„ადამიანი, კანონი, თავისუფლება" კონკურენციის სააგენტოს მიერ მომზადებული შუალედური ანგარიშის საფუძველზე გაკეთებულ განცხადებას ეხმაურება და მიიჩნევს, რომ ქვეყანაში არსებული ნავთობმომწოდებლების კარტელური გარიგება პრაქტიკულად დადასტურდა.
ორგანიზაციის აღმასრულებელი დირექტორმა, ნიკოლოზ მაღალდაძემ გამართულ პრესკონფერენციაზე იმ განცხადებას გამოეხმაურა, რომელიც შეეხება საერთაშორისო ბაზარზე ნავთობპროდუქტების ფასის ცვლილების არაადეკვატურად ასახვას შიდა ბაზარზე.
„კონკურენციის სააგენტოს მიერ ნავთობპროდუქტების ბაზარზე კონკურენციის შემზღუდველი შესაძლო ქმედებების გამოვლენისა და აღკვეთის მიზნით დაწყებული კვლევის შუალედური შედეგებიდან გამომდინარე, იკვეთება „კონკურენციის შესახებ" საქართველოს კანონის მე-7 მუხლის შესაძლო დარღვევის ნიშნები, რაზეც ჩვენი ორგანიზაცია არაერთხელ საუბრობდა საჯარო სივრცეში" აცხადებს ნიკოლოზ მაღალდაძე.
„კონკურენციის შესახებ" საქართველოს მე-7 მუხლი გულისხმობს:
Ø შესყიდვის ან გაყიდვის ფასების ან სხვა სავაჭრო პირობების პირდაპირ ან არაპირდაპირ დადგენა (ფიქსირება);
Ø წარმოების, ბაზრების, ტექნოლოგიური განვითარების ან ინვესტიციების შეზღუდვა;
Ø ბაზრების ან მიწოდების წყაროების მომხმარებლის, ტერიტორიული ან სხვა ნიშნით განაწილება;
Ø გარკვეული სავაჭრო პარტნიორების მიმართ იდენტურ ტრანზაქციებზე განსხვავებული/დისკრიმინაციული პირობების გამოყენება, რითაც ხდება მათი კონკურენციულად წაგებიან მდგომარეობაში ჩაყენება;
Ø გარიგების პირობად გარიგების მხარისთვის ისეთი დამატებითი ვალდებულების დაკისრება, რომელიც არც საგნობრივად და არც კომერციულად დაკავშირებული არ არის გარიგების საგანთან;
Ø მატერიალური გამორჩენის ან უპირატესობის მისაღებად სახელმწიფო შესყიდვებში მონაწილე ურთიერთშეთანხმებული ეკონომიკური აგენტებისთვის ან სხვისთვის სატენდერო წინადადების შეთანხმებული პირობების დაწესება, რაც არსებითად ლახავს შემსყიდველი ორგანიზაციის კანონიერ ინტერესებს.
„მოცემული მუხლის შინაარსი ცალსახად მიუთითებს, რომ ნავთობიმპორტიორები დიდი ალბათობით მხილებულ იქნებიან კარტელურ გარიგებაში. მიგვაჩნია, რომ მოკვლევა, რომელსაც აწარმოებს კონკურენციის სააგენტო ინვესტორებისთვის არის უმნიშვნელოვანესი, რადგან შესაბამისი სანქციების დაწესება ბაზარზე მოთამაშე სუბიექტებისთვის იქნება ნათელი მაგალითი იმისა, რომ ამ სფეროში განხორციელებული ინვესტიცია არ იქნება ხელოვნურად შეზღუდული.
მისასალმებელია, რომ მოკვლევის პროცესში მეთოდოლოგიურად მუშავდება და ფასდება ყველა მოსაზრება, რომელიც უკავშირდება აღნიშნული ბაზრის სუბიექტთა მოქმედებას და ბაზარზე არსებული ფასწარმოქმნის საკითხებს. ამდენად იმედს ვიტოვებთ, რომ უახლოეს მომავალში „კონკურენციის სააგენტო" საზოგადოებას კვლევის შედეგებს წარუდგენს, რომელიც ამ საკითხთან მიმართებაში ყველა არსებულ კითხვას გასცემს პასუხს" – აცხადებს ნიკოლოზ მაღალდაძე.
ნიკოლოზ მაღალდაძემ ასევე ისაუბრა ამ ბაზარზე კომპანია „სენტას" დაბრუნების საკითხზე. „კომპანია „სენტა", რომელიც დღემდე დაობს სასამართლოში ბენზინგასამართი სადგურების ჩამორთმევაზე კომპანია „გალფის" სასარგებლოდ, დაბრუნდა ქართულ ბაზარზე.
იმ პროცესების შემდგომ, როდესაც „სენტა" პრაქტიკულად ბაზრიდან გააძევეს, მისი დაბრუნება ქვეყანაში ბიზნესის თავისუფლად მოქმედების და ბიზნეს გარემოს გაჯანსაღების ერთერთი მაგალითია. ვიმედოვნებთ, რომ მსგავსი პროცესები გაგრძელდება, რაც დადებითად აისახება ქვეყნის ეკონომიკურ მდგომარეობაზე" – განაცხადა მაღალდაძემ.
ორგანიზაცია მჭიდრო ურთიერთთანამშრომლობის ფორმატში კვლავ გააგრძელებს კვლევის პროცესის მონიტორინგს და საზოგადოებას მიაწვდის ამ და სხვა სფეროებში მიმდინარე მოკვლევის შედეგებს.
