არასამთავრობო ორგანიზაცია "საერთაშორისო გამჭირვალობა – საქართველო" ბოლო დროს არასამთავრობო ორგანიზაციების წინააღმდეგ აგორებულ კამპანიას ვრცელ სტატიას უძღვნის, რომელსაც "გურია ნიუსი" უცვლელად გთავაზობთ.
"მას შემდეგ, რაც ბიძინა ივანიშვილმა აქტიური სამოქალაქო საზოგადოების წარმომადგენლების წინააღმდეგ მაკომპრომეტირებელი ინფორმაციის გამოქვეყნება დაანონსა, შვედეთის მთავრობისა და მისი საერთაშორისო დახმარების სააგენტოს, Sida-ს მიზანმიმართული დისკრედიტაცია მიმდინარეობს.
ამ ბრალდებების მთავარი გზავნილი ის არის, რომ არასამთავრობო ორგანიზაციების საქმიანობა საეჭვოა, რადგან ისინი დაფინანსების ნაწილს შვედეთის მთავრობისგან იღებენ.
მიგვაჩნია, რომ ეს კამპანია ემსახურება არა მხოლოდ არასამთავრობო ორგანიზაციების რეპუტაციის შელახვას, არამედ მნიშვნელოვან ზიანს აყენებს საქართველოს ურთიერთობას შვედეთის მთავრობასთან. ამით დარტყმის ქვეშ დგება ის რეფორმები და პროცესები, რომლებიც სწორედ შვედეთის მთავრობის და საქართველოს სხვა ევროპელი პარტნიორების მიერ იყო დაფინანსებული. მიუხედავად ამისა, უცნობია ამ საკითხთან დაკავშირებით საქართველოს მთავრობის პოზიცია. ასევე, გაუგებარია, ამ ბრალდებებთან დაკავშირებით რატომ არ გაკეთებულა ამ დრომდე შვედეთის მთავრობისა და საქართველოს ევროპელი პარტნიორების მხარდამჭერი განცხადება.
რა წყაროებზე დაყრდნობით საუბრობს გოგა ხაინდრავა კორუფციულ გარიგებაზე იმედის კვირის ეთერში გოგა ხაინდრავამ აღნიშნა, რომ შვედეთის ყოფილი საგარეო საქმეთა მინისტრის, კარლ ბილდტისა და საქართველოს ექსპრეზიდენტ მიხეილ სააკაშვილის კორუფციული სქემების შესახებ შვედური მედია საუბრობს. სინამდვილეში, ამ თემაზე მხოლოდ ერთმა შვედურმა გაზეთმა, ტაბლოიდმა Aftonbladet-მა დაწერა, რომლის წყაროც თავად ხაინდრავა იყო. შესაბამისად, იმედის კვირაში გაკეთებული ცრუ განცხადებისას ხაინდრავა საკუთარ თავს ეყრდნობა, რითიც შეცდომაში შეჰყავს მაყურებელი, თითქოს მის მიერ გავრცელებული ინფორმაციის მისგან დამოუკიდებელი წყაროც არსებობს. ტაბლოიდის დაბეჭდილ სტატიაში კარლ ბილდტი გამოცემას პასუხობს და აცხადებს, რომ ეს ბრალდებები სიმართლეს არ შეესაბამება.
სამაგიეროდ, მსგავსი შინაარსის სიახლეები იწერება რუსულ მედიაში, მათ შორის რუსეთის ფედერაციის მთავრობის მფლობელობაში მყოფი ინგლისურენოვანი სააგენტოს, Sputnik News-ის მიერ. სარწმუნო წყაროები არც ამ მედიასაშუალებების მიერ გავრცელებულ ინფორმაციას გააჩნია. რჩება შთაბეჭდილება, რომ ეს სტატიები რუსეთის ხელისუფლების უცხოელი დონორების წინააღმდეგ ჩვეული პროპაგანდის ხაზს აგრძელებს.
რაც მთავარია, ჩვენ მიერ მოპოვებული ინფორმაციით, შვედეთში კარლ ბილდტის საქმიანობასთან დაკავშირებით გამოძიება არ არის დაწყებული. ამაზე არც ზემოაღნიშნული მედიასაშუალებები მიუთითებენ. აქედან გამომდინარე, ადგილი აქვს მცდარი ინფორმაციის გავრცელებას და საზოგადოების მიზანმიმართულად შეცდომაში შეყვანის მცდელობას.
ვის ეხმარება შვედეთის მთავრობა Sida-ს მეშვეობით შვედეთის საერთაშორისო განვითარების თანამშრომლობის სააგენტო (Sida) შვედეთის სამთავრობო ორგანოა, რომელიც განვითარების პროექტებს ახორციელებს მთელი მსოფლიოს მასშტაბით 33 ქვეყანაში. ის, ფაქტობრივად, წარმოადგენს შვედეთის მთავრობის დახმარების ფონდს განვითარებადი და გარდამავალი განვითარების ქვეყნებისთვის, რომლის მიზანიცაა მსოფლიოში სიღარიბის დაძლევა, რეფორმების მხარდაჭერა და დემოკრატიის განვითარება. ფონდის ბიუჯეტს შვედეთის მთავრობა ამტკიცებს, ისევე როგორც მის პრიორიტეტებს ქვეყნების მიხედვით. ორგანიზაციის განსახორციელებელი პროექტები ამა თუ იმ ქვეყანაში განისაზღვრება სტრატეგიით და ფინანსდება შვედი გადასახადის გადამხდელის ფულით.
