გარემოს დაცვისა და ბუნებრივი რესურსების კომიტეტი მომავალი საგაზაფხულო სესიის დროს საზედამხედველო საქმიანობის გააქტიურებას აპირებს.
ამის შესახებ კომიტეტის თავმჯდომარემ გიორგი ცაგარეიშვილმა განაცხადა დღეს გამართულ ბრიფინგზე, რომელზეც ჟურნალისტებს კომიტეტის საზედამხედველო საქმიანობის გეგმა გააცნო.
გიორგი ცაგარეიშვილის განცხადებით, ვინაიდან პარლამენტის კომიტეტების საქმიანობის ერთ-ერთ უმნიშვნელოვანეს მიმართულებას აღმასრულებელი ხელისუფლების საქმიანობაზე კონტროლი წარმოადგენს, კომიტეტში გადაწყვიტეს, რომ საგაზაფხულო სესიის განმავლობაში, კომიტეტში მოიწვიონ გარემოსა და ბუნებრივი რესურსების დაცვის სამინისტროს ხელმძღვანელები და სტრუქტურული ქვედანაყოფების წარმომადგენლები ორწლიანი მუშაობის შესახებ ანგარიშის წარსადგენად.
"გადავწყვიტეთ, რომ მთელი თებერვალი და მარტი დავუთმოთ ამ ანგარიშგებას. ორი წლის განმავლობაში ჩვენ არც ერთი სტრუქტურული დანაყოფი არ მოგვიწვევია ანგარიშის ჩასაბარებლად. ახლა მიგვაჩნია, რომ ამის დრო ნამდვილად დადგა, ორი წელი საკმაოდ დიდი დროა: არის გარკვეული წარმატებები, ასევე წარუმატებლობებიც. გვაქვს ჩვენი შენიშვნები და კრიტიკული მოსაზრებები.
ამიტომ, გვსურს, რომ თქვენთან ერთად, გარემოსდაცვითი ორგანიზაციების წარმომადგენლებთან ერთად ვისაუბროთ გარემოსდაცვით პრობლემებზე, რომლებიც საქართველოში წლების განმავლობაში დაგროვდა და ვიფიქროთ მათი გადაჭრის გზებზე“, _ განაცხადა გიორგი ცაგარეიშვილმა. მან ჟურნალისტებს გააცნო გეგმა, რომლის მიხედვითაც კომიტეტში გაიმართება სამინისტროს სხვადასხვა უწყებებისა და საქვეუწყებო დაწესებულებების საქმიანობის ანგარიშების მოსმენა.
გიორგი ცაგარეიშვილის განცხადებით, გარემოსდაცვით სფეროში პრობლემები არც თუ ცოტაა და მნიშვნელოვანია, რომ დაუფარავად მოხდეს მათზე მსჯელობა.
საკომიტეტო მოსმენების ციკლი 3 თებერვლიდან დაიწყება და პირველ სხდომაზე გარემოს დაცვის ზედამხედველობის დეპარტამენტი იქნება მოწვეული.
კომიტეტის სხდომაზე სხვადასხვა დროს მოუსმენენ ეროვნული სატყეო სააგენტოს, სატყეო პოლიტიკის სამსახურის, სატყეო საბაზისო სანერგე მეურნეობის, დაცული ტერიტორიების სააგენტოს, ბიომრავალფეროვნების დაცვის სამსახურის, გარემოზე ზემოქმედების ნებართვების დეპარტამენტის, ბირთვული და რადიაციული უსაფრთხოების დეპარტამენტის და სხვა სამსახურების წარმომადგენლებს. როგორც გიორგი ცაგარეიშვილმა აღნიშნა, ბევრგან გარემო საკმაოდ დაბინძურებული – უმძიმესი ვითარებაა ტყიბულში, ჭიათურაში, ზესტაფონში, ბოლნისში და საერთო გადაწყვეტილებაა, რომ კომიტეტის ყურადღების მიღმა არ დარჩება საზოგადოებისთვის საინტერესო არც ერთი თემა.
"ჩვენ არა ვართ ბიზნესის წინააღმდეგი, მაგრამ გარემოს დაბინძურება, ადამიანების სიცოცხლის მოსპობა, მათი ჯანმრთელობის შერყევა არავის უნდა ეპატიოს – ეს არის სისხლის სამართლის დანაშაული. არავის ვემუქრებით, მაგრამ მკაცრი და მიუკერძოებლები ვიქნებით“, _ განაცხადა გარემოს დაცვისა და ბუნებრივი რესურსების კომიტეტის თავმჯდომარემ.
მისივე ინფორმაციით, UNDP-ის დახმარებით და მხარდაჭერით, "საკომიტეტო შესაძლებლობების გაძლიერების პროექტის“ ფარგლებში, შეიმუშავეს კომიტეტის სამოქმედო გეგმა 2015-2016 წლებისათვის, რომელიც კომიტეტს ახალი შესაძლებლობებისაკენ უხსნის გზას.
