(გურია ნიუსი, ოზურგეთი) _ სკოლების საშტატო განრიგის განხილვა ახლა განათლების სამინისტროში ხდება. ადრე, წლების მანძილზე, ეს გრაფიკი ტარიფიკაციის სახით, ყოველი სასწავლო წლის დასაწყისში მტკიცდებოდა.
4 ნოემბერს, გურიის რეგიონის სამივე მუნიციპალიტეტის რესურსცენტრების ხელმძღვანელები, სკოლების დირექტორები სრული შემადგენლობით, განათლების სამინისტროში წარდგნენ და თითოეულმა დირექტორმა ცალ-ცალკე ისაუბრა საკუთარი სახელმძღვანელო სკოლის საშტატო განრიგის შესახებ.
_ სასკოლო ცხოვრებაში ეს სიახლეა და სამინისტროში საშტატო განრიგის დადგენა-დამტკიცება შემდგომში, მხოლოდ იმ შემთხვევაში მოხდება, თუ რაიმე მნიშვნელოვანი ცვლილება გახორციელდება, _ თქვა “გურია ნიუსთან” საუბარში ოზურგეთის რესურსცენტრის ხელმძღვანელმა ირინა ინარიძემ.
კითხვაზე, სხვა რაიმე სერიოზული ცვლილება ხომ არ იგეგმება ან სიახლე თუ არის მოსალოდნელი, ირინა ინარიძემ გვიპასუხა, რომ სკოლებში გაუქმდა ადმინისტრატორის შტატი, რა თქმა უნდა, იქ, სადაც აქამდე არსებობდა: _ მომავალი სასწავლო წლიდან კი იგეგმება მცირე რაოდენობის საათების მქონე მასწავლებელთა გათავისუფლება. მათ სკოლებში ხელშეკრულებას აღარ გაუფორმებენ. ეს არ მოხდება იმ შემთხვევაში, თუ პედაგოგს ატესტაცია წარმატებით აქვს გავლილი, _ თქვა ინარიძემ.
როგორც ჩანს, წლევანდელი საშტატო განრიგის დამტკიცება, გრძელვადიანი სულაც არ აღმოჩნდება და მომავალ შემოდგომაზეც დირექტორთა გრძელი რიგი დადგება განათლების სამინისტროში. და ეს მოხდება იმიტომ, რომ მცირე საათების მქონე პედაგოგთა რიცხვი, არც ისე ცოტაა, თან საეჭვოა, თითოეულმა მათგანმა მომავალ სექტემბრამდე შეძლოს გამოცდების ჩაბარება.
