ნოემბრის ბოლო კვირა და დეკემბრის დასაწყისი საუკეთესო ზამთრისწინა პერიოდია მრავალწლიანი კულტურების დასარგავად. ფერმერები ძირითადად ამ დროს და შემდეგ კი გაზაფხულზე რგავენ სხვადასხვა მრავალწლიან კულტურებს.
_ უმთავრესი, რაც თითქმის ყველას ავიწყდება, ესაა ნიადაგის მომზადება ნოემბრის ბოლოსთვის _ მოკირიანება, განოყიერება, დატერასება, ბუდნებად დაყოფა, ანუ ყველანაირი აგროწესის დაცვა, რაც აუცილებელი წინაპირობაა, თუ გვსურს, სამომავლოდ საუკეთესო პლანტაცია და ბაღი გვქონდეს.
სრულ მოსავალს აგროწესების სრული დაცვა იძლევა _ მიაკლდება რამე? მოსავალიც ნაკლები იქნება. ესაა ჩვენი მარადიული პრობლემა, თუმცა, არა ერთგზის შეგონების მიუხედავად, ფერმერები ზედმეტად თვლიან დასარგავი ნიადაგის სრულყოფილ მომზადებას. ჰგონიათ, რაკი მიწა არსებობს, ჩაარჭობ შიგ ნერგს და დამთავრდა! _ სინანულით ამბობს ცნობილი ფერმერი აკაკი ღლონტი და განსაკუთრებით მტკივნეულად აღიქვამს იმ ფაქტს, რომ მარჩენალ მიწას, ნერგი რომ ასაზრდოოს, ჩვილივით მოვლა-პატრონობა სჭირდება.
_ ნოემბრის ბოლოს, დეკემბრის შუა რიცხვებამდე, თუ მშრალი და თბილი ამინდებია, აქტიურად უნდა მოხდეს მრავალწლიანი კულტურების დარგვა. თუ ყინვაც ახლავს მშრალ ამინდს, ამ შემთხვევაში თავი უნდა შევიკავოთ დარგვისგან და ეს საქმე გაზაფხულისთვის გადავდოთ. წლევანდელი ნოემბერი გამორჩეულად თბილი და მზიანია. ამიტომ ჩვენს ფერმერებს გაორკეცებული ენერგიით შეუძლიათ დარგონ მრავალწლიანი კულტურები. გურიაში განსაკუთრებით აქტუალურია თხილის კულტურის გაშენება, რომლის რაოდენობაც ყოველ წელს მატულობს. თხილის დასარგავად განსაკუთრებით ეფექტურია ბუდნების მომზადება. მიწა აუცილებლად ორი ბარის პირის სიღრმეზე უნდა ამოვიღოთ. ორმო უნდა მომზადდეს სრული აგროწესის დაცვით, განოყიერდეს კირით, ორგანული სასუქით და შემდეგ მოხდეს დარგვა. ვიმეორებ _ უცებ დავკრათ მიწას ბარი, ნაუცბათევად ჩავარჭოთ ნერგი და რაკი არ გახმა, გვგონია, რომ დიდი საქმე გავაკეთეთ, სულ არ გავაკეთოთ, სჯობს.
რამდენად მსხმოიარე და ხარისხიანი ნაყოფის მომცემი იქნება ესა თუ ის მრავალწლიანი კულტურა, სწორედ აქედან ეყრება საფუძველი. გარდა განოყიერებისა, თუ ნიადაგი ზედმეტად ტენიანია, საჭიროა სადრენაჟე არხების გაკეთებაც. როგორც ჩვილ ბავშვს, მიწასაც ისე სჭირდება მოვლა. დილეტანტიზმმა წაგვლეკა ყველაფერში, მარჩენალი მიწის მოვლა-პატრონობაში, განსაკუთრებით! დავაკელით ბევრი? დაგვაკლდა ბევრი მოსავალი! ასე გრძელდება წლების მანძილზე და მერე ვამბობთ, რომ აღარაა მოსავალი, გაფუჭდა ჰავა, მოიწამლა ყველაფერი! არადა, ნიადაგი გამოიფიტა! განსაკუთრებით გურიაში! მას მოვლა სჭირდება და თუ სრულად არ გაანოყიერებთ, სჯობს, არაფერი დარგოთ! _ მიიჩნევს სწავლული აგრონომი.
მისივე თქმით, "რგვის პერიოდის შემდეგ, როცა ციტრუსოვანთა კრეფა დასრულდება, თუ ყინვებს არ დაიჭერს და თბილი ამინდები გაგრძელდება, აუცილებელია ციტრუსოვანთა პლანტაციების უვარგისი, ნახევრად ხმელი ტოტებისგან გასუფთავება, ნაწილობრივ გასხვლა, შემობარვა და ორგანული სასუქით განოყიერება. ამ საქმეს გაზაფხულისთვის ნუ გადავდებთ, რადგან მიუხედავად იმისა, რომ გაზაფხულზე ანალოგიური სამუშაოს ჩატარება მაინც მოგიწევთ, ახლანდელი მიხედვა, თითოეული ძირი ციტრუსოვანის თუ ხეხილის ეფექტური მსხმოიარობის საქმეს წინ წასწევს."
