საპროტესტო აქცია მიმდინარეობს ამ წუთებში აჭარაში, სადაც სოფელ გონიოს მოსახლეობამ სარფში მიმავალი გზა გადაკეტა და რეგიონის ხელისუფლებისაგან გონიოსყოფილი მეურნეობის მიწების პროვატიზაციას ითხოვს. საპროტესტო აქციას უფლებადამცველი თამაზ ბაკურიძე ხელმძღვანელობს, რომელიც აცხადებს, რომ ეს ხალხი ითხოვს ამ მიწების, მათ საკუთრებაში დაბრუნებას, რომელიც ჯერ კიდევ წინა ხელისუფლებამ მათ გადასცა და შემდეგ წაართვა.
აქციის მონაწილეები მათთან შესახვედრად აჭარის მთავრობის იმ წევრების მისვლას მოითხოვენ, რომლებიც სხვადასხვა პერიოდში ამ მიწის ნაკვეთების საკუთრებაში გადაცემას და საკითხის მოგვარებას ჰპირდებოდნენ.
გონიოს მეურნეობის ყოფილი მიწების საკუთრებაში გადაცემას მეურნეობის ტერიტორიაზე მცხოვრები ადამიანები წლებია ითხოვენ. ეს პრობლემა დიდი ხანია პოლიტიკურ პრობლემად იქცა და პოლიტიკოსები ხშირად საარჩევნო მანიპულაციების დროსაც კი იყენებენ.
მდგომარეობას ამწვავებს ის ფაქტი, რომ ეს მიწები მდებარეობს გონიოს ციხის მიმდებარე ადგილებში, რომელსაც ეროვნული მნიშვნელობის კულტურის ძეგლის სტატუსი აქვს მინიჭებული. ციხის გარეთ, უზარმაზარ ტერიტორიაზე უძველესი კოლხური ნაქალაქარი მდებარეობს, რომელიც არქეოლოგიურად ჯერჯერობით სუსტად არის შესწავლილი. თუმცა, გერმანული სადაზვერვო ჯგუფის მუშაობის შედეგად იქ ამფითეატრი, იპოდრომი და დასახლების ნაშთები აღმოჩნდა.
აქედან გამომდინარე კი აღნიშნული მიწების საკუთრებაში გაცემა ძეგლის განადგურებას გამოიწვევს.
აჭარის კულტურული მემკვიდრეობის დაცვის სააგენტოს წარმომადგენლის ლაშა ასლანიშვილის განცხადებით, მიწის ნაკვეთები, რომელთა საკუთრებაში გადაცემასაც მოსახლეობა ითხოვს, არქეოლოგიური დაცვის ზონაში მდებარეობს და იქ ნებისმიერი სახის მშენებლობა დაუშვებელია. რადგანაც არ არსებობს ამ მოთხოვნის კონტროლის მყავრი მექანიზმი აუცილებელია ამ საკითხების ისე მოგვარება, რომ ძეგლი არ განადგურდეს.
ამ დროისთვის გონიოს ციხის მიმდებარე ტერიტორიაზე, ბოლო წლებში აგებული რამდენიმე სახლი დგას. მათ შორის ერთ-ერთი ვინმე დუმბაძეს ეკუთვნის და მასზე ნებართვა ბათუმის მერიის შესაბამის სამსახურს კანონდარღვევით აქვს გაცემული. თუმცა, ამ სახლის, რომელიც ორი წლის წინ აშენდა, დემონტაჟის საკითხი ჯერჯერობით არ განიხილება.
აჭარის თავმჯდომარე არჩილ ხაბაძემ კი რამდენიმე დღის წინ განაცხადა, რომ "უმაღლეს საბჭოსთან ერთად ჩვენ შევიმუშავეთ კანონში შესატანი ცვლილება და შეგვეძლება სამუდამოდ გადავჭრათ ეს პრობლემები. ბევრია ცდუნება, ბევრი კორუფციის ნიშანია, მაგრამ ეს აუცილებლად უნდა განვახორციელოთ. ვინც დაიჩაგრა, ვისაც ეკუთვნის მიწის ნაკვეთი, უნდა მიიღოს. ეს ერთ თვეში და ერთ დღეში არ მოხდება, მაგრამ პოლიტიკური ნება არის".
