ოზურგეთის მუნიციპალიტეტის საჯარო მოხელეთა კონკურსში მონაწილე რევაზ ჩაიძე, "გურია ნიუსის" საშუალებით, მუნიციპალიტეტის გამგებელ მერაბ ჭანუყვაძეს პასუხობს.
შეგახსნებეთ, რომ ჭანუყვაძე გამოცემასთან საუბრისას აღნიშნავდა:
"რევაზ ჩხაიძის თქმით, კომისიის გადაწყვეტილება არაობიექტური იყო, რაშიც ვერ დავეთანხმები.
ეს პიროვნება, რევაზ ჩხაიძე იყო ჩემთან, ჩვენ ვისაუბრეთ. როდესაც ტენდენციურობაზე საუბრობს, იქნებ გაიხსენოს, როგორ მეუბნებოდა, რომ მას ეკუთვნოდა ადგილი.
იქნებ დააკონკრეტოდ რატომ? ტენდენციურობა სწორედ ეს არის" _ აღნიშნა გამგებელმა.
აპლიკანტ რევაზ ჩხაიძის თქმით კი, როცა ის გამგებელს ესაუბრა, ჭანუყვაძეს კონკრეტული შენიშვნები არ ჰქონდა, არც უკმაყოფილი ყოფილა.
"მითხრა, შენს მიმართ განწყობაც კარგი მაქვს, მაგრამ რა ვქნა, ასეთი გადაწყვეტილება მივიღეთო.
რაც შეეხება ჩემს "ტენდენციურობას", მე მას ვუთხარი, რომ თუ არანაირი მნიშვნელობა არა აქვს არც განათლებას, არც ტესტირების შედეგებს, ზოგადად ადამიანის შესაძლებლობებს, წმინდა ადამიანურად ის ამაგი რომ გაეთვალისწინებინა, რაც მამაჩემს მიუძღვის ამ ქალაქის წინაშე, ერთი ადგილი ამის გათვალისწინებით მეკუთვნის-მეთქი.
მე მას ვუთხარი, რომ ადამიანები ასეთი გზით არ უნდა ინიშნებოდნენ სამსახურში, თუმცა თქვენ სწორედ ასეთი გზით და ამ მიდგომით ნიშნავთ ადამიანებს თანამდებობებზე-მეთქი.
საზოგადოებას მინდა ვუთხრა, მამაჩემი, გურამი ჩხაიძე, თითქმის ოცდახუთი წლის განმავლობაში გახლდათ ოზურგეთის ტუბ.დისპანსერის მთავარი ექიმი, რენტგენოლოგი. ნებისმიერი ღირსეული და საღად მოაზროვნე ოზურგეთელი დამეთანხმება, რომ ის იყო თავისი საქმის უზადო პროფესიონალი, ღირსეული და ღვაწლმოსილი ექიმი. მას სრულიად უანგაროდ, ძალიან ხშირად თავისი სახსრებითაც არაერთი ადამიანი უხსნია სიკვდილისაგან, თუმცა მე ამას არავის ვაყვედრი, მას ამ საქმის კეთება უდიდეს სიამოვნებას ანიჭებდა.
ჩემთვის საჯარო სამსახურში მუშაობა არ არის იდეაფიქსი, თუმცა მოვლენებს ისეთი მსვლელობა მიეცა, რომ ამ საკითხმა უკვე პრინციპული მნიშვნელობა შეიძინა.
მოვითხოვ დანიშვნას ჩემი შედეგების, ჩემი შესაძლებლობების, ჩემი ცოდნის გათვალისწინებით.
დადონ თუნდაც ერთი კანდიდატის შედეგები, რომელმაც ჩემზე უკეთესი შეფასება მიიღო ტესტირების ეტაპზე, ან არგუმენტირებულად დაასაბუთონ, რომ მან ჩემზე უკეთესი უნარ- ჩვევები ან გონებრივი შესაძლებლობები გამოავლინა და მე საჯაროდ მოვიხდი ბოდიშს.
ის, რაც ოზურგეთში ხდება საჯარო სამსახურის მოხელეთა კონკურსთან დაკავშირებით, ეს არის უსამართლობის, არაობიექტურობის ზეიმი, ადგილობრივი ხელისუფლების "გმირული ეპოპეა". რა თქმა უნდა, მე ბოლომდე ვიბრძოლებ ჩემი ინტერესების დასაცავად.
მივმართავ ცენტრალურ ხელისუფლებას, საქართველოს მთავრობას – ჩემი უმორჩილესი თხოვნაა, ნუ წაიყრუებთ პერიფერიებში განვითარებულ მოვლენებს, სახელდობრ, ის რაც ოზურგეთში ხდება ერთობ საყურადღებო და ძალიან სერიოზული პრობლემაა. ასეთი საკითხების მოუგვარებლობა , ბატონებო, როგორც მინიმუმ გამოიწვევს საჯარო სამსახურში ინტელექტის, აზროვნების დეფიციტს, ქვეყნიდან კვალიფიციური კადრების გადინების პროცესი კიდევ უფრო მასშტაბურ სახეს მიიღებს. ეს, რბილად რომ ვთქვათ, კარგს არაფერს უქადის ჩვენს ქვეყანას. არც ის მგონია, ამ პროცესებმა დადებითი ასახვა ჰპოვოს თქვენ რეიტინგსა და ავტორიტეტზე", _ აღნიშნავს რევაზ ჩხაიძე .
