მიტოვებულ შენობაში აღმოჩენილი უნიკალური ბუხარი ხელოვნების სასახლეში გააგრძელებს ცხოვრებას. კერამიკით მოპირკეთებული ბუხარი ყველაზე დიდია მუზეუმის ფონდებში აქამდე დაცულ ექსპონატებს შორის. გამოყენებითი ხელოვნების უნიკალური ნიმუში, დამზადებულია რუსეთის იმპერატორის კარის ოსტატების მიერ ქალაქ ვიტებსკში, ბრონისლავ იაკობის ძე ლისოვსკის საქვეყნოდ განთქმულ ქარხანაში.
ბუხარს რამდენიმე დეკორატიული დეტალი დაკარგული აქვს, მათ შორის ის სკულპტურაც, რომლის სახელსაც ატარებს. ბუხარზე არსებული დამღა მიუთითებს, რომ ვენერა ლისოვსკის ქარხანაშია დამზადებული და, სულ მცირე, ერთი საუკუნისაა.
ბუხარი თავდაპირველად განთავსებული იყო იამანიძის ქუჩაზე, აფხაზეთის ფეხბურთის ფედერაციის შენობაში, რომელიც XX საუკუნის დასაწყისში გრაფ ოლდენურგს ეკუთვნოდა. აღნიშნულ ხელოვნების ნიმუშს მკვლევარმა ვანო ჯახუამ 2014 წლის 9 ივლისს მიაკვლია და მუზეუმის ადმინისტრაციას აცნობა. ბუხრის განსაკუთრებული ეროვნული და მხატვრული ღირებულებიდან გამომდინარე მუზეუმის ადმინისტრაციამ და საქართველოს კულტურის და ძეგლთა დაცვის სამინისტროს სპეციალისტებმა მიიღეს გადაწყვეტილება მომხდარიყო უნიკალური ნივთის დემონტაჟი და მისი სამუზეუმო სივრცეში გადმოტანა. აღნიშნული პროცესი განხორციელდა საქართველოს კულტურისა და ძეგლთა დაცვის, ეკონომიკის და იუსტიციის სამინისტროების, ასევე საქართველოს ფეხბურთის ფედერაციის ხელშეწყობით. უნიკალური სარესტავრაციო პროექტი კომპანია „ჯეოსელის“ მიერ დაფინანსდა.
ამჟამად ბუხარი ქართული კულტურული მემკვიდრეობის მნიშვნელოვანი საგანძურია.
ღონისძიებას საქართველოს კულტურისა და ძეგლთა დაცვის მინისტრი მიხეილ გიორგაძე დაესწრო.
