როგორ ხდებოდა ოზურგეთის მუნიციპალიტეტის გამგეობის მხრიდან მუნიციპალიტეტში შპს – ების მიერ შესრულებული სამუშაოების ღირებულების ანაზღაურება და ახორციელებდა თუ არა მუნიციპალიტეტი შესყიდვებს, სახელმწიფო შესყიდვების გვერდის ავლით, ამასთან დაკავშირებით ოზურგეთის მუნიციპალიტეტის 2012 -2013 წლების საქმიანობის შესაბამისობის აუდიტის დასკვნაში აღნიშნულია:
"2012 წელს ოზურგეთის მუნიციპალიტეტმა სახელმწიფო შესყიდვების კანონმდებლობის მოთხოვნათა გვერდის ავლით განახორციელა სხვადასხვა საქონლისა და სამუშაოების შესყიდვა საერთო ღირებულებით 71, 8 ათასი ლარი. შეძენილი საქონელი არ იყო ასახული ორგანიზაციის შესყიდვების წლიურ გეგმაში და არც სახელმწიფო შესყიდვების სააგენტოს მიეწოდა ანგარიში განხორციელებული შესყიდვების შესახებ. შედეგად მუნიციპალიტეტის მიერ არ არის უზრუნველყოფილი სახელმწიფო შესყიდვების კანონმდებლობით განსაზღვრული შესყიდვის პროცესის ანგარიშვალდებულება, გამჭვირვალობა და მონეტარული ზღვრების დაცვა.
აუდიტის ჯგუფმა ვერ მოიპოვა სარწმუნო მტკიცებულებები გაწეული ხარჯის მიზნობრიობის შესახებ. შესაბამისად ჯგუფი ვერ გამოთქვამს მოსაზრებას ხარჯის გაწევისას რამდენად არის გათვალისწინებული მუნიციპალიტეტის ინტერსები", _ აღნიშნულია აუდიტის დასკვნაში.
2012 წლის პირველი ივლისის შემდგომ გაფორმებული ხელშეკრულებების ფარგლებში მუნიციპალიტეტის მიერ ხარჯები ანაზღაურებულია ფაქტობრივად გაწეული დანახარჯების დოკუმენტების წარმოდგენის გარეშე.
2013 წელს გამარტივებული შესყიდვების ფორმით გაფორმებული ხელშეკრულებებით (20 შეთხვევა), სამუშაოს შემსრულებლებს ეკისრებოდათ ვალდებულება, რომ ნებისმიერი საქონლის შეძენის დოკუმენტაცია წარედგინათ შემსყიდველისათვის. მიუხედავად აღნიშნული მოთხოვნისა, სამუშაოს შემსრულებლებთან მუნიციპალიტეტმა ანგარიშსწორება განახორციელა ფაქტობრივი დანახარჯების დამადასტურებელი დოკუმენტების გარეშე.
მუნიციპალიტეტის მიერ გაწეული ხარჯების, შესრულებულ სამუშაოებთან შესაბამისობით დასადგენათ აუდიტის ჯგუფის მოთხოვნით, სამუშაოების შემსრულებლებმა ფაქტობრივად გაწეული ხარჯების დამადასტურებელი დოკუმენტაცია არასრულად აუდიტის მიმდინარეობისას წარუდგინა ოზურგეთს მუნიციპალიტეტს, სადაც აღნიშნული დოკუმენტაციის ანალიზით გამოვლენილია შემდეგი გარემოებები:
"2012 წლის აგვისტოში ოზურგეთს მუნიციპალიტეტსა და შპს " ე.ე.ე" -ს შორის გაფორმებულია ექვსი ხელშეკრულება, საერთო ღირებულებით 548, 8 ათასი ლარი, რომელიც ითვალისწინებდა მუნიციპალიტეტის სოფლებში გზების სარეაბილიტაციო სამუშაოების შესრულებას. აღსანიშნავია, რომ "ე.ე.ე." -ს ოზურგეთის მუნიციპალიტეტის დაკვეთით შესრულებული სამუშაოების დაწყებამდე არ გააჩნდა მსგავსი სამუშაოების შესრულების გამოცდილება. მუნიციპალიტეტმა აუდიტს ჯგუფს ვერ წარუდგინა საკმარისი და შესაფერი მტკიცებულებები იმასათან დაკავშირებით, თუ რა კრიტერიუმებით იქნა შერჩეული აღნიშნული შემსრულებელი.
