FactCheck.ge პოლიტიკოსთა განცხადებებში ფაქტობრივი სიზუსტის დადგენის ყოველკვირეულ მიმოხილვას აქვეყნებს. რვიდან 15 დეკემბრამდე, ფაქტ-მეტრმა სხვადასხვა გადამოწმებულ ფაქტზე რამდენიმე კვლევა გამოაქვეყნა.
ყველაზე პოპულარული სტატია, ვებგვერდზე მნახველთა რაოდენობის მიხედვით, საპარლამენტო უმრავლესობის წევრის, ეკა ბესელიას განცხადებას ეხებოდა. ბესელიას თქმით, "საყოველთაო ამნისტიის შედეგად 8 723 ადამიანი გათავისუფლდა. 2013 წელს იყო 503 შემთხვევა, როდესაც მოხდა განმეორებითი დანაშაულის ჩადენა, ეს არის 6 პროცენტი. 8 200 ადამიანი აგრძელებდა ჩვეულებრივად ცხოვრებას".
ფაქტ–მეტრის მიერ მოპოვებული ოფიციალური ინფორმაციის მიხედვით, ამნისტიის ძალაში შესვლიდან 2014 წლის ნოემბრამდე, სასჯელაღსრულების დაწესებულებებიდან ჯამში 8 743 ადამიანი გათავისუფლდა. სასჯელაღსრულების, პრობაციისა და იურიდიული დახამრების საკითხთა სამინისტროს ინფორმაციის თანახმად, აღნიშნული პირებიდან 2013 წელს 523-მა, ხოლო 2014 წელს 423-მა განმეორებითი დანაშაული ჩაიდინა. 2013 წელს ამნისტირებული პირების მიერ განმეორებით ჩადენილი დანაშაულის პროცენტული მაჩვენებელი 6%-ს, ხოლო 2014 წელს 4.8%-ს შეადგენდა.
ჩვენ ასევე გამოვიკვლიეთ, რამდენად მოქმედებს ამნისტირებულთა მიერ განმეორებით ჩადენილი დანაშაული კრიმინოგენური ვითარების ერთიან სტატისტიკაზე. როგორც ბოლო მონაცემების ანალიზის შედეგად ირკვევა, ამნისტირებულთა მიერ განმეორებით ჩადენილი დანაშაულის პროცენტული მაჩვენებელი ერთიანი დანაშაულის სტატისტიკაში 2%-ს არ აღემატება.
შესაბამისად, ფაქტ–მეტრმა დაასკვნა, რომ ეკა ბესელიას განცხადება სიმართლეა.
გასულ კვირას ფაქტ–მეტრმა ჯანდაცვის მინისტრის, დავით სერგეენკოს განცხადებაც გადაამოწმა. მინისტრის განცხადების თანახმად, საქართველოში დინამიკა შეიცვალა და ბავშვთა სიღარიბის მაჩვენებელი შემცირდა.
Unicef-ის მიერ ჩატარებული ბავშვთა სიღარიბის კვლევის თანახმად, საქართველოში ბავშვთა სიღარიბე კვლავ სერიოზულ გამოწვევად რჩება. 2013 წლის მონაცემებით, ბავშვთა სიღარიბე 25%-დან 27%-მდე გაიზარდა. თუმცა, უკიდურეს სიღარიბეში მცხოვრებ ბავშვთა რაოდენობა შემცირდა.
მინისტრმა თავის განცხადებაში ხაზი გაუსვა, რომ ბავშვთა სიღარიბის დინამიკა 2013 წელს შემცირებისკენ შეიცვალა. Unicef ბავშვთა სიღარიბის კვლევას ორ წელიწადში ერთხელ ატარებს. წინა კვლევის თანახმად, 2011 წელს შემცირდა როგორც ბავშვთა ფარდობითი სიღარიბე, ასევე უკიდურესი სიღარიბეც. შესაბამისად, 2013 წელს ბავშვთა სიღარიბის მაჩვენებლის დინამიკა არათუ შემცირებისკენ, არამედ ზრდისკენ არის შეცვლილი. ხოლო ბავშვთა უკიდურესი სიღარიბის შემცირების ტენდენცია 2013 წელსაც გაგრძელდა.
მინისტრმა თავის განცხადებაში ასევე აღნიშნა, რომ ევროპის ქვეყნებში ბავშვთა სიღარიბე იზრდება. ევროკავშირში ბავშვებში სიღარიბის რისკის მაჩვენებელი 2009 წლიდან 2012 წლის ჩათვლით იზრდებოდა, 2013 წელს კი ეს მაჩვენებელი მცირედით შემცირდა. ევროპის ზოგიერთ ქვეყნებში ბავშვთა სიღარიბე მართლაც გაზრდილია, თუმცა მათ უმრავლესობაში სიღარიბის რისკის წინაშე მყოფი ბავშვების რაოდენობა მცირდება. ამასთან, ევროპის ქვეყნების სიღარიბის მაჩვენებლის საქართველოსთან შედარება არარელევანტურია, რადგანაც ევროპის ქვეყნებში საშუალო მოხმარება გაცილებით მაღალია ვიდრე ჩვენს ქვეყნაში.
