაიეობის დარგის რეაბილიტაცია", რომელიც ოზურგეთის მუნიციპალიტეტის ეკონომიკის და სოფლის მეურნეობის სამსახურმა წარადგინა სოფლის მეურნეობის სამინისტროში.

აღნიშნული სამსახურის უფროსი გიგა ხარაბაძე ჩვენთან საუბარში ამბობს, რომ ოზურგეთის მუნიციპალიტეტში შესაძლებელია, სულ ცოტა, 2 000 ჰექტარ ფართობზე მდებარე ჩაის კულტურის აღდგენა და გადარჩენა, ოღონდ ხალხმა, დღეიდან მაინც უნდა შეწყვიტოს ჩაის ამოძირკვა:

_ ჩვენ ამჯერად წარვადგინეთ 1 000 ჰექტარი ფართობის სარეაბილიტაციო პროგრამა, რაც სოფლის მეურნეობის სამინისტროს კომისიამ განიხილა, მოიწონეს და ახლა წარედგინა მთავრობას. დიდი ალბათობით, იანვრიდან ეს პროექტი ძალაში შევა მთავრობის ძალისხმევით.

_ ბატონო გიგა, გლეხები, ყოფილი მეჩაიეები, რომლებსაც ჯერ კიდევ ძალუძთ მუშაობა, არაერთხელ გვისვამენ კითხვებს, მოხდება თუ არა ჩაის რეაბილიტაცია, რატომ გვპირდებიან და მერე რატომ ქრება ყველა დაპირებაო. ამჯერად უნდა გენდონ?

_ ნამდვილად ძალიან კარგი ამბის მომსწრე გავხდებით ძალიან მალე. სერიოზული მუშაობა დაიწყება ჩაის კულტურის სარეაბილიტაციოდ. ეს თითქმის გადაწყვეტილია.

_ რა რაოდენობის ინვესტიციაზეა საუბარი?

_ სერიოზულ თანხაზეა საუბარი, თუმცა, რაოდენობის დასახელებსგან ამჯერად თავს შევიკავებ.

_ იმის თქმა თუ შეგიძლიათ, გლეხი აგროტექნიკური ღონისძიების გასატარებლად სრულ დაფინანსებას მიიღებს თუ ნაწილობრივს?

_ რა თქმა უნდა, სრულს. უნდა ჩატარდეს მძიმე გასხვლა, მიწის დაბარვა-დამუშავება, შემოღობვა. ეს ასევე იქნება უდიდესი სოციალური პროგრამაც _ სამი ათასი ადამიანი მაინც დასაქმდება.

_ ბატონო გიგა, თუ ყველაფერი კარგად წარიმართა, ჩაის რეალიზაცია შეუფერხებლად მოხდება ან რა ანაზღაურებას მიიღებს მეჩაიე?

_ გლეხი სრულ დაფინანსებას მიიღებს გაველურებული პლანტაციის სარეაბილიტაციოდ. მას შესაძლებლობა ექნება სრულად აღადგინოს კუთვნილი პლანტაცია. მოკრეფილ კილოგრამ ჩაიში მას გადაუხდიან, მინიმუმ, 2,5 ლარს. ნამდვილად გარანტირებული იქნება მოკრეფილი ფოთლის მიღება. უახლოეს დღეებში ფირმა "გეოპლანტი" ჩაის დამფასოებელი ფაბრიკის მშენებლობას იწყებს ოზურგეთში, რაც მალე დასრულდება.

_ რამდენწლიანია ეს საკმაოდ მასშტაბური პროექტი და დანახარჯი თანხის ამოღებას როდის ელოდებით?

_ ეს არის სამწლიანი პროექტი, რომელიც ითვალისწინებს გაველურებული პლანტაციების შემოღობვას, მძიმე გასხვლას, ნიადაგის დამუშავებას. ყოველივე ამის შემდეგ, სრული გარანტია არსებობს, რომ დანახარჯს სამი წლის შემდეგ ამოვიღებთ. რაც მთავარია, გლეხი იქნება ყოველნაირად უზრუნველყოფილი _ მას ნახევრად კი არ დაეხმარებიან, სრულად და გარანტირებულად.

_ ბატონო გიგა, ჩვენი მეურნეები ამ სასიხარულო ამბავს ჩვენივე გაზეთიდან გაიგებენ. რას ეტყოდით, უფრო სწორად, რას შეპირდებით მათ?

_მათ დაეხმარებიან ისე, როგორც არასდროს. ვეტყოდი იმას, რომ კარგია ყველა კულტურის გაშენება, მაგრამ ამიერიდან მაინც შეწყვიტონ ჩაის კულტურის ამოძირკვა, გადაწვა. დამდეგი წლიდან მათ ნამდვილად ელოდებათ წარმატებული საქმიანობისთვის იდეალური თუ არა, კარგი პირობები.