მიუხედავად გამოუცდელობისა, მუნიციპალიტეტმა შპს "ე.ე.ე"-სთან გააფორმა 2 ხელშეკრულება გამარტივებული შესყიდვის ფორმით, ხოლო 4 ხელშეკრულება გაფორმებულია პირდაპირი შესყიდვით ( თანხები გამოყოფილია პრეზიდენტის ფონდიდან) გამარტივებული შესყიდვით შესრულებული სამუშაოების ღირებულება – 248, 1 ათასი ლარი, ოზურგეთის მუნიციპალიტეტის მიერ ანაზღაურებულია ფაქტობრივად გაწეული დანახარჯების დოკუმენტების წარმოდგენის გარეშე.
2012 წლის 14 აგვისტოს გაფორმდა ხელშეკრულება #309, რომელიც ითვალისწინებდა დვაბზუ-მელექედურის გზის მოხრეშვითი სამუშაოების შესრულებას, ღირებულებით 145, 1 ათასი ლარი, შპს " "ე.ე.ე" -ის ხელმძღვანელის განმარტებით, სამუშაოების მიმდინარეობისას შპს " ე.ე.ე" განკარგავდა ოზურგეთის მუნიციპალიტეტის სოფელ მერიაში იჯარით აღებულ კარიერს, საიდანაც იღებდა მოხრეშვისთვის გამოყენებულ ინერტულ მასალებს. შპს " ე.ე.ე." -ის ხელმძღვანელის მიერ წარმოდგენილი კალკულაციის მიხედვით 1 კუბ. მ ღორღის ფასი შეადგენდა- 9.3 ლარს, ხოლო #2 -ის მიხედვით, მასალის ღირებულება შეადგენდა – 12 ლარს, ხოლო ტრანსპორტირების ღირებულება – 4, 45 ლარს, წარმოდგენილი ფორმა #2 მიხედვით, მასალის ღირებულება შადგენდა – 12 ლარს, ხოლო ტრანსპორტირება – 16, 8 ლარს.
შპს " ე.ე.ე" გზის მოსახრეშად გამოიყენა 2400 კუბ.მ. ღორღი. სხვაობა კალკულაციით განსაზღვრულ ფასსა და ფორმა #2 ით წარმოდგენილს შორის შეადგენს – 50, 6 ათას ლარს. გარდა აღნიშნულისა, ფორმა #2 -ის მიხედვით გზის მორწყვით სამუშაოებზე გახარჯულია 10, 2 ათასი ლარი, რაც მოიცავდა ასევე წყლის ღირებულებას. სამუშაოს შესრულებაზე პასუხისმგებელი პირის განმარტებით მოსარწყავი მანქანის იჯარაზე გაცემულია 0, 4 ათასი ლარი, ხოლო წყალი აღებულია უფასოდ მდინარე ნატანებიდან. აღნიშნულ სამუშაოებზე ხარჯის დამადასტურებელი დოკუმენტაცია ვერ იქნა წარმოდგენილი.
მიმწოდებელს სამუშაოების შესასრულებლად დაქირავებული ჰყავდა მექანიზმები, რომელთა საჯარო ღირებულება შეადგენდა 52, 5 ათას ლარს, ხოლო შესრულებული სამუშაოების მიხედვით, მანქანა – მექანიზმების საიჯარო თანხაზე დარიცხულია გეგმური დაგროვება (8%) და ზედნადების ხარჯები ( 10%) , რაც ჯამურად შეადგენს 11, 1 ლარს.
ზემოთ აღნიშნულის შედეგად და წარმოდგენილი დოკუმენტების მიხედვით, ოზურგეთის მუნიციპალიტეტს # 309 ხელშეკრულებით შესრულებული სამუშაოების ფარგლებში, შპს " ე.ე.ე." – ისათვის დაუსაბუთებლად აქვს გადახდილი 71, 9 ათასი ლარი", _ აღნიშნულია აუდიტის დასკვნაში.
