თხილის სეზონი გურიაში აქტიურ ფაზას გაშორდა, თუმცა, ფასის მერყეობა არ შეწყვეტილა და მოულოდნელ ვარდნასაც განიცდის, რაზეც “გურია ნიუსი” არც თუ დიდი ხნის წინ წერდა. მოხდა ისე, რომ ჩვენ მიერ მკითხველისთვის მიწოდებული ინფორმაციის სიზუსტეში ეჭვი შეეპარა ბიზნესმენ ბეგი სიორიძეს. იგი უშუალოდ დაგვიკავშირდა და იკითხა, როდის და სად ღირდა ოზურგეთში 1 კგ თხილი 2 ლარი. მკითხველს შევახსენებთ, რომ ჩვენ ვწერდით ოქტომბრის დასაწყისში თხილის ფასის მოულოდნელი ვარდნის შესახებ, როცა “გულშიშველა”, საშუალოდ, 3 ლარი და 50 თეთრი ღირდა და უცბად 2 ლარი _ საშუალოდ, 2 ლარი და 10 თეთრი ან მაქსიმუმ, 2 ლარი და 20 თეთრი გახდა. არა ერთმა აღშფოთებულმა გლეხმა ქალაქში ჩამოტანილი თხილი უკანვე, სახლში წაიღო. მართალია, ხალხი წლების განმავლობაში შეჩვეულია, თხილის მეშვეობით, მათ ჯიბეში უსინდისო უჩინმაჩინის ხელის ფათურს, მაგრამ ორ დღეში ლარნახევრით ფასის დაწევამ, ადამიანები, ლამის, გააცოფა. შემდეგ, თხილის ფასმა ცოტათი კვლავ აიწია, მაგრამ სამლარნახევარს, როგორც ადრე ღირდა, “გულშიშველას” ფასი არც მიახლოებია.
ამ სფეროში მომუშავე ბიზნესმენის თქმით, მისთვის გაუგებარია, ვის სჭირდება ასეთი არასწორი ინფორმაციის გავრცელება, თუმცა, ამ ინფორმაციის სიზუსტე მოსახლეობამ უკეთ იცის, განსაკუთრებით, ყველა იმ ადამიანმა, რომელიც, თითქმის ყოველდღიურად აბარებს თხილს და მისით სულდგმულობს აგვისტოდან შემოდგომის ბოლომდე.
ბეგი სიორიძე 17 ოქტომბერს დაგვიკავშირდა და აღმოჩნდა, რომ კონკრეტულად “გულშიშველას” ფასზე, ამავე დღეს, თავად ჰქონდა არასწორი ინფორმაცია. მისი თქმით, იმ დღეს 1 კილოგრამი “გულშიშველას” ფასი 3 ლარი და 20 თეთრი იყო. არადა, პირადად მე, 10 წუთით ადრე ჩავაბარე ამ ჯიშის თხილი _ 2 ლარად და 90 თეთრად; თან არაერთ მიმღებ პუნქტთან ვიკითხე ფასი, თუმცა უფრო მეტი არავინ შემომთავაზა.
საბოლოოდ, ბატონი ბეგი დაგვეთანხმა და კორექტულად გვთხოვა, დავეხმაროთ ერთმანეთს, რათა თხილის ფასი დარეგულირდეს, არ იყოს ასე ნაირ-ნაირი მიმღებ-ჩამბარებლები, რომლებიც წარამარა ცვლიან თხილის ფასს.
როგორც მან თქვა, ქალაქში მიმობნეული სხვადასხვა ჯიხურებიდან ის თხილს არ ყიდულობს, თუმცა, არც ჩვენს პუბლიკაციაში ყოფილა ნათქვამი, რომ თხილის ფასის რყევაში მისი ხელი ურევია, რადგან ამის დამადასტურებელ ინფორმაციას არ ვფლობდით.
რაც შეეხება თხილის ფასებს 21 ოქტომბრისთვის; თხილის მიმღებმა პუნქტებმა ფასების უცნაური დიფერენციაცია შემოგვთავაზეს: 1 კილოგრამი სველი “გულშიშველა” _ 2 ლარი და 80 თეთრი, ნახევრად მშრალი _ 3 ლარი, ხოლო მთლიანად მშრალი _ 3 ლარი და 20 თეთრი ღირდა.
