გადაუდებელი აუცილებლობის დროს ჩხრეკა-ამოღება გამომძიებლის დადგენილების გარეშე არ ჩატარდება. ამ მიმართულებით "სისხლის სამართლის საპროცესო კოდექსში" არაფერი შეიცვლება.
შესაბამისი გადაწყვეტილება ადამიანის უფლებათა დაცვის კომიტეტის დღევანდელ სხდომაზე პროექტის ავტორებმა არასამთავრობო ორგანიზაციების კრიტიკული არგუმენტების მოსმენის საფუძველზე მიიღეს.
არასამთავრობო ორგანიზაციები კანონში შესატან ცვლილებაზე ფიქრობდნენ, რომ გამომძიებლის მიერ დადგენილების გამოტანის ვალდებულების გაუქმება ადამიანის უფლებრივ მდგომარეობას ზღუდავდა და არსებულ მდგომარეობას აუარესებდა.
პარლამენტის ადამიანის უფლებათა დაცვის კომიტეტის თავმჯდომარე ეკა ბესელია ამბობს, რომ გამომძიებლის მიერ დადგენილების გამოტანის ნორმა ისევე დარჩება, როგორც ამას "სისხლის სამართლის საპროცესო კოდექსი" ითვალისწინებს.
"ამასთან, გთავაზობთ, სასამართლოს პრაქტიკის გაანალიზებით და დეტალური შესწავლით საკითხს მოგვიანებით დავუბრუნდეთ და უკეთესი ფორმულირება მოვძებნოთ", _ აღნიშნა ბესელიამ.
"სისხლის სამართლის საპროცესო კოდექსში" დაგეგმილი ცვლილებების ერთ-ერთი ავტორის გედევან ფოფხაძის განმარტებით კი, კანონპროექტის მომზადება ტექნიკური ხარვეზის გასწორებით იყო მოტივირებული, თუმცა, მისივე თქმით, არასამთავრობო ორგანიზაციების არგუმენტები და ხედვები რეალობას სხვაგვარად წარმოაჩენს.
ფოფხაძემ არასამთავრობო ოპრგანიზაციების პოზიციას გაზვიადებულად მიიჩნევს, თუმცა აღნიშნავს, რომ სჯობს, "სისხლის სამართლის საპროცესო კოდექსის" შესაბამისი მუხლი ისე დარჩეს, როგორც არის და მსჯელობა გაგრძელდეს.
შეგახსენებთ, რომ "სისხლის სამართლის საპროცესო კოდექსში" იგეგმებოდა ცვლილება, რომლის მიხედვით, გადაუდებელი აუცილებლობის შემთხვევაში ჩასატარებელ ჩხრეკა-ამოღებისას, გამომძიებლის მიერ შესაბამისი დადგენილების გამოტანა საჭირო აღარ იქნება. ასეთ დროს საკმარისი ხდება გამომძიებელმა პირს, რომელთანაც საგამოძიებო მოქმედება ტარდება, ჩხრეკის თუ ამოღების საფუძველი ზეპირსიტყვიერად განუმარტოს.
ამ კანონპროექტს საპარლამენტო უმრავლესობის ნაწილი, ასევე ოპოზიციაც მხარს არ უჭერდა, რადგან მიიჩნევდნენ, რომ კანონში ცვლილების შემთხვევაში, ადამიანის უფლებები საფრთხის ქვეშ დადგებოდა.
ცნობისთვის, კანონპროექტის ავტორები არიან დეპუტატები: გედევან ფოფხაძე, მანანა კობახიძე, ზვიად კვაჭანტირაძე, დავით საგანელიძე და პაატა კიკნაველიძე.