საქართველოში ორგანიზაციის მიზანია ხელი შეუწყოს ქვეყნის ევროკავშირთან დაახლოებას და დემოკრატიულ, ანგარიშვალდებულ სახელმწიფოდ ჩამოყალიბებას. საქართველოს შვედეთის მთავრობა 1998 წლიდან ეხმარება და, Sida-ს მეშვეობით, ჩვენს ქვეყანაში უკვე 33.8 მილიონი დოლარის ღირებულების პროექტები აქვს განხორციელებული; მათ შორის, საქართველოს მთავრობისათვის გაწეული ფინანსური დახმარება 20.4 მილიონ დოლარს აღემატება. შვედეთის მთავრობამ, Sida-ს მეშვეობით, გამოყო თანხები და დააფინანსა ისეთი მნიშვნელოვანი პროგრამები, როგორიცაა 2008 წლის ომის შედეგად დევნილად დარჩენილი ოჯახების საცხოვრისით მხარდაჭერა და იურიდიული დახმარება, საჯარო რეესტრის სისტემების მოდერნიზების და ცენტრალური საარჩევნო კომისიის ტექნიკური დახმარება.
აღსანიშნავია, რომ უკანასკნელი სამი წლის განმავლობაში, 2012-2014 წლებში, საქართველოს მთავრობას, დახმარების სახით, მიღებული აქვს 8.33 მილიონი აშშ დოლარი. დახმარების მიმღებთა შორის არიან სურსათის უვნებლობის სააგენტო, საქსტატი, აღსრულების ეროვნული ბიურო, კონკურენციის სააგენტო, საჯარო და სამოქალაქო რეესტრები. სიახლეს არ წარმოადგენს, რომ ზოგიერთ ამ სააგენტოში განხორციელებულმა რეფორმებმა მსოფლიო აღიარება მოიპოვა. მეტი ინფორმაცია შვედეთის მთავრობის მიერ დაფინანსებულ სამთავრობო პროექტებზე იხილეთ Sida-ს ვებგვერდზე.
გარდა სამთავრობო პროგრამების და სამოქმედო გეგმების მხარდაჭერისა, Sida, როგორც ყველა დიდი დონორი ორგანიზაცია, აფინანსებს მთავრობის მონიტორინგისა და ადამიანის უფლებების გაძლიერების პროგრამებსაც. ასეთ პროექტებს, როგორც წესი, არასამთავრობო ორგანიზაციები ახორციელებენ.
შვედეთის მთავრობის მიერ 2012-2014 წლებში არასამთავრობო ორგანიზაციებისთვის გაწეული დაფინანსება 4.78 მილიონი დოლარს შეადგენს, რაც თითქმის ორჯერ ნაკლებია ამ წლებში სამთავრობო პროექტების მიერ მიღებულ დაფინანსებაზე.
შვედეთის მთავრობა, Sida-ს მეშვეობით, ამ დროისათვის, „საერთაშორისო გამჭვირვალობა – საქართველოს" მნიშვნელოვანი დონორი და პარტნიორია. სწორედ მან დააფინანსა ჩვენი ორგანიზაციის წარმომადგენლობითი საარჩევნო სადამკვირვებლო მისიები 2012-2014 წლებში, რომელმაც სამივე არჩევნებზე კვალიფიციური დასკვნები და პარალელური დათვლის შედეგები მოამზადა. შვედეთის მთავრობა Sida-ს მეშვეობით აფინანსებს, ასევე, NDI-ს საზოგადოებრივი აზრის კვლევებს, რომელიც საქართველოში არსებული ყველაზე სანდო და მუდმივად განახლებადი წყაროა საზოგადოებრივი წარმოდგენების ანალიზისათვის ექსპერტებისა და აკადემიკოსებისათვის. დაწვრილებითი ინფორმაცია დაფინანსებული პროექტების შესახებ მოცემულია შვედეთის მთავრობის ღია მონაცემთა პორტალზე: http://openaid.se/.
მიგვაჩნია, რომ შვედეთის მთავრობის მისამართით გამოთქმული ბრალდებები არამარტო არასამთავრობო სექტორზე, არამედ საქართველოს მთავრობის საქმიანობაზეც წარმოადგენს დარტყმას. გაუგებარია, რატომ დუმს საქართველოს მთავრობა, როდესაც მისი ერთ-ერთი ყველაზე მნიშვნელოვანი პარტნიორის მიზანმიმართული დისკრედიტაცია ხდება. მოვუწოდებთ საქართველოს პრემიერმინისტრს და მთავრობას, საჯაროდ გაემიჯნონ შვედეთის მთავრობისა და Sida-ს მიმართ გამოთქმულ ბრალდებებს და მხარდაჭერა გამოუცხადოს საკუთარ პარტნიორს."
