პარტია "გაერთიანებული დემოკრატიული მოძრაობის" დევნილთა საკითხების კოორდინატორი, მამუკა აჩბა, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს, დევნილების მოტყუებაში ადანაშაულებს.
"საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრო განაგრძობს ხალხის მოტყუებას და ის პროექტები, რომლებიც ასახულია, როგორც სამინისტროს ვალდებულებებში, ასევე სახელმწიფო ბიუჯეტში რეალურად ან არ სრულდება, ან სრულდება გამონაკლის შემთხვევებში გაურკვეველი გარიგების საფუძველზე", _ ამბობს მამუკა აჩბა და ამის მაგალითად მინისტრის 2013 წლის 9 აგვისტოს N 320 ბრძანების ჯეროვნად არ შესრულება მოჰყავს.
"დევნილთა საცხოვრებლით უზრუნველყოფის წესში" რამდენიმე დღის წინ, შეტანილი იქნა ცვლილებები, რის საფუძველზეც დევნილთა ნებისმიერი ოჯახი, რომელიც 1 ან 2 წევრისაგან შედგება და განაცხადებს თანხმობას რეგიონში ეზო-კარის ან სხვა ტიპის საცხოვრებლის შეძენაზე და საცხოვრებლად გადასვლაზე, სამინისტრო 17000 ლარის ფარგლებში სოფლად კერძო საკუთრებაში არსებული სახლების/ბინის შესყიდვას სთავაზობს, ხოლო ოჯახში წევრთა რაოდენობის ზრდასთან ერთად გამოყოფილი თანხაც იზრდება. ჩვენთვის მოწოდებული ინფორმაციით, ამ ბრძანებულების საფუძველზე მხოლოდ რამდენიმე ოჯახი იქნა დაკმაყოფილებული და ისიც დიდი მოლაპარაკებებისა და სავარაუდოდ, უკანონო გარიგებების შედეგად. მოკლედ რომ ვთქვათ "ჩაწყობით".
დევნილების 99% ვინც ჩვენთან მოდის, გვეუბნება, რომ ქულებს აკმაყოფილებს, მაგრამ სამინისტრო ფართს მაინც არ აძლევს და იმათ უკმაყოფილებენ ბინებზე მოთხოვნებს, ვისაც ამისთვის საკმარისი ქულა არ აქვთ. სწორედ აქ ვხედავთ კორუფციის ნიშნებს", _აღნიშნავს აჩბა.
"გაერთიანებული დემოკრატიული მოძრაობის" დევნილთა საკითხების კოორდინატორი დევნილების არაინფორმირებულობის პრობლემაზეც საუბრობს:
"სამინისტროს არცერთი ნაბიჯი არ გადაუდგამს და არანაირი ღონისძიება არ გაუტარებია ამ ინიციატივის ხალხისათვის გასაცნობად. ძალიან გვეეჭვება, რომ სამინისტროს ვებ-გვერდზე გამოქვეყნებული ბრძანებულებები ხელმისაწვდომი იყოს და საერთოდ ინტერნეტი ხელმისაწვდომი იყოს იმ ადამიანებისთვის, ვისაც ეს ინიციატივა ეხება. ყველასათვის ცნობილია, რომ დევნილთა საყოფაცხოვრებო პირობები უკიდურესად მძიმეა, ადამიანებს ხშირ შემთხვევაში ელემენტარული ყოველდღიური პურის ფულიც კი არ აქვთ, არათუ ინტერნეტით სარგებლობის საშუალება",_ამბობს აჩბა.
დევნილთა სამინისტროს წლიურ ანგარიშში აღნიშნულია, რომ პროექტ "სოფლად სახლის" ფარგლებში სამინისტრომ 364 სახლი შეისყიდა. მამუკა აჩბა ამბობს, ბინების ეს რაოდენობა ერთ ადგილზე გაიცა.
ანუ ის ბინები, სადაც ადრე დევნილები ცხოვრობდნენ, დაუკანონდათ და საერთო არაფერი აქვს "სოფლად სახლის" პროექტთან. იგი ბინების გაცემის კრიტერიუმებსაც აკრიტიკებს.
"სამოქმედო გეგმაში დაკონკრეტებული არ არის თუ რა კრიტერიუმით უნდა მოხდეს შესასყიდი სახლის/ბინის შეფასება, რაც სამინისტროს მანიპულირების საშუალებას აძლევს. საზოგადოებისათვის ასევე არ არის ცნობილი, თუ რამდენმა დევნილმა შეიძინა ზემოთ ხსენებული ბრძანების საფუძველზე სახლები სოფლად და რა თანხა დახარჯა დევნილთა სამინისტრომ ამ საქმიანობისთვის. მე მხედველობაში არ მყავს თბილისში მცხოვრები 86 ათასი დევნილი. საუბარია რეგიონებში მცხოვრებლებზე. ისინი საკუთარ გამგებლებზე არიან მიმაგრებულები, რომ როგორმე გამოუყონ მიწის ნაკვეთები",_ აცხადებს აჩბა.
სამინისტროს ანგარიშში კი კრიტერიუმების შესახებ ვკითხულობთ:
"დევნილი ოჯახი თავადაა ჩართული სახლის მოძიების პროცესში, რომელსაც სამინისტრო მათთვის, კრიტერიუმების შესაბამისად, შეიძენს. რაც მთავარია, კრიტერიუმები ჩამოყალიბდა ახალი რედაქციით და თანხის რაოდენობა ოჯახის სულადობიდან გამომდინარე განისაზღვრა",_ აღნიშნულია სამინისტროს ანგარიშში.
საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრო მინისტრის 2013 წლის 9 აგვისტოს N320 ბრძანებაში- "დევნილთა საცხოვრებლით უზრუნველყოფის წესი" განხორციელებულ ცვლილებებს განმარტავს:
"დევნილთა საკითხების შემსწავლელი კომისია, განსაზღვრავს კერძო საკუთრებაში არსებული საცხოვრებელი ფართის (სახლი/ბინა) შესყიდვისთვის, სახელმწიფო ბიუჯეტიდან სამინისტროსათვის გამოყოფილი ასიგნებების ფარგლებში, ნასყიდობის ღირებულების მაქსიმალურ ოდენობას. დევნილ ოჯახს, რომელიც 1 ან 2 წევრისგან შედგება, სამინისტრო საცხოვრებელ ფართს არაუმეტეს 17 000 ლარის ფარგლებში შეუსყიდის, 3 ან 4 წევრის შემთხვევაში მაქსიმალურ თანხად 21 000 ლარი განისაზღვრა, თუ დევნილი ოჯახში 5–7 წევრია თანხა არაუმეტეს 26 000 ლარს შეადგენს, ხოლო თუ ოჯახში 8, ან მეტი წევრია, საცხოვრებელი ფართის შესყიდვის მაქსიმალური თანხა 31 000 ლარი იქნება. ცვლილებების განხორციელებამდე, ყველა დევნილ ოჯახს სოფლად კერძო სახლის შეძენა 20 000 ლარის ფარგლებში შეეძლო, არ იყო გათვალისწინებული ოჯახის წევრების რაოდენობა. ახალი მიდგომა უფრო მეტად მოქნილია და მორგებულია დევნილი ოჯახების საჭიროებებზე. ცვლილებების შედეგად ასევე განისაზღვრა, დევნილი ოჯახის წევრთა რიცხოვნების გათვალისწინებით, საცხოვრებელი ფართის საორიენტაციო სტანდარტები", _აღნიშნულია სამინისტროს განცხადებაში.
