გასული კვირა, ოზურგეთის პედაგოგიურ საზოგადოებაში, სერიოზული აჟიოტაჟით დაიწყო. განათლების სამინისტროდან დაბრუნებულმა ოზურგეთის განათლების რესურსცენტრის ხელმძღვანელმა და სკოლების დირექტორებმა ამბავი ჩამოიტანეს, მცირე საათების მქონე პედაგოგთა სკოლიდან გაშვება-გათავისუფლების შესახებ. ოზურგეთის სკოლებში მცირე საათების მქონე არა ერთი პედაგოგი მუშაობს, რომელთა გათავისუფლება დღის წესრიგში მოულოდნელად და გაცილებით ადრე დადგა, ვიდრე მოელოდნენ. თუმცა, მცირე საათების მქონე იმ პედაგოგებმა, რომლებსაც წინა დღით ოფიციალურად კარისკენ მიუთითეს, მეორე დღეს “პირი ამოიკერეს”, რადგან სწორედ მეორე დღეს, თითოეული მათგანი, მოულოდნელად კვლავ დააბრუნეს სკოლაში.
“ორ დღეში მოხსნილ-დანიშნული მასწავლებლების ბედი მაინც სასწორზე დევს და მათ ახალი წლიდან კვლავ კარისკენ მიუთითებენ, ოღონდ ამ საქმეს ახლა სამეურვეო საბჭოები იტვირთებენ, უფრო სწორად მათ “აკისრებინებენ”, _ ამბობს ჩვენი წყარო და დასძენს, არც ერთ დირექტორს არ სურს, ვინმე სკოლიდან გაუშვას, მაგრამ მათზე ზეწოლა ზემოდან ხდება.
“გურია ნიუსი” თემით დაინტერესდა და ოზურგეთის სკოლების დირექტორებს შეხვდა. ჩვენ შევეცადეთ, გაგვერკვია, რა მოხდა სინამდვილეში, მართალია თუ არა, რომ მასწავლებლებს ოფიციალურად განუცხადეს შემცირების შესახებ.
ლიანა იმედაშვილი, ოზურგეთის მეორე საჯარო სკოლის სასწავლო ნაწილის გამგე: _ ეს ამბები ამ დილით შეჩერდა (საუბარი ჩაწერილია 8 ნოემბერს) და მეც ძალიან გამიხარდა, რომ, ჯერჯერობით მაინც, მცირე საათების მქონე მასწავლებლებს შინ წასვლა არ მოუწევთ. ისე კი, ჯობია, რომ რესურსცენტრის ხელმძღვანელი ირინა ინარიძე ნახოთ, დაზუსტებულ ინფორმაციას ის მოგაწვდით.
_ ქალბატონო ლიანა, თქვენს სკოლაში მცირე საათის მქონე რამდენი მასწავლებელია?
_ რვა პედაგოგია.
ტარიელ კალანდაძე, მეოთხე საჯარო სკოლის დირექტორი: _ იყო საუბარი საშტატო განრიგის და მასწავლებელთა საგანაკვეთო დატვირთვის ოპტიმიზაციაზე. ის, რაც ყოველივე ამას უმტკივნეულოდ არეგულირებს, არის სერტიფიცირება. არა ერთხელ ითქვა, რომ გამოცდას როცა ჩააბარებს მასწავლებელი, ექნება სრული დატვირთვა და გათავისუფლების საფრთხე აღარ დაემუქრება.
_ ბატონო ტარიელ, მე კონკრეტულად გეკითხებით _ გუშინ და გუშინწინ (საუბარია 7 და 8 ნოემბერს ოზურგეთში გავრცელებული ინფორმაციის შესახებ), ოზურგეთში აჟიოტაჟი ატყდა, რომელიც მცირე საათების მქონე მასწავლებლების სკოლებიდან გათავისუფლებას ეხებოდა. არ იყო ეს სინამდვილე?
_ ითქვა, რომ მომხდარიყო თუ არა ოპტიმიზაცია? თუ მაგალითად, სკოლაში ქართულ ენასა და ლიტერატურას დათმობილი აქვს 18 საათი და განაწილებულია სამ პედაგოგზე, ასეთ შემთხვევაში, მეც ვეთანხმები, რომ ერთი ისეთი პედაგოგი დაიტვირთოს, რომელსაც გამოცდა ექნება ჩაბარებული. ეს ძალიან მტკივნეულია, მაგრამ კარგმა მენეჯერმა ასე უნდა იფიქროს.
_ ვთქვათ, მოხდა სასწაული და ყველა პედაგოგმა წარმატებით გაიარა სასერტიფიკაციო გამოცდა. ამ შემთხვევაში დარჩება სკოლაში მცირე საათების მქონე მასწავლებელი?
