შინაგან საქმეთა სამინისტროს საზოგადოებასთან ურთიერთობის დეპარტამენტის უფროსმა ნინო გიორგობიანმა, შს მინისტრის მოადგილეებს და უწყების სხვადასხვა დეპარტამენტის ხელმძღვანელებს, 2014 წლის ანგარიში წარუდგინა.
საზოგადოებასთან ურთიერთობის დეპარტამენტის 2014 წლის ანგარიშში დეტალურად არის აღწერილი დეპარტამენტის მიერ დაგეგმილი, ორგანიზებული და გაშუქებული ყველა ღონისძიება; სამინისტროში გატარებული რეფორმების ფარგლებში განხორციელებული ღონისძიებები; ანგარიშში აღწერილია შს მინისტრის 2014 წლის აქტივობები, რომლებიც საზოგადოებასთან ურთიერთობის დეპარტამენტის მიერ იყო დაგეგმილი, ორგანიზებული და გაშუქებული; საერთაშორისო შეხვედრები;
სოციალური და საინფორმაციო კამპანიები: "არ დაჯდე საჭესთან ნასვამი", "შეიკარი ღვედი", "არა ბიონარკოტიკს", "არა ძალადობას" – კამპანიების ფარგლებში ჟურნალისტებისთვის, სტუდენტებისთვის და მოქალაქეებისთვის ჩატარებული კონკურსები, გამოფენები, დაჯილდოვებები. საზოგადოებასთან ურთიერთობის დეპარტამენტის მიერ ჩატარებული ღონისძიებების ფარგლებში შეიქმნა მუსიკალური და სოციალური კლიპები, რომლებმაც ხელი შეუწყო საზოგადოების ინფორმირებულობას სამინისტროს კამპანიების შესახებ.
კამპანიის – "არა ბიონარკოტიკს" განხორციელების და "ახალი ფსიქოაქტიური ნივთიერებების შესახებ" კანონის ძალაში შესვლის შედეგად, სტატისტიკური მონაცემების მიხედვით, 2014 წლის ბოლოსთვის ე.წ. ბიონარკოტიკების მოხმარება 90%-ით შემცირდა.
საზოგადოებასთან ურთიერთობის დეპარტამენტის ინიციატივით, 2014 წლის ნოემბერში შსს-მ უსინათლოებისთვის ვებ-გვერდის სპეციალური ხმოვანი ვერსია – voice.police.ge შექმნა.
აღსანიშნავია, რომ საქართველოში შსს პირველი უწყებაა, რომელმაც ამგვარი პროექტი განახორციელა. 2014 წლიდან რადიოეთერში გადის ყოველკვირეული გადაცემა "კანონის ფარგლებში", სადაც სამინისტროს წარმომადგენლები მოქალაქეებისთვის აქტუალურ თემებზე საუბრობენ. წლიური პრეზენტაციის დროს ხაზი გაესვა პრესსამსახურის 24 საათიან მუშაობას.
შსს-ს საზოგადოებასთან ურთიერთობის დეპარტამენტის უფროსმა ასევე წარადგინა 2015 წელს დაგეგმილი ღონისძიებები.
