ეკონომიკისა და მდგრადი განვითარების მინისტრის, ვიცე-პრემიერ გიორგი კვირიკაშვილის განაცხადებით, ლარის კურსი სტაბილიზაციისკენ მიდის.
აღნიშნულ საკითხთან დაკავშირებით გუშინ მთავრობასა და ეროვნულ ბანკის ხელმძღვანელებს შორის შეხვედრა გაიმართა.
"განვიხილეთ ჩვენი მომავალი ქმედებები. მთავრობას კომპლექსური გეგმები აქვს, თუ როგორ წავახალისოთ მომავალში ექსპორტი, ტურიზმი, ასევე უცხოური ინვესტიციების მიმართულებითაც მნიშვნელოვანი და აქტიური ნაბიჯების გადადგმას ვგეგმავთ. ვფიქრობთ, ეს ყველაფერი კომპლექსურად ძალიან კარგ შედეგს გამოიღებს", – განაცხადა კვირიკაშვილმა.
შეგახსნებთ, რომ ბოლო დღეების განმავლობაში ლარის კურსი მნიშვნელოვნად გაუფასურდა. სავალუტო ჯიხურებში ერთი დოლარის ფასი ორ ლარს გადასცდა.
ექსპერტების ნაწილი მიიჩევს, რომ ლარის გაუფასურებაზე პასუხისმგებლობა ეკონომიკურმა გუნდმა უნდა აიღოს.
"მთავარია, ეკონომიკურმა გუნდმა, მთლიანად ყველამ ერთად აიღოს პასუხისმგებლობა და თქვან, რას აკეთებენ. ამას ვერ გააკეთებს ვერც ფინანსთა მინისტრი და ვერც ეროვნული ბანკის პრეზიდენტი. უნდა გამოვიდეს პრემიერი და თქვას, რა შეგვეშალა, სად იქნა დაშვებული შეცდომები. დოლარის გამყარების შესახებ ინფორმაციის აღარავის აღარ სჯერა. საქართველოს მოსახლეობის 90% მონეტარული პოლიტიკის ექსპერტი გახდა და ძალიან კარგად იციან, რომ დოლარის კურსის ცვლილება ლარზე პირდაპირ ასახვას არ ჰპოვებს.
უნდა ითქვას, ამ შეცდომების გათვალისწინებით, რა ვადებში რა არის გასაკეთებელი. გულწრფელი საუბარი საზოგადოებასთან ძალიან მომგებიანი იქნება, როგორც პოლიტიკურად, ისე ეკონომიკური თვალსაზრისით. ამაში ხელისუფლებას საზოგადოების მხარდაჭერა სჭირდება. ეს ხელისუფლების საზოგადოებასთან ჯანსაღი კომუნიკაციისა და ზოგადად, ამ პრობლემის მოგვარების საქმეში საზოგადოების ჩართულობის ბრწყინვალე მაგალითია“, _ აცხადებს ეკონომიკის ექსპერტი ლევან კალანდაძე.
რაც შეეხება ლარის კურსის ვარდნის განმაპირობებელ ფაქტორებს, ექსპერტის შეფასებით, ქვეყანაში დოლარზე მოთხოვნა მკვეთრად არის გაზრდილი, რის გამოც, დოლარის და ლარის მასის თანაფარდობა დარღვეულია.
"იმისთვის, რომ კურსის ვარდნა შეჩერებულიყო, დოლარის და ლარის ბალანსი უნდა აღმდგარიყო და ლარზე მოთხოვნა გაზრდილიყო, თუმცა ეს პროცესი თავისით არ ხდება. დამატებითი სავალუტო ნაკადები ქვეყანაში არ გაზრდილა, შესაბამისად, ბალანსი არ აღდგენილა, ამიტომაც ლარი ჩვეულებრივ ვარდნას განაგრძობს. ეს პროცესი გაგრძელდება მანამ, სანამ ლარზე მოთხოვნა არ გაიზრდება და ქვეყანაში დამატებითი დოლარი არ შემოვა“, _ ამბობს კალანდაძე.