_ დარჩება, ოღონდ მას არ ექნება დანამატი 75 ლარის ოდენობით.
_ გაათავისუფლებენ თუ არა მცირე საათების მქონე პედაგოგებს, ამჯერად იანვრიდან? ჩვენი წყარო ამბობს, რომ პროცესი იანვრამდე შეჩერდა.
_ რა მოხდება უახლოეს პერიოდში, არ ვიცი, რადგან მოულოდნელობებით სავსე დროში ვცხოვრობთ. შესაძლებელია, 1 იანვრიდან მოხდეს ოპტიმიზაცია, შეიძლება, ზაფხულში გადაიტანონ. მე ვაპირებ, რომ სამეურვეო საბჭოზე გავიტანო ეს საკითხი, როცა ბიუჯეტის განხილვა გვექნება. მსურს, შევთავაზო სამეურვეო საბჭოს, აქტიურად ჩაერთოს ამ საქმეში. ყველა კარგი მენეჯერი ასე მოიქცევა. მე ვერავის ვეტყვი, რომ დარჩეს. ვურჩევ ყველას, ჩააბაროს გამოცდები. მე თვითონაც ვუტარებ პედაგოგებს ტრენინგებს.
_ თქვენს სკოლაში რამდენია მცირე საათების მქონე მასწავლებელი?
_ ცხრა პედაგოგი. ახლა ჩვენს სკოლაში, პირიქით, ინკლუზიური განათლების შტატი დაიშვება.
“გურია ნიუსი” ოზურგეთის პირველი საჯარო სკოლის სასწავლო ნაწილის გამგეს, ლალი გიგინეიშვილს ესაუბრა. ამ თემაზე მან მოკლედ გვიპასუხა: _ ჩვენს სკოლაში სულ სამი პედაგოგია მცირე საათების მქონე. მათთვის არავის უთქვამს, რომ გაათავისუფლებდნენ.
“გურია ნიუსი” ოზურგეთის საგანმანათლებლო რესურსცენტრის უფროსს, ირინა ინარიძესაც შეხვდა და ჰკითხა, შეესაბამებოდა თუ არა სინამდვილეს ის ფაქტი, რომ ქალაქ ოზურგეთის საჯარო სკოლებიდან, სულ ცოტა, 16 მასწავლებელს ათავისუფლებდნენ და ეს პროცესი ისევე უცებ შეაჩერეს, როგორც დაიწყეს: _ მე თქვენ ორიოდე დღის წინ გიპასუხეთ, რომ ახლახან ჩვენ განათლების სამინისტროში ვიმყოფებოდით გეგმური საშტატო განრიგის დასამტკიცებლად. კონკრეტულად, ვინმეს გათავისუფლება არავის დაუგეგმავს. ან ვინ დათვალა ასე უცებ, რომ 16 მასწავლებელს ათავისუფლებდნენ?! მეც ვიყავი სკოლის დირექტორი და ვიცი, რომ ძალიან მცირე საათების მქონე მასწავლებლები არც ერთ დირექტორს არ უნდა სკოლაში. მოგეხსენებათ, ბევრმა მასწავლებელმა ჩააბარა უკვე გამოცდები, აქვთ სრული დატვირთვა და ამის პარალელურად არიან, აგრეთვე, მცირე საათების მქონე პედაგოგები. ამიტომ უმჯობესია, ყველამ გაიაროს ატესტაცია. ამ ეტაპზე უფრო ქალაქის სკოლებში დგას ეს პრობლემა. სოფლებზე, ჯერჯერობით, საუბარი არ არის.
თუ ქალაქ ოზურგეთის საჯარო სკოლების მონაცემებით ვიმსჯელებთ, მცირე საათებით დატვირთვის მქონე პედაგოგები, გაცილებით მეტია, ვიდრე 16! დირექტორთა საუბრიდანაც ჩანს, რომ პედაგოგების სახლში გაშვებას ამჯერად სამეურვეო საბჭოების მეშვეობით მოახდენენ.
მიწყნარებული აჟიოტაჟის შემდეგ თუ მანამდე, ჩვენთან საუბრისას ვინაობის დასახელებას ყველა მასწავლებელი ერიდება: “რას ველოდებით, უფრო უარესს? ამ პროცესების მიზანი მასწავლებელთა რაოდენობის შემცირებაა და არა პროფესიონალიზმის გამოვლინება”, _ ამბობენ განაწყენებული მასწავლებლები. აღსანიშნავია, რომ იგივე აზრს გამოთქვამენ გამოცდაჩაბარებული პედაგოგებიც.