შესაბამისად, დავით სერგეენკოს განცხადება მეტწილად მცდარად შეფასდა.
ფაქტ–მეტრმა კიდევ ერთი მინისტრის, დავით შავლიაშვილის განცხადებაც გადაამოწმა. ინფრასტრუქტურის მინისტრის თქმით, "სამინისტროს ბიუჯეტის 10 თვის ათვისება 630 მილიონზე მეტია. ეს არის ყველაზე მაღალი მაჩვენებელი ბოლო 7 წლის განმავლობაში".
სახელმწიფო ხაზინის ოფიციალური მონაცემებით, რეგიონული განვითარების და ინფრასტრუქტურის სამინისტროს ბიუჯეტის 10 თვის შესრულება დაახლოებით 630.9 მლნ ლარია, რაც წლიური გეგმის 72%-ს შეადგენს. 2011 წელს ეს მაჩვენებელი 632.9 მლნ ლარს შეადგენდა, რაც წლიური ბიუჯეტის 74% იყო. შესაბამისად, 2014 წლის ათი თვის ათვისების მაჩვენებელი არ არის ყველაზე მაღალი მაჩვენებელი, როგორც ამას მინისტრი მიუთითებდა. ასევე, მოსალოდნელია, რომ სამინისტრო წლის ბოლომდე ბიუჯეტს სრულად ვერ აითვისებს.
ფაქტ–მეტრის დასკვნით, დავით შავლიაშვილის ეს განცხადება ნახევრად სიმართლეა.
გასულ კვირას ფაქტ–მეტრმა თბილისის საკრებულოს უმცირესობის წევრის, ირაკლი აბესაძის განცხადებაც გადაამოწმა. მიმდინარე წლის ოქტომბერში, საზოგადოებრივი მაუწყებლის ეთერში თბილისის მერმა განაცხადა, რომ მას დახვდა "გამოცარიელებული" ბიუჯეტი. საპასუხოდ, საკრებულოს წევრმა, ირაკლი აბესაძემ ქალაქის მერს შეკითხვით მიმართა: "დავით ნარმანიამ თქვა, რომ მას დახვდა გამოცარიელებული ბიუჯეტი. მე მინდა ბატონ დავითს დავუსვა შეკითხვა: "გამოცარიელებული" ფინანსების პირობებშიც, წლის ბოლომდე, რატომ ახერხებს ის დააფინანსოს მილიონ ორასი ათასი ლარით კანცელარიის ტერიტორიის კეთილმოწყობის პროექტირება, კანცელარიის შენობის განათება 450 000 ლარით და შსს-ს შენობის ტერიტორიის განათება 460 000 ლარით. ის ორ მილიონს გამოცარიელებული ფინანსების პირობებში ხარჯავს ისეთ პროექტებზე, რომელიც მხოლოდ მინისტრების კომფორტისთვისაა”.
ფაქტ–მეტრმა აღნიშნული ფაქტი გადაამოწმა. კვლევის შედეგად აღმოჩნდა, რომ დავით ნარმანიას მერად არჩევის დროს (ივლისის თვის მონაცემებით), ბიუჯეტის შემოსულობებსა და გადასახდელებს შორის სხვაობა 5 მილიონი ლარი იყო, 9 თვის ბიუჯეტის ანგარიშის მიხედვით კი, ეს სხვაობა 35.6 მილიონი ლარია. თბილისის ბიუჯეტი და ფიონანსები "გამოცარიელებული" არ იყო, როგორც ეს დავით ნარმანიამ შეაფასა. ასევე, ფაქტია, რომ თბილისში ფინანსების სიმცირის გამო 2014 წელს დაგეგმილი პროექტების მიმდინარეობა არ შეფერხებულა.
მიმდინარე ბიუჯეტის პირობებში კანცელარიის მიმდებარე ტერიტორიის კეთილმოწყობის (1 200 000 ლარი), კანცელარიის შენობის გარე განათების (450 000 ლარი) და აგრეთვე შსს-ს შენობის გარე განათების დაფინანსებისთვის თანხები (434 000 ლარი) მართლაც გამოყოფილია.
ზემოთ აღნიშნული გარემოებების გათვალისწინებით, ფაქტ–მეტრმა დაასკვნა, რომ ირაკლი აბესაძის განცხადება სიმართლეა.
