FactCheck.ge პოლიტიკოსთა განცხადებებში ფაქტობრივი სიზუსტის დადგენის ყოველკვირეულ მიმოხილვას აქვეყნებს. 20-დან 27 იანვრამდე, ფაქტ-მეტრმა სხვადასხვა გადამოწმებულ ფაქტზე რამდენიმე კვლევა გამოაქვეყნა.
ყველაზე პოპულარული სტატია, ვებგვერდზე მნახველთა რაოდენობის მიხედვით, პრემიერ–მინისტრის განცხადებას ეხებოდა. გასული წლის ბოლოს, წლის შემაჯამებელ პრესკონფერენციაზე, პრემიერ–მინისტრმა საყდრისის საბადოსთან დაკავშირებით პოლიტიკოსები უპასუხისმგებლო და პოპულისტური განცხადებების გაკეთებაში დაადანაშაულა და აღნიშნა, რომ „150 არქეოლოგიური ობიექტი განადგურდა BP-ის პროექტის განხორციელების დროს, მილსადენის ინსტალაციის დროს. მაშინ ხმა არავის გაუღია“.
ფაქტ–მეტრის კვლევის შედეგად აღმოჩნდა, რომ BP-ის მიერ მილსადენების ინსტალაციის დროს, ტერიტორიაზე შესაძლო არქეოლოგიური ძეგლების აღმოჩენის მიზნით, მუშაობდნენ, როგორც კომპანიის მიერ სპეციალურად შექმნილი ჯგუფები, ასევე ეროვნული მუზეუმის ექსპედიციაც. გაირკვა ისიც, რომ სამუშაოების შედეგად არაერთი არქეოლოგიური ძეგლი აღმოაჩინეს, თუმცა მათი განადგურება არ მომხდარა, პირიქით, BP-მა ისინი შეინარჩუნა. ამას ადასტურებს როგორც კომპანია და მისი ანგარიში, ისე ექსპედიციის ხელმძღვანელი და ეროვნული მუზეუმის მიერ მოწყობილი გამოფენა, გამოცემული წიგნი, თუ სხვადასხვა პუბლიკაცია.
BP არ უარყოფს არც იმ ფაქტს, რომ პირველადი გათხრების დროს,იყო რამდენიმე შემთხვევა, როდესაც მოულოდნელად იქნა აღმოჩენილი კულტურული ძეგლი და ის მცირედით დაზიანდა, თუმცა ამ აღმოჩენების გამო კომპანიამ მარშრუტს გადაუხვია და ძეგლები შეინარჩუნა.
ამ საკითხის კვლევისას ფაქტ–მეტრი პრემიერ-მინისტრის კაბინეტსაც დაუკავშირდა. პრემიერის პრესსამსახურში ვერ დააკონკრეტეს, თუ რა წყაროზე დაყრდნობით განაცხადა ირაკლი ღარიბაშვილმა BP-ის მიერ 150 არქეოლოგიური ობიექტის განადგურების შესახებ.
ამ გარემოებების გათვალისწინებით, ფაქტ–მეტრმა დაასკვნა, რომ პრემიერის განცხადება ტყუილია.
გასულ კვირას, ფაქტ–მეტრმა საპარლამენტო უმცირესობის წევრის, გიორგი ბარამიძის განცხადებაც გადაამოწმა. გასული წლის 24 დეკემბერს ბარამიძემ განაცხადა: „კრიზისულ მდგომარეობაში მყოფი ბავშვიანი ოჯახების გადაუდებელი დახმარების პროგრამიდან სარგებელი ამ დრომდე არცერთ ოჯახს არ მიუღია“.
ჩვენ მიერ მოპოვებული ოფიციალური ინფორმაციით, 2014 წელს, კრიზისულ მდგომარეობაში მყოფი ბავშვიანი ოჯახების გადაუდებელი დახმარების ქვეპროგრამის ფარგლებში გამოყოფილი თანხა – 1 164 500 ლარი სრულად იქნა ათვისებული. ქვეპროგრამის ფარგლებში დახმარება 1 310-მა ოჯახმა მიიღო. ჯანდაცვის სამინისტრომ კრიზისულ მდგომარეობაში მყოფი ბავშვიანი ოჯახებისთვის გადაუდებელი დახმარების მიწოდება 2014 წლის 25 ოქტომბრიდან დაიწყო.
გიორგი ბარამიძემ ჩვენთან საუბარში განმარტა, რომ ის განცხადების გაკეთებისას ჟურნალ „ლიბერალის“ სტატიას ეყრდნობოდა. 2014 წლის 23 ოქტომბერს „ლიბერალმა“ მართლაც გამოაქვეყნა მსგავსი შინაარსის სტატია, თუმცა გიორგი ბარამიძემ განცხადება 24 დეკემბერს გააკეთა, როცა პროექტი უკვე განხორციელებული იყო. ამასთან, დეპუტატის მიერ ნახსენებ სტატიაში სოციალური მომსახურების სააგენტოს დირექტორის, გაიოზ თალაკვაძის კომენტარიცაა, რომლის თანახმადაც სააგენტო ოჯახებისთვის სურსათის/ნივთების გადაცემას რამდენიმე დღეში დაიწყებდა.
მოპოვებულ ინფორმაციაზე დაყრდნობით, ფაქტ–მეტრმა დაასკვნა, რომ გიორგი ბარამიძის განცხადება ტყუილია.
