რამდენიმე დღის წინ, ლანჩხუთში მუნიციპალიტეტის გამგეობის ზედამხედველობის სამსახურმა რეიდი მოაწყო და გარემოვაჭრეებს ტერიტორიის დატოვება მოსთხოვა.
"ორი კაპიკი რომ მივიტანოთ სახლში, მთელი დღე ვსხედვართ ქუჩაში, ჩვენც კი ვიცით კაი რომაა სითბო და თბილი ოთახი, ვინმეზე ნაკლები გემოვნება არც ჩვენ გვაქვს. არჩევნები რომ ახლოვდება, მაშინ დათაფლული გველაპარაკებიან, ნაირ-ნაირ დაპირებებს იძლევიან, მერე კი ყველას ავიწყდება ხალხი და მათი გასაჭირი. სამსახური რომ იყოს და მაღალი ხელფასი, როგორც მაგათ აქვთ, გიჟები კი არ ვართ აქ დასხდეთ. აღარ ვიცით რა ვქნათ, სად ვეძიოთ გამოსავალი. ძლივს ორ კაპიკს ვშოულობთ და აწი რას ვიზამთ არ ვიცით. ცუდად ვარ ქალი, მოვიდნენ და ნერვები აგვიშალეს. დავიჯერო სხვა ყველაფერი გადასარევადაა ლანჩხუთში? ყველა ქალაქშია გარევაჭრობა, მაგრამ არ დაქცეულა ქვეყანა. გვეუბნებიან ბაზარში შედითო. ვიყავით აქამდე ე. წ. პატარა ბაზრის ტერიტორიაზე, თუმცა კაციშვილი არ შემოდიოდა, ტყუილა ვისხედით", – აცხადებენ გარემოვაჭრეები.
თავის მხრივ, გარემოვაჭრეთა მომრავლების ფონზე უკმაყოფილებას ვერ მალავენ როგორც დახურულ ბაზრობებში მოვაჭრეები, ასევე თავად ბაზრობის მეპატრონეები, რომელთაც არც თუ მცირე თანხა აქვთ პირადი ბიუჯეტიდან გაღებული სავაჭრო ობიექტის მოსაწყობად, უმეტეს შემთხვევაში საამისოდ მათ ბანკებიდან სესხები აქვთ აღებული. ისინი ხმამაღლა აცხადებენ, რომ აღნიშნულ შემთხვევაში ირღვევა მათი უფლებები.
"შეხედეთ, კაცი გზას ვერ გაიგნებს ისეთი მდგომარეობაა გარშემო. ვინაა პატრონი, ვინ რას ამოწმებს. საქონელი ქუჩაშია დაყრილი და გარშემო ანტისანიტარიაა გამეფებული. საინტერესოა სად იხდის რომელიმე მათგანი გადასახადს? ასე უნდა იყიდებოდეს თევზი შუა ქუჩაში?"
ზედამხედველობის სამსახურის უფროსი თენგო ხელაძე ამბობს, რომ წინა პერიოდის განმავლობაში მათ სიტყვიერად არაერთხელ გააფრთხილეს გარემოვაჭრეები.
"კატეგორიულად დაუშვებელია საკვები პროდუქტები ღია ცის ქვეშ იყიდებოდეს, მითუმეტეს თევზი. ადგილი ნამდვილად არ წარმოადგენს პრობლემას, ამ მხრივ ძალიან დიდი არჩევანი აქვთ, კეთილი ინებონ და შევიდნენ რომელიმე ბაზრის ტერიტორიაზე და იქ ივაჭრონ, ხელს არავინ შეუშლის. ჩვენი რეიდის მოწყობის შემდეგ გარემოვაჭრეები გამგებლის პირველ მოადგილეს ვახტანგ ზენაიშვილს შეხვდნენ და გადაწყდა, რომ მათ ვადა პირველ თებერვლამდე მისცემოდა. როგორც კი დათქმული დრო გავა, არც ერთი მოვაჭრე აღარ იქნება ქუჩაში."
გამგებლის მოადგილე ვახტანგ ზენაიშვილი მიიჩნევს, რომ კანონი ყველასთვის ერთნაირი უნდა იყოს.
"გასაგებია, რომ ხალხს უჭირს და გაჭირვების გამო ზის ქუჩაში, თუმცა რა ქნას იმ ადამიანებმა ვინც სავაჭრო ობიექტებში ვაჭრობენ, ან იმათ ვინც ბანკებიდან სესხი აიღეს, რომ მსგავსი ობიექტები მოეწყოთ. გარევაჭრობის ხელშეწყობით ხომ კანონსაც და მათ უფლებებსაც ვარღვევთ. იყვნენ ჩემთან შეხვედრაზე მოსულები და საბოლოოდ შევთანხმდით, რომ პირველ თებერვლიდან ქუჩაში არცერთი გარემოვაჭრე აღარ იქნება. გადაწყვეტილება საბოლოოა და მის განხორციელებას აუცილებლად მივაქცევთ ყურადღებას", – ამბობს ზენაიშვილი.
მართალია გამგებლის მოადგილე და გარემოვაჭრეები შეთანხმდნენ, რომ პირველი თებერვლიდან გარევაჭრობა აიკრძალება, თუმცა აღნიშნული შეხვედრის შემდეგ, ჩვენთან საუბარში გარემოვაჭრეები მაინც გაურკვეველ მდგომარეობაში გრძნობენ თავს.
მათი თქმით, არ იციან დათქმული ვადის შემდეგ რა გზას უნდა მიმართონ და რაში უნდა ეძებონ გამოსავალი.
