საქართველოს მთავრობა სასჯელაღსრულების სისტემის რეფორმირებასაც იწყებს.
ამის შესახებ მთავრობის დღევანდელ სხდომაზე პრემიერ-მინისტრმა ირაკლი ღარიბაშვილმა ისაუბრა.
მთავრობის მეთაურის განმარტებით, პროცესში ხელისუფლებასთან ერთად არასამთავრობო სექტორიც იქნება ჩართული.
“სასჯელაღსრულების სამინისტროში ძალიან მნიშვნელოვანი რეფორმა იწყება. ამას სჭირდება თანადგომა მთავრობის მხრიდან. პროცესში არასამთავრობო სექტორიც იქნება ჩართული და ის მაქსიმალურად გამჭვირვალედ წარიმართება”, – განაცხადა პრემიერ-მინისტრმა.
გარდა ამისა, უნდა აღინიშნოს, რომ ცოტა ხნის წინ პრემიერმა ირაკლი ღარიბაშვილმა გახსნილად გამოაცხადა მსჯელობა შინაგან საქმეთა სამინისტროდან უსაფრთხოების ბლოკის გამოყოფაზე და ცალკე სამსახურად ჩამოყალიბებაზე, თუმცა, რა კონკრეტული ღონისძიებების გატარება იგეგმება, ძალოვან უწყებაში და იქნება თუ არა ეს შსს-სს ძირეული რეფორმა, უცნობია.
"შეიძლება უსაფრთხოების ბლოკი გამოეყოს ცალკე სახელმწიფო უსაფრთხოების სააგენტოს სახით, სადაც სპეცსამსახურები შევლენ და ცალკე იქნება პოლიციური დანაყოფები. ეს არის იდეის დონეზე და ახლა ამას სჭირდება კარგი დაგეგმარება,“ – აღნიშნა ღარიბაშვილმა.
ცნობისთვის, დღეისთვის შსს-ს დაქვემდებარებაში შედის სამინისტრო 26 დეპარტამენტი, 11 რეგიონული სააგენტო და 6 საჯარო სამართლის იურიდიულ პირი და დაახლოებით, 35 000 ათასი ადამიანია დასაქმებული.
შინაგან საქმეთა სამინისტროსთან ერთად, მთავრობა ასევე იწყებს პროკურატურის რეფორმირებასაც. თუმცა, ჯერჯერობით ამ შემთხვევაშიც არ არიან ჩამოყალიბებულები, პროკურატურის ორგანოები აღმასრულებელი ხელისუფლების ფარგლებში უნდა იყოს თუ გამოეყოს.
არც ისაა გააზრებული, გამოყოფის შემთხვევაში სად უნდა გადავიდეს უწყება, ვის მიმართ უნდა იყოს მთავარი პროკურორი ანგარიშვალდებული და შესაძლებელია თუ არა იუსტიციის მინისტრს, რომელსაც გენერალური პროკურორის უფლებამოსილება ჰქონდა და რეფორმის შემდეგ, 2013 წლის 25 ივნისს ჩამოერთვა, ისევ დაექვემდებაროს.
