პროდუქციის მიმწოდებლები „ფუდმარტისგან“ „პოპულის" მიერ წლების განმავლობაში დაგროვილ დავალიანებას ითხოვენ. მათ შესაბამისი, როგორც სისხლის სამართლის ისე ადმინისტრაციული სარჩელები უკვე შეტანილი აქვთ.
სოციალურ ქსელ "ფეისბუქში" სპეციალური გვერდია შექმნილი „პოპულ-ფუდმარტის აფერა," სადაც დაზარალებული კომპანიების შესახებ, ასევე საქმის გარშემო არსებული მასალები იტვირთება.
როგორც ერთ–ერთი დაზარალებული, ბონდო ყიფშიძე მედიასთან განმარტავს, რეალურად 2013 წლის დეკემბერში "პოპულის" მენეჯმენტმა შექმნა ახალი კომპანია „ფუდმარტი" და არსებული ვალდებულებების გასტუმრებისგან თავის არიდების მიზნით ქონება გადასცა. ყიფშიძის ინფორმაციით, დაზარალებულია 100-მდე კომპანია, დასაბრუნებელი თანხა კი რამდენიმე მილიონია.
დაზარალებული კომპანიების წარმომადგენელი ამბობს, რომ ამ დროისთვის პოპულის მიერ "ფუდმარტისთვის" გადაცემული ქონება დაყადაღებულია. ყადაღასთან დაკავშირებული საქმის განხილვის შემდეგ კი საქმეზე სასამართლო განხილვები დაიწყება.
მისივე მტკიცებით, ერთ-ერთ კომპანიასა და „ფუდმარტს" შორის მოხდა მორიგება და კომპანიამ დავალიანების დაბრუნების გარანტიაც მიიღო.
ოფიციალური ინფორმაციით ახალმა მფლობელმა 2013 წელს "პოპულისა" და „იოლის" აქტივები 25 მილიონ დოლარად იყიდა, აქედან თანხის 40% თავიდანვე გადაიხადა დარჩენილი თანხა კი ორი წლის განმავლობაში უნდა დაიფაროს.
შეგახსენებთ, სადღეისოდ სუპერმარკეტების ქსელ „ფუდმარტში“ მულტინაციონალური ბრენდი SPAR–ია შესული და „ფუდმარტის“ განცხადებების თანახმად, მოკლე დროში მისი ყველა ობიექტი, სწორედ SPAR–ის ბრენდის ქვეშ გააგრძელებს ფუნქციონირებას.
"პოპულისა“ და „ფუდმარტის“ ისტორიას სხვა პლასტიც აქვს. საქმე ეხება „პოპულის“ დამფუძნებლისა და ამ ეტაპზე 12%–ის მფლობელი ბიზნესმენ ევგები ფიჩხაიას სარჩელს, რომლითაც იგი მოითხოვს, რომ „პოპულის“ საკუთრებაში არსებული ყველა ქონების „ფუდმარტის“ საკუთრებაში გადასვლის თაობაზე გარიგება ბათილად იქნას ცნობილი. ამ მოთხოვნის კანონიერებას იგი იმთ განმარტავს, რომ გარიგებისას არ იქნა გათვალისწინებული მისი, როგორც აქციონერის კანონიერი ინტერესები.
"პოპულის" გასხვისების მოკლე ისტორია ასეთია, – 2001 წელს ევგენი ფიჩხაიამ ქვეყანაში პირველი სუპერმარკეტების ქსელი „პოპული“ დააარსა, 2005 წელს 12 მაღაზიის მფლობელი ფიჩხაია კომპანიაში ახალ საერთაშორისო აქციონერებს იწვევს და გენერალურ დირექტორად რჩება. 2010 წელს 45 მაღაზიამდე გაზრდილი წარმატებული ქსელის „პოპულის“ დამფუძნებელი და უკვე შემცირებული წილის, 15%-ის მფლობელი ფიჩხაია მის მიერვე მოზიდულმა საერთაშორისო საინვესტიციო ფონდებმა კომპანიის მართვას ჩამოაშორეს.
2012 წელს საერთაშორისო საინვესტიციო ფონდებმა „პოპულიში“ თავიანთი აქციების 88% მიყიდეს კომპანია „იოლს“, რომლის ძირითადი აქციონერი SEAF CAUCASUS GROWTH და მისი მმართველი დანიის მოქალაქე ეზბერნ ემბორგი იყო. საჯარო რეესტრის მონაცემებში იგივე კომპანია და პირი, ემბორგი ფიგურირებდა მაშინაც, როცა 2014 წელს „პოპულის“ აქტივები „იოლისგან“ „ფუდმარტმა“ შეიძინა. „ფუდმარტის“ დამფუძნებელი SEAF CAUCASUS GROWTH -თან ერთად არჩილ გეგენავას „ფუდსერვისიცაა“.
"ფუდმარტის" წარმომადგენელი ირაკლი კასრაძე, დაახლოებით ერთი წლის წინ, მედიასთან საუბრისას ამბობდა, რომ ფონდი კომპანიის ფუნქციონირებაში მონაწილეობას არ იღებს. "ჩვენ ვართ „ფუდსერვისის“ წარმომადგენლები, „ფუდსერვისმა“ შეიძინა წილი „ფუდმარტში“ და მთელი ოპერირება, ანუ მენეჯმენტი არის ჩვენს პასუხისმგებლობაში. რაც შეეხება ეზბენ ენბორგს, საჯარო რეესტრის ახალ ამონაწერში ის აღარ გახლავთ, დირექტორი ვარ მე. ბატონ ფიჩხაიას წარმატებებს ვუსურვებ, მაგრამ „ფუდმარტთან“ მისი დავის აზრს ვერ ვხედავ. რაც შეეხება გეგენავას, ის, ისევე როგორც მე, „ფუდსერვისის" მხრიდან, ცხადია, დაინტერესებული პირები ვართ“, – აცხადებდა ირაკლი კასრაძე.
კასრაძე „პოპულის“ აქტივების გასხვისებაში საეჭვო გარიგებებს გამორიცხავდა და ამბობდა, რომ გაკოტრებამდე მისული „პოპული“ მათმა კომპანიამ გადაარჩინა. დაზარალებული ბიზნესმენების მიმართ პასუხისმგებლობა კი არ გააჩნიათ და თუკი დისტრიბუტორებს ვალების ნაწილს გაუსტუმრებენ, ეს მხოლოდ „ფუდმარტის“ კეთილი ნება იქნებოდა.
სადღეისოდ ვითარება ასეთია – "პოპულის" მიმწოდებლები მევალე კომპანიისგან, ანუ მის ბაზაზე შექმნილი „ფუდმარტისგან“, დღეს უკვე „სპარისგან“, კუთვნილი თანხის მისაღებად სასამართლოში დადიან. „პოპულის" დამაარსებელი და ამ ეტაპზე 12%-ის მფლობელი, ევგენი ფიჩხაიაც საკუთარი ინტერესის დაცვას სასამართლოს გზით ცდილობს. გაურკვეველია, რა როლს თამაშობს მთელ ამ ამბავში, თავის დროზე "პოპულის" და შემდეგ უკვე "ფუდმარტის" აქციონერი ფონდი SEAF CAUCASUS GROWTH.