ფაქტ–მეტრის მიერ გადამოწმებული კიდევ ერთი ფაქტი საპარლამენტო უმრავლესობის წევრის, გია ჟორჟოლიანის განცხადებას ეხებოდა. ერთ–ერთი კანონპროექტის საპარლამენტო განხილვისას დეპუტატმა პავლე კუბლაშვილმა აღნიშნა, რომ პოლიტიკური ცვლილებები საჯარო სამსახურში ცვლილებებს არ უნდა იწვევდეს. მას კანონპროექტის წარმდგენმა დეპუტატმა, გია ჟორჟოლიანმა უპასუხა და განაცხადა: „სტატისტიკა კონკურსების შესახებ, რომლებიც 2014 წლის 1 იანვრამდე ჩატარდა, ამბობს სრულიად საპირისპიროს. 85%-ზე მეტი ადამიანი, რომელიც მუშაობდა საჯარო სექტორში, დარჩა იგივე თანამდებობებზე, ან მსგავს თანამდებობებზე“.
ფაქტ–მეტრის დასკვნით, დეპუტატი მართალია განცხადების იმ ნაწილში, რომ 2014 წლის 1 იანვრამდე გამართული კონკურსების შედეგად, საჯარო სამსახურებში თანამდებობის დასაკავებლად გამოცხადებულ კონკურსებში მონაწილე დროებით მოვალეობის შემსრულებელთა 86,5%-მა კონკურსის შედეგად თანამდებობა შეინარჩუნა. თუმცა, „საერთაშორისო გამჭვირვალობა-საქართველოს“ კვლევის ავტორთა აზრით ეს ამყარებს საზოგადოების გარკვეული ჯგუფის აზრს, რომ საჯარო სამსახურში კონკურსები ძირითადად ფორმალურად ტარდება და მხოლოდ ეს სტატისტიკური მაჩვენებელი არ ასახავს ხელისუფლების ცვლილების შედეგად საჯარო სამსახურებში არსებული საკადრო პოლიტიკის სრულ სურათს.
კვლევამ აჩვენა, რომ არჩევნების შემდეგ სულ რამდენიმე თვეში (2012 წლის 20 ოქტომბრიდან 2013 წლის 1 მარტამდე), საჯარო სამსახურებიდან დიდი რაოდენობით (სულ ცოტა 5 149) თანამშრომლების გათავისუფლება მოხდა. მათგან 45% საკუთარი განცხადების საფუძველზე იქნა გათავისუფლებული, რაც, როგორც „საერთაშორისო გამჭვირვალობის“ კვლევაშია აღნიშნული, გარკვეულ ეჭვს ბადებს და პოლიტიკურად მოტივირებული გადაწყვეტილების შთაბეჭდილებას ტოვებს. აღსანიშნავია ისიც, რომ ამ პერიოდში, სამსახურებში კონკურსის წესით თანამშრომელთა მხოლოდ 4% იქნა მიღებული.
მართალია, გია ჟორჟოლიანი 2014 წლის 1 იანვრამდე კონკურსის შედეგად თანამდებობაშენარჩუნებულ მოხელეთა რიცხვს სწორად ასახელებს, თუმცა საკითხზე საუბრისას ის მხოლოდ ამ სტატისტიკით შემოიფარგლება და იგნორირებას უწევს არჩევნების შემდეგ თანამდებობიდან გათავისფლებულ საჯარო მოხელეთა მაღალ რიცხვს. შესაბამისად, ფაქტ-მეტრი ითვალისწინებს ხელისუფლების ცვლილების შედეგად საჯარო სამსახურებში განხორციელებულ საკადრო პოლიტიკის სრულს სურათს და ასკვნის, რომ დეპუტატის განცხადება მეტწილად მცდარია.
გასულ კვირას ფაქტ–მეტრმა ფინანსთა მინისტრის, ნოდარ ხადურის განცხადებაც გადაამოწმა. მინისტრის თქმით, „2014 წლის პირველ ნახევარში, 2013 წელთან შედარებით, კერძო ინვესტიციები 36%-ით გაიზარდა.“
2014 წლის პირველ ნახევარში, ქვეყანაში მთლიანი ინვესტიციები 32%-ით, ხოლო კერძო ინვესტიციები 31%-ით გაიზარდა. რაც შეეხება სოფლის მეურნეობაზე გაცემულ სესხებს, ეროვნული ბანკის მონაცემებით, 2014 წლის პირველ ცხრა თვეში სოფლის მეურნეობაზე დაახლოებით 198 მილიონი ლარის სესხი გაიცა, რაც 2013 წლის ანალოგიურ მონაცემს 2-ჯერ, ხოლო 2012 წლის მაჩვენებელს 5-ჯერ აღემატება. თუმცა, 2014 წლის პირველ სამ კვარტალში სოფლის მეურნეობის პროდუქციის ზრდის ტემპი 2013 წლის ანალოგიურ პერიოდთან შედარებით 1.3%-მდე დაეცა.
ასევე, გასათვალისწინებელია, რომ 2013 წელს ინვესტიციები შემცირდა და 2014 წლის მაჩვენებელს 2012 წელს თუ შევადარებთ, პროცენტული ზრდის ტემპი გაცილებით ნაკლები გამოდის.
შესაბამისად, ფაქტ–მეტრმა დაასკვნა, რომ ნოდარ ხადურის განცხადება მეტწილად სიმართლეა.
