რამდენიმე დღის წინ, ქალაქ ოზურგეთის შპს "სავაჭრო ცენტრის" ტერიტორიაზე, ქალაქ ოზურგეთის მერიამ გარემოვაჭრეებს გარევაჭრობა აუკრძალა.
როგორც მოვაჭრეები "გურია ნიუსთან" აცხადებენ, თავდაპირველად მათთან ქალაქ ოზურგეთის მერიის ზედამხედველობის განყოფილების უფროსი, შუქრი გაბრიჩიძე მივიდა და ადგილებზე გაჩერების უფლება არ მისცა. მოსთხოვა ტერიტორია სასწრაფოდ დაეტოვებინათ.
ბაზრის ტერიტორიიდან მოვაჭრეები "გურია ნიუსს" დაუკავშირდნენ და დახმარება სთხოვეს.
"ამ გაჭირვებულ, გაღატაკებულ ხალხს, რომლებიც აქ პურის ფულისთვის სიცივეში, წვიმაში, ყინვაში ვდგავართ, აქ გაჩერების უფლება არ მოგვცეს, გაგვაფრთხილა გაბრიჩიძემ თუ არ ადგებით, ძალას გამოვიყენებთო. ავტეხეთ აჟიოტაჟი, მოვიყვანთ ჟურნალისტებს, ქალაქის მერს ბეგლარ სიორიძეს და მის ქვეშევრდომებს სამუშაო ოთახებში შესვლის უფლებას არ მივცემდით, თვითონ ხომ ზიან თბილ კაბინეტებში და აიწყვეს ცხოვრება?
ჩვენ გასაცოდავებული ადამიანები სულ არა ვადარდებთ? იმ დღეს იყო ქალაქის მერის ბატონი ბეგლარ სიორიძის დაბადების დღე და ისე გავმწარდით ვაპირებდით მის რესტორანთან მისვლას, არ ვიცით რა მოხდა და მოვიდა ისევ შუქრი გაბრიჩიძე და განგვიცხადა, კარგით დღეს და ხვალ ნათლიღებას გაგაჩერებთო. ორი დღის შემდეგ კი მიგვიჩინეს ეს პატარა ადგილი ისიც დროებით. მერე უარესი, – მოვიდნენ საგადასახადო ოფიცრები და განგვიცხადეს, რომ თუ სალარო აპარატებს არ შევიძენთ, კანონით დავისჯებით. რას ნიშნავს?
არის თუ არა ეს მიზანმიმართული საქციელი ქალაქის მერიის მხრიდან? მათ გამოიყენეს საგადასახადო ჩვენს დასაშინებლად, ესაა სიმართლე! ღია ცის ქვეშ ვართ დღე და ღამე ასე ჰქვია და გვაცალონ, როდემდე უნდა იძახონ ადექითო? არჩევნებამდე რატომ არ იღებენ ხმას? მერე ვარღვევთ თურმე კანონს? დაგვაყენონ! ძალიან გთხოვთ, ჟურნალისტებს, თქვენ ხართ ჩვენი დამხმარე, თქვენი იმედი გვაქვს, გაგვიგეთ რა ბედი გველის და გვეკუთვნის თუ არა მოვაჭრეებს სალარო აპარატების შეძენა?" _ აღნიშნავენ მოვაჭრეები.
აღნიშნულთან დაკავშირებით ქალაქ ოზურგეთის მერიაში განმარტავენ, რომ მოვაჭრეებს ადგილებს არავინ დაატოვებინებს, სანამ მათთვის ალტერნატიული ტერიტორია არ მოიძებნება.
"კანონმდებლობით დაგდენილი წესით იკრძალება გარევაჭრობა, ამ ადამიანებს დაეგზავნათ გამაფრთხილებელი შეტყობინებები, თუმცა ეს არ ნიშნავს,რომ მათ აეკრძალოთ ამ ტერირორიაზე ვაჭრობა, სანამ არ გამოიძებნება ალტერნატიური ფართი", _ განუცხადეს "გურია ნიუსს" მერიის პრესსამსახურში.
"გურია ნიუსი" დაუკავშირდა შემოსავლების სამსახურის საგადასახადო ოფიცერს ნოდარ ინწკირველს.
მისი თქმით, სალარო აპარატის ქონას კანონი ავალდებულებს ნებისმიერ ადამიანს, რომელიც ეკონომიკურ საქმიანობას ეწევა.
"ეს ეხება, რა თქმა უნდა, ბაზრის გარემოვაჭრეებსაც, ეს ჩვეულებრივად საგადასახადო კოდექსში წერია."
რაც შეეხება იმას, თუ რატომ არ ექცეოდა წლების განმავლობაში სალარო აპარატების არ ქონას ყურადღება, ინწკირველი ამბობს, რომ მათი სამსახური რეგულარულად ამოწმებდა გარემოვაჭრეებს და შესაბამისი მოთხოვნებიც ჰქონდათ.
მისივე თქმით, თუ გარემოვაჭრეები მატ გაფრთხილებას არ გაითვალისწინებენ, მათ მიმართ განხორციელდება კანონით დადგენილი ქმედებები.
"მოგეხსენებათ აქ, ადამიანების ის ფენა ზის, რომელსაც უჭირს, სოციალურად დაუცველები, ამიტომ იყვნენ უბნის ოფიცრები და აუხსნეს მდგომარეობა, რომ არ მოხდეს ამ ადამიანების დაჯარიმება რა და როგორ უნდა გააკეთონ, რომ შემდეგ არ გართულდეს სიტუაცია და არ წამოვიდეს პრეტენზიები. ისე უკეთესი ვარიანტია, დატოვონ ეს ადგილები და შებრძანდნენ ბაზარში, სადაც არის დახლები და არ სჭირდებათ სალარო აპარატები. წინააღმდეგ შემთხვევაში მათ მიმართ განხორციელდება კანონით დადგენილი წესით ქმედებები, აქვთ ვადა მიცემული და გამოასწორონ სიტუაცია, მათ უნდა დაიცვან კანონი, რას გადაწყვეტენ ეს მათი საქმეა", _ გვითხრა ინწკირველმა.
